Capítulo 4
Wantiku lichuwinankgolh putum palakachuwinanin
1. ¿Tuku masiyay xlakata tuku katsiyaw akxni Jesús ni xʼamin kKatiyatni xlakata la xtalalin Jehová?
«WA XATLAT, paxkiy xaKam, na masiyuniy xlipaks ntu xla ntlaway.» (Juan 5:20.) Xlikana, wa xaKgawasa lu xlipaxuway pi lu tlan xtalalin xTlat, Jehová, chuna tsukulh talalin akxni malakatsukika, akglhuwa mil kata akxni nina aʼxlakachin la chatum lataman. Kajwatiya xkgawasa Dios xwanit, xakstu tlawalh Dios chu niti makgtayalh. Chu putum amakgapitsi tuku anan, wantuku wi kʼakgapun chu wantuku wi kKatiyatni, anankgoy kaj xlakata xaPuxku xkgawasa Dios wantiku lu paxkiy (Colosenses 1:15, 16). Atanu tuku na liskujli, litaxtulh Tachuwin o xPalakachuwina Dios, xlakata wa xlimaklakaskinkan akxni Dios xmakatsininan xtalakaskin. Wa uma Kgawasa wantiku Jehová lu xtasmaninit tiku lilakgapaska Jesucristo (Proverbios 8:22-30; Juan 1:14, 18; 12:49, 50).
2. ¿La xlimakglhuwa lichuwinankgoy Jesús tuku tatsokgnit kBiblia?
2 Akxni Dios nina xmakamin xapuxku xKgawasa unu kkatiyatni xlakata nalakachin la chatum lataman, Dios kapulalilh tiku tsokgkgolh kxtachuwin xlakata xlichuwinankgolh Jesús akxni nina aʼxlakachin. Apóstol Pedro wanilh Cornelio: «Wa yuma [Jesús] nti mastanikgoy ntamakatsinin xlipakskan xpalakachuwinanin Dios» (Hechos 10:43). Anta kBiblia lu xlakaskinka liʼakxilhkan taskujut nema lakgaya Jesús, asta chatum ángel wanilh apóstol Juan: «Wa ntamakatsinin xpalakata Jesús, wa anta wi xkilhtsukut xtachuwin xpalakachuwina Dios» (Apocalipsis 19:10). Uma tuku ay xlichuwinankanit pi xʼama la, liwana limasiyakgolh pi wa Mesías xwanit chu limasiyakgolh tuku xʼama tlawa xlakata xkgantaxtulh tuku lakapastaknit natlawa Dios, wantuku akinin uku lu xlakaskinka kiliʼakxilhatkan.
¿Tuku limasiyakgolh wantuku xtatsokgnit pi xʼama la?
3. 1) Xlakata tuku lichuwinan Génesis 3:15 pi xʼama la, ¿tiku kilhchani luwa, «puskat» chu “xkamanan luwa”? 2) ¿Tuku xlakata lu xkatsiputunkgolh xlakskujni Jehová xlakata “naʼaktayamikan luwa”?
3 Wantuku pulana lichuwinanka pi xʼama la, mastaka akxni ni kgalhakgaxmatnika Dios anta kʼEdén. Jehová wanilh luwa: «Naktlawa pi wix chu puskat ni nalaʼakxilhputunatit, chu minkamanan chu xkamanan puskat ni nalaʼakxilhputunkgoy. Xla naʼaktayamiyan chu wix natsankxkitiya» (Génesis 3:15). Umakgolh tachuwin wa wanika Satanás, wantiku litaxtuy luwa. «Puskat» kilhchanima xkachikin Jehová xalak akgapun, wantiku xtachuna la chatum puskat wantiku ni makgxtakgnan. Wa “xkamanan luwa” kilhchaniy putum ángeles chu latamanin tiku kgalhikgoy xtayatkan chuna la Satanás, uma wamputun tiku ni akxilhputunkgoy Jehová chu xkachikin. Xlakata “naʼaktayamikan luwa” kilhchanima akxni namasputukan Satanás tiku ni kgalhamakgaxmata Dios, tiku na nitlan tuku limawakalh Jehová chu lhuwa tapatin kaliminilh latamanin. Xlakata uma “kamanan”, ¿tiku tlakg xlakaskinka xʼama min nema xʼama aktayami luwa? Akglhuwa siglos, wa uma «tuku ni xtakatsiy xla Dios» xlakata tiku xʼama wan tiku tlakg xlakaskinka (Romanos 16:20, 25, 26, NM).
4. ¿Tuku xlakata makgtayanalh xlakata xtakatsiy tukuya familia xʼama min Jesús xlakata xlilakgapaska pi wa wantiku xwankanit pi xʼama min?
4 Akxni max ay akgtiy mil kata xtitaxtunit la xkamalakatsukikanit latamanin, Jehová tlakg tilichuwinalh wantuku nalikatsikan tiku xʼama wan. Masiyalh pi Kgawasa xʼama taxtuyacha anta kxfamilia Abrahán (Génesis 22:15-18). Wantiku xʼamakgolh titaxtutilhakgo asta xchalh kgawasa wantiku xwankanit pi xʼama min, maski xkalakgchan xalakpuxku, wa Dios xʼama laksaktilha tiku xʼama wan. Maski Abrahán lu xpaxkiy xkgawasa Ismael, xkgawasa Agar, Jehová wanilh: «Talakkaxlan naktatlawa Isaac, wantiku natakgalhiya Sara» (Génesis 17:18-21). Alistalh ni wa Esaú tatlawaka talakkaxlan, xapuxku xkgawasa Isaac, wata wa Jacob, anta niku kilhtsukukgolh tampukutiy laklanka familia xla Israel (Génesis 28:10-14). Alistalh masiyaka pi uma Kgawasa xʼama lakachin anta kxfamilia Judá, kxfamilia David (Génesis 49:10; 1 Crónicas 17:3, 4, 11-14).
5. Akxni Jesús matsukilh xtaskujut anta unu kkatiyatni, ¿la talikatsilh pi wa Mesías xwanit?
5 ¿Tuku tlakg talimasiyalh xlakata ni lu tuwa xkatsika tiku tama Kgawasa wantiku xwankanit pi xʼama min? Akxni xtsankgay akgtujun ciento kata xlakata nalakachin Jesús, Biblia ay xlichuwinanit pi xʼama lakachin anta kBelén chu uma Kgawasa «lu makgasa» xlama, malakatsukika anta kʼakgapun (Miqueas 5:2). Biblia liwana lichuwinalh tukuya kilhtamaku xʼama takatsiy anta unu kKatiyatni pi Jesús wa Mesías chu uma lichuwinalh palakachuwina Daniel (Daniel 9:24-26). Nachuna, kilhtamaku akxni Jesús lilaksakka espíritu santo, chuna xMesías Jehová wa, akxni Dios chuwinalh kʼakgapun liwana limasiyalh pi wa xKgawasa (Mateo 3:16, 17). ¡Tama kilhtamaku takatsilh tiku tama tiku xwankanit pi namin! Wa xlakata Felipe liwana xkatsi akxni wa: «Ktakgsnitaw yama wa nti xpalakata ntilitsokgkgolh Moisés kxlimapakgsin, chu kxtatsokgnun xpalakachuwinanin Dios. Wa xla Jesús, xkam José, xala kNazaret» (Juan 1:45).
6. 1) Chuna la wan Lucas 24:27, ¿tuku akxilhkgolh kstalaninanin Jesús? 2) ¿Tiku tlakg xlakaskinka xliputum “xkamanan puskat”, chu tuku wamputun pi naʼaktayami luwa?
6 Akxni titaxtulh kilhtamaku, kstalaninanin Jesús akxilhkgolh pi kxTachuwin Dios ay makglhuwa xlichuwinantilhakanit xlakata Jesús (Lucas 24:27). Tlakg liwana takatsilh pi Jesús wa tiku tlakg xlakaskinka xlakata “xkamanan puskat”, wantiku naʼaktayami luwa, uma wamputun pi xliputum kilhtamaku namasputuy Satanás. Wa Jesús nalimaklakaskinkan xlakata nakgantaxtuy putum tuku Dios kawaninit latamanin nakamaxki, wantuku akinin kgalhiputunaw (2 Corintios 1:20).
7. Maski na talakaskin nakatsiyaw tiku tama tiku xlichuwinankanit pi namin, ¿tuku talakaskin naʼakgatekgsaw?
7 Xlakata akinin katsiyaw uma, ¿tuku nakinkamaʼakgpuwantiniyan natlawayaw? Biblia kinkalixakgatliyan xlakata chatum xlakskujni mapakgsina xalak Etiopía, akxni ay xlekgalhtawakganit makgapitsi wantuku ay xlichuwinankanit xlakata uma tiku xʼama min, Lakgmaxtuna chu Mesías, kaks lakawa chu kgalhskilh Felipe tiku xlichuwinan xlakata Dios: «¿Xati likilhan xpalakachuwina Dios yuma?». Akxni ay xkgalhtikanit, uma chixku ni kaj chuntiya makgxtakgli. Akxni ay liwana xkgaxmatnit wantuku lixakgatlilh Felipe, akgatekgsli pi xlakata katsilh la kgantaxtulh tama wantu xwankanit pi xʼama la, xtalakaskin pi xpaxtikatsinilh chu wa xlakata wi tuku xlitlawat xwanit. Akgatekgsli pi xlitamunut xwanit (Hechos 8:32-38; Isaías 53:3-9). ¿Nachuna tlawayaw akinin?
8. 1) ¿Tuku kilhchanilh akxni Abrahán xʼama makamasta Isaac? 2) ¿Tuku xlakata Jehová wanilh Abrahán pi uma Kgawasa xʼamakgolh litamakgtayakgoy putum laklanka kachikinin chu tuku talakaskin natlawayaw akinin?
8 Nachuna, kalakapastakwi tuku talichuwinan xlakata akxni Abrahán xʼama makamasta Isaac, kajwatiya chatum xkgawasa wantiku xtakgalhinit Sara (Génesis 22:1-18). Uma kilhchanilh pi Jehová xʼama makamasta kajwatiya chatum xKgawasa: «Xampi luwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, wampi wata nakgalhiy xlatamat wa ntu xaliʼankgaIhin» (Juan 3:16). Xlakata katsimaw uma, tlaway nalipawanaw pi chuna la Jehová makamastalh kajwatiya chatum xKgawasa xlakata namakgantaxtiy xtalakaskin, na «[chapaxuwana, NM] nakinkamaxkiyan xlipaks nkatuwaj» (Romanos 8:32). Pero, ¿tuku talakaskin natlawayaw akinin? Chuna la lichuwinan Génesis 22:18, Jehová wanilh Abrahán pi putum laklanka kachikinin xʼamakgolh litamakgtayakgo uma Kgawasa, “xlakata xla xkgalhakgaxmatnit Dios”. Nachuna akinin kilikgalhakgaxmatatkan Jehová chu xKgawasa, xlakata «wanti nkanajlaniy xaKam, kgalhiy xlatamat wa ntu xaliʼankgalhin; [pero] wampi wa nti ni kgalhakgaxmata xaKam, ni katiukxilhli latamat, wampi [...] napatiy xtasitsi xliʼakgastakyawan Dios» (Juan 3:36).
9. ¿Tuku natlawayaw komo paxtikatsiniyaw xlakata kgalhkgalhimaw nakgalhiyaw latamat nema ni kgalhi xlisputni wantuku xtamakamastan Jesús tlaway tlan nakgalhiyaw?
9 Komo paxtikatsiniyaw xlakata kgalhkgalhimaw nakgalhiyaw latamat wantuku nitu kgalhi xlisputni nema masta talakaskin nakgalhiyaw xlakata xtamakamastan Jesús, natlawaputunaw wantuku Jehová kinkalimapakgsiyan xKgawasa, uma kilhchaniy napaxkiyaw Dios chu amakgapitsi latamanin (Mateo 22:37-39). Jesús masiyalh pi tapaxkit nema kgalhiniyaw Jehová nakinkamakgpuwantiniyan nakamasiyaniyaw amakgapitsi «natlawakgoy xlipaks yuma ntu [Jesús kinkalimapakgsinitan]» (Mateo 28:19, 20). Chu na kalimasiyaniputunaw uma tapaxkit amakgapitsi xlakskujni Jehová akxni xlenkgalhin “nakatatamakxtumiyaw” (Hebreos 10:25, TXS [1999]; Gálatas 6:10). Nachuna, akxni nakgalhakgaxmataw Dios chu xKgawasa, ni nalakpuwanaw pi lakaskinkgoy paks tlan nakinkakitaxtuniyan tuku tlawayaw. Hebreos 4:15 wan pi xaPuxku Sacerdote Jesús tlan «nakinkalakgalhamanan kgayaj likatsan kintaxlajwanatkan». Lu tlan limakgkatsiyaw xlakata katsiyaw uma, liwaka tlakg tlan makgkatsiyaw akxni liskiniyaw Cristo kakinkamakgtayan Dios xlakata namakgatlajayaw kintaxlajwanatkan (Mateo 6:12).
Kalimasiyaw pi kanajlaniyaw Cristo
10. ¿Tuku xlakata kajwatiya Jesucristo tlan nakinkalakgmaxtuyan?
10 Akxni ay xkalixakgatlinit xalakpuxku tiku xlakkaxtlawakgoy xtakglhuwitkan judíos, nema xwi kJerusalén, xlakata la Jesús makgantaxtilh wantuku xlitachuwinanit kxTachuwin Dios pi xʼama la, alistalh apóstol Pedro limakgasputulh umakgolh tachuwin nema lu xaxlikana: «Tini achatum mastay akgaputaxtut; xampi ni anan akgtum ntapakuwit kxtampin akgapun ntamaxkikgonit nchixkuwin lantla naliakgaputaxtuyaw» (Hechos 4:12). Xlakata putum xkamanan Adán kgalhikgoy talakgalhin, akxni nikgoy nila lilakgmaxtunankgoy. Pero Jesús ni xkgalhi talakgalhin, wa xlakata xlatamat lanka xtapalh chu tlan lilakgmaxtunan (Salmo 49:6-9; Hebreos 2:9). Jesús makamaxkilh Dios akgtum talakgmaxtut wantuku xlakgxokgo xlatamat Adán nema makgatsankgalh chu ni xkgalhi talakgalhin (1 Timoteo 2:5, 6). Chuna talakkilh tiji xlakata tlan nalakgchanaw latamat wantuku nitu kgalhi xlisputni anta kxasasti xkakilhtamaku Dios.
11. Kawanti la xlilhuwa tamakgtay kgalhiyaw xlakata xtamakamastan Jesús.
11 Talakgmaxtut na mastay talakaskin pi nachuna la uku nalitamakgtayayaw. Akgtum liʼakxilhtit, maski kgalhiyaw talakgalhin, xlakata xtamakamastan Jesús tlan nakinkatapatikanan kintalakgalhinkan chu chuna tlan nakgalhiyaw ni xaxkajwani talakapastakni. Uma tlakg lanka xtapalh nixtachuna tuku xmakglhtinankgoy israelitas akxni xmakamastakgoy animales wantuku xtatsokgnit kxLimapakgsin Moisés pi chuna xlitlawatkan xwanit (Hechos 13:38, 39; Hebreos 9:13, 14; 10:22). Pero, xlakata tlan nakinkatapatikanan, talakaskin xlikana namakgkatsiyaw chu naʼakxilhaw pi lu maklakaskinaw xtamakamastan Cristo: «Lapi xwaw mpi ni kalhiyaw ntalakgalhin, akstu takgskgawiyaw, na ni kinkaʼananiyan ntalulokgtat. Wa lapi nakgalhapalaniyaw nkintalakgalhinkan, makgantaxtina xla, chu na tlan nalipawanaw xampi nakinkamatsankgananiyan nkintalakgalhinkan, chu na nakinkachakgeniyan xlipaks nkintamakapatanunkan» (1 Juan 1:8, 9).
12. ¿Tuku xlakata talakaskin namakgtsikana kchuchut xlakata nakgalhiya nixaxkajwani talakapastakni kxlakatin Dios?
12 ¿La limasiyakgoy pi kanajlanikgoy Cristo chu xtamakamastan wantiku kgalhikgoy talakgalhin? Kxapulana siglo, wantiku xkanajlakgoy xtamunukgoy xlakatin amakgapitsi xlakata nalimasiyakgoy xtakanajlakan. ¿Tuku xlakata? Xlakata Jesús limapakgsinalh pi putum kstalaninanin chuna xtlawakgolh (Mateo 28:19, 20; Hechos 8:12; 18:8). Akxni chatum lataman lakgchan kxnaku xlakata putum tuku tlawanit Jehová, akxni limaklakaskilh Jesús nalimasiyay pi kinkapaxkiyan, ni chuntiya tamakgxtakga. Lakgpali xlatamat, tamakamastani Dios kʼoración chu limasiyay pi tamakamastanit akxni makgtsikan kchuchut. Akxni chuna limasiyay xtakanajla, “skiniy Dios ni xaxkajwani talakapastakni” nakgalhi kxlakatin Dios (1 Pedro 3:21, NM).
13. Komo tlawaw talakgalhin, ¿tuku kilitlawatkan, chu tuku xlakata?
13 Xlikana, maski akxni ay tamununitawa nawan, chuntiyaku kgalhiyaw talakgalhin. ¿Tuku natlawayaw? Apóstol Juan wa: «Wa yuma kkalitsokgniyan, lakimpi ni nalakgalhinanatit; chi lapi wa nti xlakgalhinalh, kgalhiyaw nkimpalakachuwinakan kxlakatin xaTlat, wa Jesucristo mpi xaʼakgstitum. Na wa nti nkimpuxokgokan, wa nkintalakgalhinkan» (1 Juan 2:1, 2). ¿Wamputun uma pi maski katuwa tuku natlawayaw, komo naskiniyaw pi kakinkatapatin xla nakinkatapatiyan? Ni lu wa kilhchanima. Xlakata tlan nakinkatapatikanan kintalakgalhinkan talakaskin pi lu xlikana nitlan nalimakgkatsiyaw kintalakgalhinkan. Max na namaklakaskinaw xtamakgtay lakgkgolotsin xalak congregación xla kstalaninanin Cristo. Nawanaw pi nitlan tuku tlawanitaw chu xliputum kinakujkan nitlan nalimakgkatsiyaw, xlakata akinin nialh natlawaparayaw talakgalhin (Hechos 3:19; Santiago 5:13-16). Komo chuna natlawayaw, liwana kakatsiw pi Jesús nakinkamakgtayayan chu namakgapaxuwaparayaw Jehová.
14. 1) Kalichuwinanti pulaktum nema xlakaskinka la kinkamakgtayanitan xtamakamastan Jesús. 2) ¿Tuku natlawayaw komo xlikana kgalhiyaw takanajla?
14 Xtamakamastan Jesús kamalakkininit malakcha «ni xalhuwa borregos» xlakata nalakgchankgoy latamat nema nitu kgalhi xlisputni anta kʼakgapun, umakgolh na makgtapakgsikgoy tama kamanan nema lichuwinan Génesis 3:15 (Lucas 12:32; Gálatas 3:26-29). Uma na tlaway pi akglhuwa mil millón latamanin xlakata tlan nalatamakgoy xliputum kilhtamaku anta kxaKalipaxaw Katiyatni (Salmo 37:29; Apocalipsis 20:11, 12; 21:3, 4). Latamat nema ni kgalhi xlisputni kinkamaxkiyan xlakata «xtalakgalhaman Dios [...] xpalakata Cristo Jesús Kimpuchinakan» (Romanos 6:23, TXS [1999]; Efesios 2:8-10). Komo kanajlayaw xlakata tama talakgalhaman chu paxtikatsiniyaw la kinkamaxkikan xlakata tlan nalakgchanaw, nalimasiyayaw. Taskujut nema kgalhiyaw xlakata kstalanina Cristo akinin wa tlakg xlakaskinka naliʼakxilhaw kkilatamatkan, xlakata akgatekgsaw pi Jehová lu tlan limaklakaskinit xKgawasa xlakata natlawa xtalakaskin chu lu xlakaskinka liwana nastalaniyaw Jesús. Kintakanajlakan nalitasiyay akxni limasiyayaw pi xlikana kanajlayaw tuku kalixakgatliyaw amakgapitsi latamanin xlakata xtalakgalhaman Dios (Hechos 20:24).
15. ¿Tuku xlakata tlan nawanaw pi takanajla nema kgalhinikan Jesucristo tlaway pi makxtum natawilayaw?
15 Takanajla lu tlan tuku tlaway chu tlaway pi makxtum natawilayaw, xlakata tlaway pi tlan natalakatsuwiniyaw Jehová chu xKgawasa chu amakgapitsi xala kcongregación xla kstalaninanin Cristo (1 Juan 3:23, 24). Lu lipaxuwayaw pi xlakata xtalakgalhaman Jehová, makamastalh xKgawasa «akgtum ntapakuwit wa cha ntu ntlakg tlanka ni xawa amakgapitsin tapakuwit. Lakimpi xpalakata xtukuwini Jesús, kalilakgatatsokgostakgolh lantla xlipakskan nti wilakgo nkakgapun, chu nti xala katiyatna, chu nti xala kxtampin katiyatna, chu xlipaks simakgat, kalikgalhapalakgolh mpi Jesucristo wa mPuchina, lakimpi chuna nalitamaxkiy nkakni Dios xaTlat» (Filipenses 2:9-11).
[Recuadro xla página 40]
Wantuku talichuwinalh
• Akxni takatsilh tiku Mesías, ¿tuku xlakata lakapala lakgapaskgolh wantiku xkanajlanikgoy xTachuwin Dios?
• ¿Tuku natlawayaw xlakata nalimasiyayaw pi paxtikatsiniyaw xtamakamastan Jesús?
• ¿La ay litamakgtayanitaw xtamakamastan Jesús? ¿La kinkamakgtayayan uma tamakamastan akxni skiniyaw Jehová kakinkatapatin kintalakgalhinkan?
[Dibujo xla página 36]
Jesús kawanilh kstalaninanin pi xkamasiyanikgolh amakgapitsin natlawakgoy xlimapakgsin Dios