Capítulo 18
Xlakan ni makgtapakgsikgoy kkakilhtamaku
1. 1) ¿Tuku skilh Jesús xpalakata xtamakgalhtawakgen akxni ay xʼamaka makgnikan? 2) ¿Tuku xlakata lu xlakaskinka ni «ntapakgsi[yaw] kakilhtamaku»?
XAʼAWATIYA tsisni akxni nina xmakgnikan Jesús, xla tlawalh akgtum oración chu kapalakaskilh xtamakgalhtawakgen. Xlakata xkatsi pi Satanás lhuwa tuku xʼama limaklakaskin xlakata kstalaninanin nialh kskujnikgolh Dios, skinilh xtlat: «Ni wa klipalakaskinkgoy mpala kaj namapanukgoya nkatuxawat, wampi wata kaj kuintaj natlawakgoya, mpi ni tu namakgspulikgo akgskgawini. Ni katuxawat [o kakilhtamaku] ntapakgsikgoy, lantla chu nkit, ni xala katuxawat» (Juan 17:15, 16). ¿Tuku xlakata xlakaskinka ni namakgtapakgsiyaw kkakilhtamaku? Xlakata Satanás wa xmapakgsina kakilhtamaku, chu akinin kstalaninanin Cristo ni makgtapakgsiputunaw kkakilhtamaku nema mapakgsi Satanás (Lucas 4:5-8; Juan 14:30; 1 Juan 5:19).
2. ¿Tuku ni xtlawa Jesús nema xlimasiyay pi ni xmakgtapakgsiy kkakilhtamaku?
2 Xlakata Jesús ni xmakgtapakgsi kkakilhtamaku uma ni xwamputun pi ni xkapaxkiy amakgapitsi latamanin. Wata kamapaksalh tiku xtatatlakgoy, kamalakastakwanilh tiku xnikgonit, kamasiyanilh latamanin tuku xTamapakgsin Dios chu asta mastalh xlatamat xpalakatakan. Pero, ni paxkilh xtalakapastaknikan chu tuku nitlan xtlawakgoy uma kakilhtamaku nema mapakgsiy Satanás. Wa xlakata Jesús kawanilh xtamakgalhtawakgen pi ni xtlawaputunkgolh talakgxtumit xalimaxana, ni lhuwa tumin xkgalhiputunkgolh chu ni xtlawaputunkgolh pi lhuwa xkalakgapaska, o atanu tuku nitlan (Mateo 5:27, 28; 6:19-21; Lucas 20:46, 47). Jesús na nixmakgtanu kpolítica. Maski Jesús judío xwanit, ni makgtanulh ktaʼakglhuwit xla política nema xkgalhikgoy romanos chu judíos.
«Kintamapakgsin ni xala unu kkatuxawat»
3. 1) ¿Tuku limawakakgolh Jesús kxlakatin Pilato xpulalinanin xtakanajlakan judíos, chu tuku xlakata? 2) ¿Tuku limasiyay pi Jesús ni xtawilaputun xlimapakgsina unu kkatiyatni?
3 Kalakapastakwi tuku lalh akxni xpulalinanin xtakanajlakan judíos tlawakgolh pi xchipaka Jesús chu xlinka kxlakatin mapakgsina Poncio Pilato tiku xalak Roma xwanit. Umakgolh pulalinanin xlisitsikgonit xlakata Jesús xkawaninit pi kaj xlimasiyaputunkgoy pi kakninanikgoy Dios. Xlakata mapakgsina wi tuku xtlawanilh, uma tuku limawakakgolh Jesús: «Wa yuma nchixku, ktakgsnitaw lantla malakgaspityawamakgo ntachixkuwitat; na laktlaway ntaxokgon wa ntu ntamaxkiy César. Wan mpi wa nCristo, tlanka rey» (Lucas 23:2). Xlakan kaj xʼakgsaninamakgolh, xlakata akxni xtsankgay akgtum kata akxni ni axchipakan Jesús, latamanin mapakgsina xtlawaputunkgoy, chu xla ni lakaskilh (Juan 6:15). Cristo xkatsi pi Mapakgsina xʼama wan, pero mapakgsina xalak akgapun (Lucas 19:11, 12). Na ni wa lakchixkuwin xʼamakgolh wilikgoy xlimapakgsina, wata wa Jehová xʼama wili xlimapakgsina.
4. ¿La xʼakxilha Jesús xlakata tuku kaxokgonikan mapakgsinanin?
4 Akxni kajku akgtutu kilhtamaku xtsankga nachipakan Jesús, fariseos xtlawaputunkgo pi Jesús wi tuku xwa, xlakata tuku kaxokgonikan mapakgsinanin, chu chuna wi tuku tlan xlimawakakgolh. Pero, xla kaskinilh: «Kakimasiyunitit ntumin xla lixokgon [xtuminkan romanos]. ¿Xati xlakapun nkgalhiy? chu ¿xati xtukuwini ntalhkanit? Cha nchu nkgalhtinankolh, wankgolh: Wa xlakapun César, chu na wa xtukuwini. Chanchu wankgolh: Pus wa César nkamaxkitit wa ntu xla César; chi nchu wa ntu xla Dios, wa Dios nkamaxkitit» (Lucas 20:20-25).
5. 1) ¿Tuku kamasiyanilh Jesús xtamakgalhtawakgen akxni chipaka? 2) ¿Tuku wanilh Pilato Jesús, xlakata tuku xtlawanit chu xwanit? 3) ¿Tuku tlawanika Jesús?
5 Jesús nikxni kawanilh latamanin pi ni katapakgsinikgolh mapakgsinanin. Akxni soldados chu amakgapitsi lakchixkuwin kichipakgolh Jesús, Pedro tamakxtulh xʼespada chu kaktinilh xtakgen chatum lataman. Pero Jesús wanilh xʼapóstol: «Kamanu minkuchilu [o espada] kxputanun, xampi xlipaks wa nti nkuchilu xlimakapawankgolh, na wa nkuchilu nalinikgoy» (Mateo 26:51, 52). Lichali wanilh Pilato tuku xlakata chuna xtlawanit chu xwanit: «Wa nkilimapakgsin, ni anta xala yunu nkatuxawat. Lapi anta kawa xala yuna nkatuxawat nkilimapakgsin, wa nkinchixkuwin xtalatlawanankgolh lakimpi ni xaktamakamastanikgolh judíos. Wa nchu ni anta xala yunu nkilimapakgsin» (Juan 18:36). Pilato “nitu ntalakgalhin xmakglhtakgsnit” wantuku xlimawakakgonit Jesús, pero maski chuna, kakgaxmatnilh latamanin tiku ksitsikgonit chu tlawalh pi kxtokgowakaka kʼkgantum kiwi (Lucas 23:13-15; Juan 19:12-16).
Kstalaninanin chuna tlawakgoy la tlawalh Jesús
6. ¿La limasiyakgolh xapulana kstalaninanin Cristo pi ni xtapakgsikgoy kkakilhtamaku pero xkapaxkikgoy latamanin?
6 Kstalaninanin Jesús akgatekgskgolh tuku xwamputun ni makgtapakgsikan kkakilhtamaku. Nixlakapastakkgolh chu na ni xtlawakgolh tuku lixkajni xtlawakgokan kkakilhtamaku, la umakgolh: lilakgastan anta niku xtlawakan tuku nitlan chu talakgxtumit xalimaxana nema xtlawakan kcirco chu teatros xalak Roma. Xlakata xlakgmakgankgo uma lilakgastan, xkalimawakakan pi nixkaʼakxilhputunkgoy latamanin. Pero uma ni xlikana, xlakan lhuwa xkamakgtayakgoy amakgapitsi latamanin xlakata xlitamakgtayakgolh tuku xmastanit Dios xlakata tlan xlakgtaxtukgolh.
7. 1) ¿Tuku kaʼakgspulalh xapulana kstalaninanin Cristo xlakata ni makgtapakgsikgolh kkakilhtamaku? 2) Kstalaninanin Cristo, ¿la xkaʼakxilhkgoy mapakgsinanin xla política chu xlakata nakaxokgonanikgoy, chu tuku xlakata?
7 Chuna la Jesús, kstalaninanin na kaputsastalaka, wa xkaputsatalanikgoy mapakgsinanin wantiku xkaʼakgskgawikanit chu wa xlakata xkaputsastalanikgoy. Pero kata 56 akxni ay xminita Cristo Pablo katsokgnanilh kstalaninanin Cristo xalak Roma, kamakgpuwantinilh pi «xlilakgachixkuwitkan mapakgsinanin nti liwilakgolh [mapakgsinanin xla política]. Xampi ni tu xʼanalh limapakgsin, wa lapi ni wa Dios». Uma ni wamputun pi Jehová kawili mapakgsinanin, kaj kamaxki talakaskin pi katawilakgolh asta akxni kajwatiya xTamapakgsin namapakgsinan kKatiyatni. Wa xlakata, lu tlan pi apóstol Pablo kastakyawalh kstalaninanin Cristo pi xlakgachixkuwilikgolh mapakgsinanin chu xkaxokgonanikgolh (Romanos 13:1-7; Tito 3:1, 2).
8. 1) ¿La xlilhuwa nakgalhakgaxmatkgo kstalaninanin Cristo mapakgsinanin? 2) ¿La nachuna tlawakgolh xapulana kstalaninanin Cristo chuna la tlawalh Jesús?
8 Maski chuna kaʼakxilhaw, ni paks katikakgalhakgaxmatwi tuku nakinkawanikgoyan mapakgsinanin xla política. Akxni xlimapakgsinkan lakchixkuwin lakatayay tuku wan xlimapakgsin Dios, xlakskujnin Jehová wa xlikgalhakgaxmatatkan xlimapakgsin Dios. Kaʼakxilhwi tuku lichuwinan xlakata xapulana kstalaninanin Cristo libro On the Road to Civilization—A World History (Camino a la civilización. Historia mundial): «Kstalaninanin Cristo wi tuku ni xtlawakgoy tuku xlitlawatkan xwanit latamanin xalak Roma. [...] Xlakpuwankgoy pi komo soldados xlitaxtukgolh xlakatsalamakgolh xtakanajlakan. Ni mapakgsinanin xlitaxtukgoy chu ni xkakninanikgoy mapakgsina». Akxni xalakpuxku xlakkaxtlawananin xtakglhuwitkan judíos kawanikgolh kstalaninanin Cristo pi nialh xlichuwinankgolh xlakata Dios xlakan wankgolh: «Xlakaskinka mpi pulh wa nakkgalhakgaxmataw Dios, ni xawa nchixkuwin» (Hechos 5:27-29).
9. 1) ¿Tuku kamakgtayalh xlakata tsalakgolh kstalaninanin Cristo xalak Jerusalén kata 66 akxni ay xminit Cristo? 2) ¿Tuku xlakata tlan nawanaw pi uma lu tlan liʼakxilhtit?
9 Kstalaninanin Cristo nipara tsinu makgtanukgolh kxtaʼakglhuwitkan políticos chu na ni makgtanukgolh kguerra. Kata 66 akxni ay xminita Cristo, judíos tiku xwilakgolh kJudea nialh tapakgsiniputunkgolh César, chu soldados xalak Roma lakapala stiliwilikgolh Jerusalén. ¿Tuku tlawakgolh kstalaninanin Cristo xalak tama kachikin? Lakapastakkgolh wantuku xkawaninit Jesús xlakata xtaxtukgolh ktama kachikin. Akxni soldados makgxtakgkgolh Jerusalén ni makgas kilhtamaku, latamanin tsalakgolh kkasipijni wanikan Pela, kxakilhtutu kgalhtuchokgo wanikan Jordán (Lucas 21:20-24). Xlakata xlakan ni makgtanukgolh tuku xalak kakilhtamaku, lu tlan liʼakxilhtit wilikgolh xlakata wantiku kstalaninanin Cristo xʼamakgolh wankgoy.
Uma xaʼawatiya kilhtamaku kstalaninanin Cristo ni makgtanukgoy kkakilhtamaku
10. 1) ¿Tuku lu liskujmakgolh xtatayananin Jehová, chu tuku xlakata? 2) ¿Tuku ni makgtanukgoy?
10 Uma xaʼawatiya kilhtamaku, ¿wilakgolh tiku nipara tsinu makgtanukgoy kkakilhtamaku chuna la tlawakgolh xapulana kstalaninanin Cristo? Wilakgolh, xtatayananin Jehová chuna tlawakgoy. Umakgolh xaʼawatiya kilhtamaku lu lichuwinamakgolh pi xTamapakgsin Dios nalimin takaksni, natlaway pi tlan natawilakan chu xliputum kilhtamaku lipaxuw natawilakgoy tiku tlawakgoy tuku xaʼakgstitum (Mateo 24:14). Pero xlakata taʼakglhuwit nema kgalhikgoy kachikinin, xlakan nipara tsinu makgtanukgoy.
11. 1) ¿Tuku ni tlawakgoy xTatayananin Jehová chu tuku tlawakgoy tiku pulalinkgoy nixaxlikana takanajla? 2) ¿Tuku ni tlawakgoy xtatayananin Jehová akxni makgapitsi latamanin makgtanukgoy kpolítica?
11 Wantiku pulalinkgoy nixaxlikana takanajla nichuna tlawamakgolh, xlakata xlakan makgtanukgoy kpolítica. Kmakgapitsi kachikinin wi tiku makgtayakgo xlakata nachan xlimapakgsina, o achatum ni makgtayakgoy xlakata ni nachan xlimapakgsina. Chu makgapitsi wi tuku lakgatayakgoy kpumapakgsin. Amakgapitsi pulalinanin xla takanajla kawanikgoy políticos pi kakamakgtayakgolh xlakata tuku tlawaputunkgoy. Pero xtatayananin Jehová ni makgtanukgoy kpolítica. Na ni kawanikgoy amakgapitsi latamanin pi ni kamakgtanukgolh kʼakgtum partido, nachuna akxni wi tiku tawilaputun xlimapakgsina o wantiku namakgtayaputunkgoy xlakata natawila xlimapakgsina. Jesús lichuwinalh pi kstalaninanin ni xʼamakgo makgtapakgsikgoy kkakilhtamaku, wa xlakata xtatayananin Jehová ni makgtanukgoy kpolítica.
12. ¿Tuku kitaxtunit xlakata nixaxlikana takanajla makgtanu xtakglhuwit kakilhtamaku?
12 Chuna la lichuwinalh Jesús, kachikinin lhuwa guerras tlawakgonit. Maski watiya akgtum lanka kachikin tapakgsikgoy, lamakgni (Mateo 24:3, 6, 7). Xpulalinanin xla takanajla xlenkgalhin makgtayakgo akgtum kachikin o wi tiku tatayakgoy chu kamakgpuwantini tiku kastalanikgoy pi nachuna katlawakgolh. ¿La kitaxtunit? Tiku na watiya takanajla kgalhikgoy lamakgninit kaj xlakata xalak alakatunu kachikinin o tanu xkilhtsukutkan. Uma tuku tlawakgoy, xlimapakgsin Dios wan pi nitlan (1 Juan 3:10-12; 4:8, 20).
13. ¿Tuku limasiyay pi xtatayananin Jehová ni makgtanukgoy kxtakglhuwitkan kakilhtamaku?
13 Pero xtatayananin Jehová nipara tsinu makgtanukgoy xtaʼakglhuwitkan uma kakilhtamaku. La Atalaya xla marzo kata 1940 lichuwinalh: «Putum wantiku tatayakgo kiMalanakan ni katimakgtanukgolh akxni kachikinin tlawakgoy guerra». Xtatayananin Jehová chuna tlawamakgolh la wan uma revista, maski tanu xkachikinkan o tanu la wilakgolh. Ni mastakgoy talakaskin pi política, chu guerras nema kamapitsi latamanin xla uma kakilhtamaku natlaway pi nialh linatalan nalaʼakxilhkgoy tiku wilakgolh xlikalanka katiyatni. «Namastalankikgoy [o namalakgskupakgoy] xʼespadajkan chu nalitlawakgoy arado chu xlanzas nalitlawakgoy tuku liʼakgsitkan kiwi.» Xlakata ni makgtapakgsikgoy kkakilhtamaku, nialh makgtlawakgo guerra (Isaías 2:3, 4; 2 Corintios 10:3, 4).
14. ¿Tuku kaʼakgspulanit xtatayananin Jehová xlakata ni makgtapakgsikgoy kkakilhtamaku?
14 ¿La kakitaxtuninit xlakata ni makgtapakgsikgoy kkakilhtamaku? Jesús wa: «Kumu ni xala katuxawat wixin, [...] wa cha nkalixkajniyan nti xala katuxawat» (Juan 15:19). Lhuwa xtatayananin Jehová kalitamaknukanit kpulachin xlakata skujnanikgoy Dios. Makgapitsi kamakgapatinankanit, chu asta kamakgnikanit, chuna la kaʼakgspulalh kstalaninanin Cristo kxapulana siglo. Chuna katlawakan xlakata «xmalana katuxawat» Satanás ni kaʼakxilhputun xlakskujni Jehová, wantiku ni makgtapakgsikgoy kʼuma kakilhtamaku (2 Corintios 4:4; Apocalipsis 12:12).
15. 1) ¿Tuku nakaʼakgspula kachikinin? 2) ¿Tuku xlakata lu xlakaskinka ni namakgtapakgsiyaw kkakilhtamaku?
15 Akinin xtatayananin Jehová lipaxuwayaw pi ni makgtapakgsiyaw kkakilhtamaku, xlakata putum kachikinin nakamasputukan kʼArmagedón (Daniel 2:44; Apocalipsis 16:14, 16; 19:11-21). Akinin ni kintikamasputukan xlakata ni makgtapakgsiyaw kkakilhtamaku. Akinin litaxtuyaw akgtum kachikin tiku makxtum wilakgolh xlikalanka katiyatni chu ni makgatsankgananiyaw xTamapakgsin Dios xalak akgapun. Xlikana, xlakata ni makgtapakgsiyaw kkakilhtamaku, max nakinkamamaxanikanan chu nakinkaputsastalakanan. Pero uma nasputa nialh makgas kilhtamaku, xlakata uma xalixkajni kakilhtamaku nema mapakgsiy Satanás xliputum kilhtamaku namasputukan. Pero, wantiku skujnikgoy Jehová nalatamakgoy xliputum kilhtamaku anta kxaʼakgstitum xasasti kakilhtamaku nema namapakgsinan xTamapakgsin Dios (2 Pedro 3:10-13; 1 Juan 2:15-17).
Wantuku talichuwinalh
• ¿La limasiyalh Jesús tuku wamputun “ni katuxawat [o kakilhtamaku] ntapakgsikan”?
• ¿La xʼakxilhkgoy xapulana kstalaninanin Cristo xlakata 1) la lakapastakkgoy latamanin xla uma kakilhtamaku? 2) mapakgsinanin xla política? 3) xlakata kaxokgonanikan mapakgsinanin?
• ¿La limasiyakgonit xtatayananin Jehová xala uku pi ni makgtanukgoy xtakglhuwitkan kakilhtamaku?
[Dibujo xla página 165]
Jesús lichuwinalh pi xla chu xtamakgalhtawakgen “ni xmakgtapakgsikgoy kkakilhtamaku”