Capítulo 10
Akgtum tamapakgsin «nema nikxni katimasputuka»
1. ¿Tuku limasiyay wantuku lama xlikalanka kakilhtamaku putum uma kilhtamaku nema ay titaxtunit?
CHALI chali, wantuku lay xlikalanka kakilhtamaku limasiyay pi lakchixkuwin nila kgalhikgoy tapaxuwan, xlakata xakstukan tapakgsiputunkgoy chu ni tapakgsiniputunkgoy Jehová. Nipara akgtum tamapakgsin xla lakchixkuwin akxtum liwana kamakgtayanit putum latamanin. Maski latamanin tlakg lhuwa liskgalala kgalhikgoy la uku, nila mapanukgoy tajatat o namapanukgoy tanin, nipara xla chatum lataman tlan mapanunikgoy. Xtamapakgsin chixku nila masputu guerras, tiku ni machokgoy xtasitsi, tiku lakatsalakgoy limapakgsin, tiku ni tlawakgoy tuku xaʼakgstitum, talimaxkgen, chu klhuwa laklanka kachikinin latamanin patinankgoy xlakata lixkajni likatsikgoy xmapakgsinanin (Eclesiastés 8:9). Katlawakanit xalaksasti chu tlakg xalakwan máquinas, lhuwa tuku kgalhiputunkan chu xlakata makgapitsin ni liwana katsikgoy tuku natlawakgoy o la natlawakgoy, putum uma tlaway pi kataxkajwanilh katiyatni, chuchut chu un. Xlakata mapakgsinanin nitlan maskujukgoy tumin, lhuwa latamanin nila kgalhikgoy tuku tlakg xlakaskinka tuku maklakaskinkgoy. Putum uma akglhuwa mil kata nema mapakgsinamakgolh latamanin liwana masiyakgoy uma tuku lichuwinan Biblia: «Lu xlikana kkatsiy, wix Jehová pi chatum chixku ni lakgchan xtiji. Ni lakgchan chatum chixku xakstu napulalin xtatukit» (Jeremías 10:23).
2. ¿Tuku kajwatiya tlan nalakkaxtlaway takglhuwit nema kgalhikgoy latamanin?
2 ¿Tiku tlan nalakkaxtlaway uma? Wa xTamapakgsin Dios, nema Jesús kamasiyanilh kstalaninanin chuna naskinkgoy: «Kamilh milimapakgsin. Wa nkatatlawalh ntu mintalakaskin, xtachuna lantla nkakgapun, na chuna kawa nkatiyatna» (Mateo 6:9, 10). Anta 2 Pedro 3:13 wanikan uma tamapakgsin xalak akgapun «xasasti akgapun», tiku namapakgsiy «xasasti tiyat» latamanin tiku xalakatitum. Xtamapakgsin Dios lu xlakaskinka, wa xlakata Jesús wa tuku tlakg xlichuwinan (Mateo 4:17). Xlakata nakatsiyaw la xlilakaskinka kiliʼakxilhatkan, Jesús wa uma tuku lichuwinalh: «Xapulana kaputsatit wa ntu xlimapakgsin Dios, chu wa xtalakaskin» (Mateo 6:33).
3. ¿Tuku xlakata la uku lu xlakaskinka nakatsiputunaw xlakata xTamapakgsin Dios?
3 La uku lu xlakaskinka nakatsiyaw xlakata xTamapakgsin Dios, xlakata nialh makgas namakgtanuy unu kkatiyatni xlakata xliputum kilhtamaku nalakgpali la mapakgsinamaka unu kkatiyatni. Daniel 2:44 lichuwinan: «Kxkilhtamaku tama mapakgsinanin [mapakgsinanin xala uku] wa Dios xalak akgapun nawiliy akgtum tamapakgsin [kʼakgapun] nema nikxni katisputli. Chu tama tamapakgsin ni katimatitaxtinika atanu kachikin [latamanin nialh katimapakgsinamparakgolh kkatiyatni]. Nakalakxpulay chu nakamasputuy putum tamapakgsin [xala uku] chu tama tamapakgsin xliputum kilhtamaku natawilay». Xlikana, Tamapakgsin xalak akgapun namasputuy uma xalixkajni kakilhtamaku chuna nialhti nalitalatlawa Dios xlakata namapakgsiputun Katiyatni. Lu kilipaxtikatsinitkan xlakata nialh makgas namin lakgtaxtut.
4. ¿Tuku lalh kʼakgapun kata1914 xlakata Tamapakgsin, chu tuku xlakata lu xlakaskinka akxilhaw akinin xlakata tuku lalh?
4 Kata 1914, Jehová wililh xlimapakgsina Cristo Jesús, maxkilh limapakgsin chu wanilh: «tliwekge kakamapakgsi [kxitat, NM] ti tasitsiniyan» (Salmo 110:1, 2). Tama kata na tsukulh «awatiya kilhtamaku» xla uma xalixkajni kakilhtamaku nema lamaw (2 Timoteo 3:1-5, 13, TXS [1999]). Tama kilhtamaku, na kgantaxtulh kʼakgapun wa tuku akxilhli Daniel pi xʼama lay. Jehová Dios, «Kgolotsin tiku tlakg lin kilhtamaku», maxkilh Jesucristo xKgawasa chixku, «tamapakgsin, chu lilanka chu pumapakgsin, xlakata kachikinin, pulaklhuwa kachikinin chu tanu tanu tachuwin putum naskujnikgoy». Daniel tsokgli uma tuku akxilhli: «Xtamapakgsin akgtum tamapakgsin nema nikxni katisputli ni katititaxtulh, xtamapakgsin nikxni katimalakgsputuka» (Daniel 7:13, 14). Dios nalimaklakaskin uma Tamapakgsin xalak akgapun nema pulalin Cristo Jesús, xlakata natlaway pi tiku paxkikgoy tuku xaʼakgstitum namakglhtinankgoy lhuwa tasikulunalin nema xla xlakaskin kakgalhikgolh latamanin akxni kawililh xapulana kinatlatnikan kxaKalipaxaw Katiyatni.
5. ¿Tuku lu katsiputunaw xlakata Tamapakgsin chu tuku xlakata?
5 ¿Tapakgsiniputunaw uma tamapakgsin chu ni makgatsankgananiputunaw? Komo chuna, lu xlikana nakatsiputunaw la takaxwilinit chu la skujma uma tamapakgsin xalak akgapun. Nakatsiputunaw tuku tlawama la uku, wantuku natlaway amimacha kilhtamaku chu wantuku kinkaskiniyan natlawayaw. Nakatsiyaw xlakata uma Tamapakgsin, natlaway pi tlakg lanka xtapalh naʼakxilhaw. Komo natapakgsiniyaw xtamapakgsin Dios, tlakg ni tuwa katimakgkatsiw nakalitachuwinanaw amakgapitsi xlakata lhuwa tuku tlan nakamaxkiy tiku xakgalhakgaxmatninanin (Salmo 48:12,13).
Mapakgsinanin kxTamapakgsin Dios
6. 1) ¿La limasiyay Biblia pi tamapakgsin nema pulalin Jesús limasiyay wantiku lakgchan namapakgsinan? 2) ¿Tuku natlawaputunaw xlakata katsimaw xlakata Tamapakgsin?
6 Akxni tlakg katsiyaw xlakata Tamapakgsin nema pulalin Jesús, wa likatsiyaw pi Jehová lakgchan namapakgsinan, xlakata wa maxkilh xKgawasa «tamapakgsin, chu lilanka chu pumapakgsin». Chuna, akxni xKgawasa Dios makglhtinalh limapakgsin chu tsukulh mapakgsinan, lu tlan pi takgaxmatli kʼakgapun tachuwin nema xwan: «¡Xlikana pi kaj xman wa xakstu mininiy namapakgsinankgoy katuxawat yama tlanka talipaw kimpuchinakan Dios nachuna Cristo wanti xtalaksakni! Chu chuna nalay, xampi xlakan kaxaniliwayaj xtiwa xman wa namapakgsinamakgoj nawan» (Apocalipsis 11:15, TXS [1999]). Wa xlakata putum tuku akxilhaw xlakata Tamapakgsin chu tuku tlawama la uku, tlaway pi tlakg lakatsu natawilaniyaw Jehová. Wantuku katsiyaw xlakata uma, xlitlawat pi xliputum kilhtamaku natapakgsiniputunaw.
7. ¿Tuku xlakata lu tlan akxilhaw pi Jesús namapakgsinan kxtukuwani Jehová?
7 Nachuna kalilakapastakwi tuku xlakata Jehová wililh Jesucristo xlakata namapakgsinan kxtukuwani. Xlakata litaxtulh xapuxku skujni nema Jehová limaklakaskilh xlakata natlawa Katiyatni chu latamanin, Jesús tlakg katsiy tuku maklakaskinaw nixawa akinin. Nachuna, kilhtamaku akxni lakatsukukgolh latamanin asta la uku xla limasiyanit pi “kapaxki xkamanan lakchixkuwin” (Proverbios 8:30, 31; Colosenses 1:15-17). Lu lhuwa kapaxki latamanin wa xlakata milh unu kKatiyatni chu mastalh xlatamat xlakata nakinkalakgmaxtuyan (Juan 3:16). Chuna wi tuku mastalh xlakata tlan nalakgtaxtuyaw ktalakgalhin chu klinin chu na tlan nakgalhiyaw latamat nema ni kgalhi xlisputni (Mateo 20:28).
8. 1) ¿Tuku xlakata xTamapakgsin Dios nikxni katisputli nixtachuna la xtamapakgsinkan lakchixkuwin? 2) ¿Tuku tlawakgoy tiku litaxtukgoy «skujni xalipaw chu xaskgalala» xlakata Tamapakgsin xalak akgapun?
8 Xtamapakgsin Dios akgtum tamapakgsin nema lu tlan wi chu nikxni katisputli. Nikxni katisputli xlakata Jehová xliputum kilhtamaku lama (Habacuc 1:12). Mapakgsinanin xalak katiyatni, nixtachuna la Jesucristo tiku Dios liyawanit xlakata namapakgsinan, xla nikxni katilakgsputli (Romanos 6:9; 1 Timoteo 6:15, 16). Amakgapitsi, 144,000 tiku ni makgatsankgananikgoy Dios, tiku minkgoy «lantla xlipaks nkilhtsukut, chu ni ntipalit tachuwin [...], nkani kawa xalanin nkakgatunu tiyat, chu nti xalanin xlikatlanka nkatuxawat», natamapakgsinankgoy Cristo, chu nachuna kamaxkikan latamat nema nikxni katilakgsputli (Apocalipsis 5:9, 10; 14:1-4; 1 Corintios 15:42-44, 53). Tlakg lhuwa ay wilakgocha kʼakgapun, chu tiku lamakgolhku kKatiyatni litaxtukgoy «skujni xalipaw chu xaskgalala» tiku skujnikgoy Tamapakgsin unu kKatiyatni (Mateo 24:45-47, NM).
9, 10. 1) ¿Tuku namasputuy xTamapakgsin Dios nema tlaway pi katapitsikgolh chu nitlan kalikatsikgolh latamanin? 2) Xlakata ni xtaratlawananin xTamapakgsin Dios nawanaw, ¿tiku ni akxtum nakatalayaw?
9 Nialh makgas, akxni nachan kilhtamaku nema Jehová lakkaxwilinit, nakamapakgsiy xʼángeles xlakata namapanukgoy tuku nitlan anan kKatiyatni. Xliputum kilhtamaku nakamasputukgoy latamanin tiku sakstukan laksakkgoy ni tapakgsiniputunkgoy Jehová chu lakgmakgankgoy tasikulunalin nema Jehová kinkalimaxkiyan Jesucristo (2 Tesalonicenses 1:6-9). Wa tama xkilhtamaku Jehová nawan, kilhtamaku akxni nalitasiyay pi Jehová lakgchan namapakgsinan xlikalanka kakilhtamaku. «¡Kakgaxpatit! Mima xkilhtamaku Jehová, ni xalakgalhamana, lu lhuwa tasitsi chu xalipekua tasitsi lakomo lhkuyat, [...] xlakata nakamasputuy lakgalhinanin xalak katiyatni chu nakamapanu xlakni katiyatni.» (Isaías 13: 9.) «Tama kilhtamaku kilhtamaku xla lipekua tasitsi, xkilhtamaku ni katsikan tuku tlawakan chu xla talipuwan, kilhtamaku xla taʼakglhuwit chu xla lisputni, kilhtamaku xakapukswa chu xakalipekua, kilhtamaku xla puklhni chu xalak tsitsakga puklhni.» (Sofonías 1:15.)
10 Tama kilhtamaku nakamasputukan putum nixaxlikana takanajla chu putum tamapakgsin xla lakchixkuwin chu xsoldados, tiku kalimaklakaskima mapakgsina tiku lu nitlan likatsiy nema nila akxilhaw xla uma kakilhtamaku. Nachuna, nakamakgnikan tiku tatayakgoy uma kakilhtamaku chu tiku xakstu kapaxkikan, tiku ni xaʼakgstitum limakgolh xlatamatkan chu tiku lixkajni limakgolh xlatamatkan. Xaʼawatiya, Satanás chu xdemonios nakalakgachinukan akgtum mil kata xlakata ni nakamakgtanu latamanin xalak Katiyatni. Tama kilhtamaku xTamapakgsin Dios namalanan unu kKatiyatni. ¡Akgtum lakgtaxtut xlakata tiku xakgstitum latamakgoy! (Apocalipsis 18:21, 24; 19:11-16, 19-21; 20:1, 2.)
La namakgantaxtiy Tamapakgsin tuku lakapastaknit natlaway
11. 1) ¿La namakgantaxtiy Tamapakgsin nema pulalin Jesús tuku Jehová lakapastaknit natlawa xlakata Katiyatni? 2) Akxni natawila Tamapakgsin, ¿la nakakitaxtuni tiku nalatamakgoy kKatiyatni tama kilhtamaku?
11 Tamapakgsin nema pulalin Jesús namakgantaxtiy tuku pulana xlakapastaknit Dios natlaway xlakata Katiyatni (Génesis 1:28; 2:8, 9, 15). Asta la uku latamanin nitu makgtayanamakgolh xlakata uma tuku lakapastaknit natlaway Dios. Pero «xasasti katuxawat ntu namin» namakamaxkikan xKgawasa chixku, Jesucristo. Putum latamanin tiku nalakgtaxtukgoy akxni Jehová namalakgaxokge uma xakgolo kakilhtamaku akxtum naskujkgoy chu Jesucristo natapakgsinikgoy, xatapaxuwan natlawakgoy tuku nakalimapakgsiy, xlakata katiyatni xakalipaxaw nawan (Hebreos 2:5-9). Putum latamanin nalipaxuwakgoy xtaskujutkan chu nalipaxuwakgoy putum tuku namakgalay Katiyatni (Salmo 72:1, 7, 8, 16-19; Isaías 65:21, 22).
12. ¿La natatlaway xlakata tiku natapakgsinikgoy Tamapakgsin nialh nakgalhikgoy talakgalhin kxtalakapastaknikan chu kxmaknikan?
12 Akxni Dios katlawalh Adán chu Eva ni xkgalhikgoy talakgalhin, xlakaskin pi katiyatni xlitatsamalh xkamanan, chu na nixkgalhikgolh talakgalhin kxmaknikan chu kxtalakapastaknikan. Tama tuku xlakapastaknit Jehová, nakgantaxtuy kxTamapakgsin. Xlakata natamakgantaxtiy uma, talakaskin namasputukan tuku nitlan limin talakgalhin, wa xlakata, Cristo ni kaj mapakgsina litaxtuy na litaxtuy la xaPuxku Sacerdote. Xatapaxuwan nakamakgtaya tiku natapakgsinikgoy xlakata tlan nalitamakgtayakgoy xlakata makamastalh xlatamat.
13. ¿Tukuya tasikulunalin namakglhtinankgoy tiku natapakgsinikgoy Tamapakgsin?
13 Latamanin wantiku nalatamakgoy akxni namapakgsinan xTamapakgsin Dios namakglhtinankgoy lhuwa tasikulunalin. «Tama kilhtamaku xlakgastapukan lakgaxokgo nalakawananparakgo, chu xtakgen tiku akgatapa nakgaxmatpara. Tama kilhtamaku tiku nila tlawan natlawan la tlawan juki, chu ksimakgat kgokgo lipaxuw nachuwinan.» (Isaías 35:5, 6.) Makni nema laklay xlakata kgolonkan o xlakata tajatat, tlakg tliwakga nawampara nixawa xla lakkamanan chu nialh katiʼanalh tajatat nema ni makgxtakgnan chu nialhti katitatatlalh. «Xtiyatliwa tlakg tliwakga kawa nixawa akxni kgawasaku xwanit; kataspitli xlitliwakga chuna la akxni kgawasaku xwanit» (Job 33:25.) Nachan kilhtamaku akxni nialhti katiwa: «Ktatatlay». ¿Tuku xlakata? Xlakata latamanin tiku napekuanikgoy Dios nakalakgmaxtukan ktalakgalhin chu tuku nitlan limin (Isaías 33:24; Lucas 13:11-13). Xlikana, «naxakanikgo Dios xlakgpixtajatkan: na nialh katianalh linin; chu na nialh katianalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwaj, wa ntu xanan xakgasiyaj, paks lakgsputli» (Apocalipsis 21:4).
14. ¿Tuku na talakaskin xlakata tlan nakgalhiyaw latamat nema ni kgalhi talakgalhin?
14 Pero, xlakata nialh nakgalhikan talakgalhin ni kajwatiya talakaskin nakgalhiyaw xatlan kimaknikan chu kintalakapastaknikan. Na talakaskin nalimasiyayaw la xtayat Jehová, xlakata kinkatlawakanitan “chuna la xla, chu chuna la tasiyay” (Génesis 1:26). Xlakata tlan nalimasiyayaw xtayat Jehová talakaskin lhuwa nakinkamasinikanan. Xlakata «[n]aʼanan talulokgtat» o tuku xalakatitum kxasasti kakilhtamaku, «tuku xalakatitum wa tuku nakatsinikgoy tiku natawilakgoy kKatiyatni» (2 Pedro 3:13; Isaías 26:9). Uma tayat tlaway pi tlan kalatalalinkgolh latamanin tiku tanu tanu xkilhtsukutkan, amigos, akgatunu familias chu tuku tlakg xlakaskinka, tlakg tlan natalalinkgoy Dios (Salmo 85:10-13; Isaías 32:17). Wantiku katsinikgoy tuku xaʼakgstitum tsinu tsinu nakamasiyanikan tuku lakaskin Dios natlawakgoy. Chuna la tlakg napaxkikgoy Jehová kxnakujkan, nalilatamakgoy xlimapakgsin xliputum kxlatamatkan. Chuna la Jesús, tlan nawankgoy: «Nkit xliankgalhin ktlaway wa ntu xla lakgatiy [kinTlat]» (Juan 8:29). ¡Lu lipaxuw nawan latamat akxni putum latamanin chuna nawankgoy!
Wantuku tatlawamaja chu akxilhaw
15. Kalimaklakaskinti takgalhskinin nema wilakgolh pakgalhu, xlakata nalichuwinana tuku tlawama la uku tamapakgsin chu kawanti tuku kilitlawatkan.
15 Wantuku tlawama xTamapakgsin Dios chu tiku tapakgsinikgoy, kaks kinkamalakawaniyan chu akxilhaw. Takgalhskinin chu textos xalak Biblia nema wilakgolh pakgalhu nakinkamalakapastakayan makgapitsi xlakata uma chu nachuna nalakapastakaw tuku tlan natlawakgoy chu xlitlawatkan la uku tiku tapakgsinikgoy uma Tamapakgsin.
¿Tiku pulana katalachipalh Tamapakgsin chu la kitaxtulh? (Apocalipsis 12:7-10, 12.)
Akxni Jesús tsukucha mapakgsinan asta la uku, ¿tiku kalitakgatsankgamaka xlakata nakamamakgstokgkan? (Apocalipsis 14:1-3.)
¿Tukuya taskujut lichuwinalh Jesús nema xʼama tatlaway akxni xmilh lanka takatsanajwat, chuna la masiyay Mateo 25:31-33?
¿Tukuya taskujut pulana tatlawama la uku? ¿Tiku makgtlawamakgolh uma taskujut? (Salmo 110:3; Mateo 24:14; Apocalipsis 14:6, 7.)
¿Tuku xlakata políticos chu ni xaxlikana takanajla nila machokgoy taskujut xlakata talichuwinama Dios? (Zacarías 4:6; Hechos 5:38, 39.)
Wantiku tapakgsinikgoy Tamapakgsin, ¿la talakgpalinit xlatamatkan? (Isaías 2:4; 1 Corintios 6:9-11.)
Tamapakgsin xaʼakgtum Mil Kata
16. 1) ¿La xlimakgas namapakgsinan Cristo? 2) ¿Tuku lu tlan natatlawa tama kilhtamaku chu alistalh?
16 Akxni Satanás chu xdemonios kapulhman nakawilikan, Jesucristo chu 144,000, akgtum mil kata mapakgsinanin chu sacerdotes nawankgoy (Apocalipsis 20:6). Tama kilhtamaku xliputum kilhtamaku namasputukan talakgalhin chu tanin nema makilhtsukilh Adán, chu natlawakgoy pi latamanin nialh nakgalhikgoy talakgalhin. Akxni nakgalhsputa Tamapakgsin xaʼakgtum Mil Kata, akxni ay makgantaxtinit nawan tuku xliyawakanit, Mapakgsina xatalaksakni chu Sacerdote, Jesús «namakamastay [...] ntapakgsin» kxmakan xTlat, «lakimpi man wa Dios nti nalikgantaxtuy xlipaks nkatuwaj» (1 Corintios 15:24-28). Tama kilhtamaku kaj tsinu namakgxtakgkan Satanás xlakata nakaliʼakxilhkan latamanin tiku kalakgmaxtukanit, chu chuna natasiya komo xlikana ni makgatsankgananikgoy chu akxilhkgoy pi Jehová lakgchan namapakgsinan xlikalanka kakilhtamaku. Akxni nakgalhsputa uma xaʼawatiya tuku nakaliʼakxilhkan latamanin, Dios namasputuy Satanás chu tiku ni kgalhakgaxmatnankgoy chu natatayakgoy Satanás (Apocalipsis 20:7-10). Tiku natatayakgoy Jehová pi wa lakgchan namapakgsinan, nalimasiyakgoy pi ni makgxtakgkgoy. Tama kilhtamaku tlan natalalinkgoy Jehová; chu xla nakamakgamakglhtinan la xlakgkgawasan chu xlaktsuman chu nakamaxki latamat nema ni kgalhi xlisputni (Romanos 8:21).
17. 1) ¿Tuku naʼakgspula Tamapakgsin akxni nasputa akgtum mil kata? 2) ¿Tuku xlakata tlan nawanaw pi Tamapakgsin «nikxni katimalakgsputuka»?
17 Wa xlakata, xtaskujut Jesús chu xtaskujut 144,000 xlakata Katiyatni, natalakgpaliy. ¿Tuku natlawakgoy alistalh? Biblia ni kinkawaniyan. Pero komo akinin natatayayaw pi Jehová lakgchan namapakgsinan, nalatamayaw akxni nakgalhsputa Tamapakgsin xaʼAkgtum Mil Kata chu tama kilhtamaku nakatsiyaw tuku lakapastaknit nakamatlawi chu nachuna tuku lakapastaknit natlawa xlikalanka kakilhtamaku. Pero, ¿tuku xlakata tawan pi akxni namapakgsinan Cristo xaʼakgtum mil kata «nikxni katisputli» chu xTamapakgsin «nikxni katimalakgsputuka»? (Daniel 7:14.) Tlan nawanaw, pi xlimapakgsin ni katiliyawaka a chatum tiku tanu tuku lakapastaka, xlakata wa Jehová tiku namapakgsinan. Nachuna Tamapakgsin «nikxni katimalakgsputuka» tlan chuna nawanaw xlakata tuku natlawa nikxni katisputli (Daniel 2:44). Nachuna, Mapakgsina chu Sacerdote chu amakgapitsi mapakgsinanin chu sacerdotes tiku natamapakgsinankgoy nakamalankikan xliputum kilhtamaku xlakata tlan skujnikgolh Jehová.
Wantuku talichuwinalh
• ¿Tuku xlakata kajwatiya xTamapakgsin Dios tlan nalakkaxtlaway taʼakglhuwit nema kgalhikgoy latamanin? ¿Tukuya kata tsukulh mapakgsinan Jesús kxTamapakgsin Dios?
• ¿Tuku tlakg lakgatiya xlakata uma tamapakgsin chu tuku natlawa?
• ¿Tuku tlawama la uku Tamapakgsin nema akxilhaw, chu la na makgtaxtuyaw akinin?
[Dibujo xla página 93]
Anta kxTamapakgsin Dios, putum nakatsinikgoy tuku xaʼakgstitum