Capítulo 13
Lhuwa latamanin kxlakatin xpumapakgsin Dios
1. 1) ¿Tuku kaʼakgspulalh xlakskujni Dios tiku latamakgolh akxni nina aʼxmin Jesús chu tuku na kaʼakgspulay 144,000 xlakata tlan namakgamakglhtinankgoy talakgalhaman nema nakamaxkiy Dios? 2) ¿Tuku kgalhkgalhimakgolh tiku litaxtukgoy “lhuwa latamanin” tiku lamakgolh la uku?
KXKILHTAMAKU Abel asta chalh Juan tiku xMununan, xlakskujni Dios tiku latamakgolh tama kilhtamaku wantuku tlakg xlakaskinka akxilhkgolh kxlatamatkan wa xtlawakgolh xtalakaskin Dios, maski chuna tlawakgolh xlakan nikgolh, pero kgalhkgalhimakgolh nakamalakastakwanikan kKatiyatni akxni natawila xasasti xkakilhtamaku Dios. Wa 144,000 wantiku natamapakgsinankgoy Cristo anta kxTamapakgsin xalak akgapun, na pulana xlinitkan xlakata tlan namakglhtinankgoy latamat anta kʼakgapun. Pero, Apocalipsis 7:9 masiyay pi kxaʼawatiya kilhtamaku xʼamakgolh anankgoy tiku litaxtukgoy “lhuwa latamanin” xlikalanka katiyatni tiku xkgalhkgalhikgolh xlakata tlan xlatamakgolh xliputum kilhtamaku, chu ni talakaskin pulana nanikgoy. ¿Na anta makgtapakgsiya wix?
Takatsilh tiku uma xalhuwa latamanin
2. ¿La taʼakgatekgstilhalh tiku uma tiku litaxtukgoy lhuwa latamanin nema lichuwinan Apocalipsis 7:9?
2 Kata 1923, xlakskujni Jehová akgatekgskgolh pi «borregos» nema lichuwinalh Jesús anta kMateo 25:31-46 chu «amakgapitsi borrego» nema lichuwinan Juan 10:16, wa latamanin tiku nakamaxkikan latamat xliputum kilhtamaku anta kKatiyatni. Kata 1931 na takatsilh pi uma latamanin watiya tiku kamutsokgkanit nema talichuwinan anta kʼEzequiel 9:1-11. Chu kata 1935 akgatekgskgolh pi umakgolh tiku litaxtukgoy lhuwa latamanin anta tapakgsikgoy kʼamakgapitsi borregos nema lichuwinalh Jesús. Umakgolh latamanin tiku kgalhikgoy uma talakgalhaman lhuwa millones wilakgolh la uku.
3. Tachuwin «xwilakgolh kxlakatin laktawilh mpumapakgsin», ¿la likatsiyaw pi ni wamputun pi umakgolh tiku litaxtukgoy lhuwa latamanin wa tiku amakgolh kʼakgapun?
3 Anta kʼApocalipsis 7:9 ni wan pi tiku litaxtukgoy lhuwa latamanin kʼakgapun wilakgolh. Xlakata wan pi «xwilakgo kxlakatin laktawilh mpumapakgsin» ni wamputun pi kʼakgapun wilakgocha. Uma tachuwin wamputun pi Dios kaʼakxilhma (Salmo 11:4). Xlakata tlan nalikatsiyaw pi uma tiku litaxtukgoy «lhuwa latamanin» ni wa tiku amakgolh kʼakgapun, wa likatsiyaw xlakata «ntini la xputlakgay» —uma wamputun pi nila takatsiy la xlilhuwa— pero, Apocalipsis 7:4-8 chu Apocalipsis 14:1-4 lichuwinan pi kaj 144,000 wantiku kalimaka kʼakgapun.
4. 1) ¿Tuku tama «tlanka takatsanajwat» nema lakgtaxtunikgoy tiku litaxtukgoy lhuwa latamanin? 2) Chuna la wan Apocalipsis 7:11, 12, ¿tiku katakakninanikgoy Dios tiku litaxtukgoy lhuwa latamanin?
4 Apocalipsis 7:14 wan xlakata umakgolh tiku litaxtukgoy lhuwa latamanin «[lakgtaxtunikgonit] ntlanka tapatin». Umakgolh latamanin lakgtaxtukgoy klanka talakgaputsit chuna la nipara amakgtum akaʼakgspula latamanin (Mateo 24:21). Xlakata lu paxtikatsinikgoy, chu katsikgoy pi wa Dios chu Cristo tiku kalakgmaxtuy, putum tuku tlawanit nema wilakgolh kʼakgapun makxtum katakakninanikgoy Jehová chu wankgoy: «Amén. Wa ntasukulunatlawan, chu litlanka, chu ntastakat, chu xlitamastat mpaxkatsinit, chu litliwakga wa mininiy nakgalhiy nkiDioskan nkaxani liwayaj xtiwaj. Amén» (Apocalipsis 7:11, 12).
La limasiyakgoy pi xlilakgtaxtutkan
5. ¿La nalikatsiyaw tuku talakaskin xlakata tlan nakatatapakgsiyaw tiku litaxtukgoy lhuwa latamanin?
5 Akxni namin lanka talakgaputsit, Jehová nakamalakgtaxti umakgolh tiku litaxtukgoy lhuwa latamanin, chu nakamalakgtaxtiy chuna la wi xaʼakgstitum xlimapakgsin. Biblia masiyay tukuya tayat xkgalhikgolh wantiku nalakgtaxtukgoy, wa xlakata wantiku lakgatikgoy wantuku xaʼakgstitum xliskujatkan xlakata nakgalhikgoy xalakwan tayat chu chuna nalimasiyakgoy pi kalakgchan nalakgtaxtukgoy. ¿Tuku xlitlawatkan?
6. ¿Tuku xlakata tlan natamalakxtumiyaw tiku litaxtukgoy lhuwa latamanin la borregos?
6 Borregos ni lakluku chu kgalhakgaxmatninankgoy. Wa xlakata, akxni Jesús lichuwinalh pi xkgalhi atanu borregos tiku ni katatapakgsikgoy wantiku amakgolh kʼakgapun, wa xkilhchanima wantiku nalatamakgoy xliputum kilhtamaku kKatiyatni chu, na kgalhakgaxmatkgoy tuku kamasiniy Jesús. Xla wa: «Yama wanti kit klimaxtukgoy la kiborrego, luwa klakgapaskgoy, chu xlakan na kilakgapaskgoy, akxni kgaxmatkgoy kintachuwin tunkan kistalanikgoy» (Juan 10:16, 27, TXS [1999]). Umakgolh latamanin kuenta tlawakgoy chu tlawakgoy tuku kawanikan, chu chuna kstalaninanin Cristo wankgoy.
7. ¿Tukuya tayat xlikgalhitkan kstalaninanin Cristo?
7 ¿Tuku atanu tayat xlikgalhitkan kstalaninanin Cristo? Xtachuwin Dios wan: «Mpi milimakgaxtakgatkan wa ntu xamakgan mintayatkan [...] na kalilakgpalinantit xasasti chixku wa ntu litatlawanit xtachuna Dios xtapuwan, lantla ntu luwa wa ntalulokgtat ntu ntlaway, chu xasantujlani kxlatamat» (Efesios 4:22-24). Kstalaninanin Cristo kgalhikgoy tayat nema tlaway pi makxtum natawilakgoy chu wa umakgolh: «tapaxkit, tapaxuwan, takaksni, tiku lu kgalhkgalhinan, tlawakan tuku tlan, tlan talikatsit, takanajla, ni lakapara sitsikan, tiku machokgoy tuku nitlan tlawaputun» (Gálatas 5:22, 23, NM).
8. ¿Tuku kaʼakgspula tiku litaxtukgoy lhuwa latamanin xlakata makgtayakgoy wantiku taʼamanalh kʼakgapun?
8 Wantiku litaxtukgoy ni xalhuwa latamanin tiku naʼankgoy kʼakgapun wa pulalimakgolh natalichuwinan xlakata Dios chu tiku litaxtukgoy xalhuwa latamanin makgtayanankgoy kʼuma taskujut (Mateo 24:14; 25:40). Amakgapitsi borregos makgtayanankgoy maski katsikgoy pi nakaliputsastalakan, xlakata akxni tsukulh uma xaʼawatiya kilhtamaku Cristo chu xʼángeles kamaxtukgocha Satanás chu xdemonios anta kʼakgapun. ¿La kitaxtulh? «Kgoxutanin wa nti lamakgo nkatuxawat [...] xampi wa akgskgawini, kalakgminitan, na luwa tlanka tasitsin nkgalhiy, xpalakata mpi katsiy mpi kaj tsinu kilhtamaku nkgalhiy.» (Apocalipsis 12:7-12.) Chuna la talakatsuwitilhama xlisputni uma kakilhtamaku, Satanás tlakg kaputastalanima xlakskujni Dios.
9. ¿La kakitaxtunitit xlakskujnin Dios akxni lichuwinankgoy xalakwan xalaksasti tamakatsin, chu tuku xlakata?
9 Maski lu lilakgaputsa la kaputsastalakan, chuntiya talichuwinama xlakata Dios. Akxni sputli xaPulana Guerra nema tatlawalh xlikalanka Katiyatni xtatayananin Jehová ni lhuwa mil xwankgonit pero la uku lhuwa millones wilakgolh, xlakata Jehová xwanit: «Paks tuku nalitalachipaputunkana, nitu katilitlawanikgon» (Isaías 54:17). Asta chatum tiku xalak puxku tiku xlakkaxtlawakgoy xtaʼakglhuwitkan judíos (Sanedrín) wa pi niti la xmachokgolh xtaskujut Dios. Uma chixku wa uma tuku kawanilh fariseos xalak pulana siglo xlakata kstalaninanin Jesús: «Kamakgaxtakgkgotit; xampi lapi wa yuma ntakanajla, su tamasiyun, kaj xla chixkuwin, nasputayay. Wampi lapi wa xla Dios, ni lama nkatilaktlawatitku; chi wampi kamakgaxtakgkgotit, ni wa mpala wa Dios ntalhtaninipatit [o talatlawapatit]» (Hechos 5:38, 39).
10. 1) ¿Tuku wamputun xlakata «kamutsokgkanit» tiku makgtapakgsikgoy kʼumakgolh tiku litaxtukgoy lhuwa latamanin? 2) ¿La kgalhakgaxmatkgoy «ntachuwin xala kʼakgapun» xlakskujnin Dios?
10 Umakgolh tiku litaxtukgoy lhuwa latamanin lakomo kamutsokgkanit chu uma tlaway pi tlan nalakgtaxtukgoy (Ezequiel 9:4-6). Xlakata «kamutsokgkanit» limasiyay pi tamakamastanikgonit Dios, tamunukgonit chu kstalaninanin Cristo wankgoy, chu liskujmakgolh xlakata nakgalhikgoy tayat nema xlikgalhitkan kstalaninanin Cristo. Umakgolh latamanin kgalhakgaxmatkgoy «ntachuwin xala kʼakgapun» nema lichuwinan xlakata putum nixaxlikana takanajla, nema wa kamapakgsiy Satanás: «Kalakgtaxtunitit wixin, wa nti nkintalaksaknin, lakimpi ni natamakglakgalhinankgoyatit, chu na ni natapatikgoyatit lisokgalin ntu napatiy» (Apocalipsis 18:1-5).
11. ¿La limasiyakgoy tiku litaxtukgoy lhuwa latamanin pi xlakskujnin Jehová?
11 Nachuna, Jesús kawanilh kstalaninanin: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit nchatunu chatunu» (Juan 13:35). Pero wantiku makgtapekgsikgoy kʼatanu takanajla xlikalanka kakilhtamaku, lalimakgni kaj xlakata xaʼalakatunu kachikinin. Xtachuwin Dios wan: «Wa yuma litalakgapaskgoy xlakgskgatan Dios, chu xlakgskgatan akgskgawini: kaxati kawa nti ni tlaway wa ntu akgstitum, chu na ni paxkiy xtala, ni wa ntapakgsiniy Dios, nalapaxkiyatit nchatunu amakgapitsin. Ni wa xtachuna lantla nCain nkatiwantit, xampi akgskgawini xtapakgsiniy, na timakgnilh xtala» (1 Juan 3:10-12).
12. ¿Tuku nakatlawaniy Jehová klanka talakgaputsit takanajla nema litaxtuy «kiwi» tiku mastakgoy nixatlan tawakat?
12 Jesús masiyalh: «Chuna xlipaks wa ntu xatlan kiwi, mastay wa ntu xatlan xatawakat, wampi wa ntu ni xatlan kiwi, wa mastay wa ntu ni xatlan xatawakat. Ni lay xatlan kiwi mastay wa ntu ni xatlan xatawakat, chu na ni mpala wa ntu ni xatlan kiwi, ni lay mastay wa ntu xatlan xatawakat. Xlipaks nkiwi wa ntu ni mastay ntlan xatawakat, nakakan, namapukan klhkuyat. Chuna mpi, wa xatawakat nalilakgapaskgoyatit» (Mateo 7:17-20). Tawakat nema mastakgoy takanajla xla uma kakilhtamaku limasiyakgoy pi xlakan xamasni «kiwi», wa xlakata Jehová nakamasputuy anta klanka talakgaputsit (Apocalipsis 17:16).
13. ¿La limasiyakgoy tiku litaxtukgoy lhuwa latamanin pi makxtum «wilakgo kxlakatin laktawilh mpumapakgsin» xla Jehová?
13 Apocalipsis 7:9-15 pulaklhuwa tuku lichuwinan nema tlaway pi umakgolh tiku litaxtukgoy lhuwa latamanin tlan nalakgtaxtukgoy. Kaʼakxilhkan pi «xwilakgo kxlakatin laktawilh mpumapakgsin», tatayamakgo Jehová pi wa lakgchan namapakgsinan xlikalanka kakilhtamaku. «Chakgakgonit xlhakgatkan, na wa xkgalhni nkalhnilu limasnapapwanikgonit», uma wamputun pi lanka xtapalh akxilhkgoy xtamakamastan Jesús nema lakgmaxtunan (Juan 1:29). Tamakamastanikgonit Dios, chu tamunukgonit, chu chuna nixataxkajwani wilakgolh kxlakatin Dios nema wa limasiyay xasnapapa xlhakgatkan, chu «tantaku tantaskaka» kakninanikgoy Jehová. ¿Na tlan tlakg xmatlani mi latamat xlakata na anta xmakgtapakgsi?
Tasikulunalin nema kgalhikgoy la uku
14. ¿Tuku lu xatlan tasikulunalin makgamakglhtinankgo la uku kskujnin Jehová?
14 Xlikana pi max wix akxilhnita lanka tasikulunalin nema makgamakglhtinankgonit uku xlakskujni Jehová. Akgtum liʼakxilhtit, akxni wix katsi xlakata tuku Jehová lakapastaknit natlawa, akgatekgsti pi anan akgtum lu xatlan takgalhkgalhin nema nialh makgas nakinkamaxkiyan Dios. Wa xlakata, la uku liwana katsiya tuku natlawaya kmilatamat: naskujniya xaxlikana Dios chu chuna tlan nalatapaya xliputum kilhtamaku anta kxakalipaxaw Katiyatni. Xlikana, Mapakgsina Jesucristo «napulaliyankgo [lhuwa latamanin] ntani anan ntaxtunu nchuchut xla latamat» (Apocalipsis 7:17).
15. Xlakata xtatayananin Jehová ni makgtanukgoy kpolítica chu linkgoy xlatamatkan chuna la wan Biblia, ¿tukuya tasikulunalin makgamakglhtinankgoy?
15 Akgtum tasikulunalin nema kgalhikgoy la uku tiku litaxtukgoy lhuwa latamanin wa pi lapaxkikgoy, makxtum wilakgolh chu tlan latalalinkgoy xlakskujni Jehová xlikalanka katiyatni. Xlakata watiya liwat xla takanajla kgalhikgoy, watiya limapakgsin chu watiya tastakyaw xla xtachuwin Dios kgalhakgaxmatkgoy, uma tlaway pi ni nakamapitsi talakapastakni xla política chu xtalakapastaknikan kachikinin. Chu nachuna, makgantaxtiyaw limapakgsin nema kinkamaxkiyan Dios xlakata nalinaw kilatamatkan chuna la xlilat (1 Corintios 6:9-11). Xlakata uma, xkachikin Jehová wilakgolh kʼakgtum paraíso xaʼespiritual chu ni lamakglhuwi, ni tapitsikgoy chu ni tlawakgoy talakgxtumit xalimaxana nema tlawakgokan kkakilhtamaku. Kaʼakxilhti la talichuwinan xlakata uma anta kʼIsaías 65:13, 14.
16. ¿Tuku kgalhkgalhimakgolh tiku litaxtukgoy lhuwa latamanin maski kgalhikgoy taʼakglhuwit nema anan kakilhtamaku?
16 Xlikana pi xlakskujni Jehová na makglakgalhinanin. Chu na watiya kgalhikgoy taʼakglhuwit nema kgalhikgoy amakgapitsi latamanin, xlakan na kalakgmin talakgaputsit chu na makgpatinankgoy xlakata guerras nema tlawakgoy kachikinin maski nitu tlawakgonit. Na kachipa tajatat, patinankgoy chu nikgoy. Maski chuna kaʼakgspulama, kanajlakgoy pi kxasasti kakilhtamaku, «naxakanikgo Dios xlakgpixtajatkan: na ni alh katianalh linin; chu na ni alh katianalh ntalipuwan, ni mpala wa ntatasa, chu na ni mpala wa ntakatsanajwat» (Apocalipsis 21:4).
17. Maski wi tuku nakinkaʼakgspulayan la uku, ¿tuku lu tlan kgalhkgalhimakgo wantiku kakninanikgoy Dios?
17 Maski max wix naniya xlakata nakgolona, tajatat, wi tuku naʼakgspulayan o xlakata taputsastalanit, Jehová namalakastakwaniyan anta kxaKalipaxaw Katiyatni (Hechos 24:15). Wa xlakata, akxni namapakgsinan Cristo xaʼAkgtum Mil Kata chuntiya lhuwa naʼan tuku nalipaxawaya xlakata Dios. Tlakg napaxkiya Dios akxni naʼakxilha nakgantaxtuy tuku lakapastaknit natlawa; chu akxni namakgamalhtinana tasikulunalin nema nakamaxki putum latamanin, tlakg napaxkiya (Isaías 25:6-9). ¡Lu tlan tuku nalipaxuwakgoy xkachikin Dios!
Wantuku talichuwinalh
• ¿Tuku kaks kinkamalakawaniyan tuku lichuwinan Biblia xlakata tiku litaxtukgoy lhuwa latamanin?
• Komo akinin xlikana nakatatapakgsiputunaw uma tiku litaxtukgoy lhuwa latamanin wantiku Jehová tlan kaʼakxilha, ¿tuku kilitlawatkan la uku?
• ¿La akxilha wix tasikulunalin nema kgalhikgoy uku tiku litaxtukgoy lhuwa latamanin chu tasikulunalin nema namakglhtinankgo kxasasti xkakilhtamaku Dios?
[Dibujo xla página 123]
Lhuwa millón latamanin wantiku makgtapakgsikgo ktama lhuwa latamanin makxtum kakninanikgoy xaxlikana Dios