Nialh makgas nasputa tapatin
Max akgtum kilhtamaku wix kgalhskinkanita: «¿Tuku xlakata lu lhuwa tapatin anan kkakilhtamaku?». Ay akglhuwa mil kata kristianos patinamakgolh xlakata guerra, talimaxkgen, akxni wi tuku masputunan chu katlawanikan nitlan tiku nitu tlawakgonit, tajatat chu lhuwa nikgokan. Akgtum ciento kata nema titaxtunita, tapatin tlakg talhuwinit. ¿Pi namin kilhtamaku akxni nasputa tapatin?
Chuna xla, nasputa, chu nialh makgas. Xtachuwin Dios, wa Biblia, kinkawaniyan: «Porque ti laklixkajnit lakchixkuwin astan nakamasputukgokan [...]. Pero ti laktlan takatsij ixlakan nawan ama lilakgatit pulataman xlakan ana snun lipaxaw natalatamaj». ¿La xlimakgas nalatamakgoy? Wa Biblia wan: «Xalaktankswa, ixlakan nawan ama lipaxaw pulataman nima Dios nakamaxki ixkamanan kanikxniwa natalatama ana» (Salmo 37:9, 11, 29).
Akxni Dios namasputuy tuku nitlan chu tapatin, Katiyatni xakalipaxaw nawan, anta niku kristianos tlan xalipaxaw nalatamakgoy putum kilhtamaku chu nialh katitatatlakgolh. Wa Biblia lichuwinan pi Dios «na paks naxakanikgo Dios xlakgpixtajatkan na nialh katiʼanalh linin chu na nialh katiʼanalh talipuwan, ni mpala wa ntatasa chu na ni mpala wa ntakatsanajwat xampi wa xlipaks katuwaj wantu xʼanan xakgasiyaj, paks lakgsputli» (Apocalipsis 21:4).
Anta kxakasasti pulataman, lhuwa kristianos tiku ay nikgonita nakamalakastakwanikan chu nalipaxuwakgoy tama tasikulunalin. Biblia malaknuy: «Mpi nalakastakwanankgoy ninin wanti xalakwan chu nti ni xalakwan» (Hechos 24:15). Wa xlakata, Jesucristo wanilh uma tachuwin chatum chixku tiku lixkani xlikatsiy pero kanajlanilh Jesús chu nitlan xlimakgkatsi xlakata tuku nitlan xtlawanit: «Nakintatawilayapi kxakalipaxaw katiyatni» (Lucas 23:43, NM).
¿Tuku xlakata tsukulh tapatin?
Dios xlakapastaknit pi kristianos lu tlan xlatamakgolh chu xpaxuwakgolh, ¿tuku xlakata mastalh talakaskin pi kaʼanalh tapatin? Chu, ¿tuku xlakata chuntiya mastama talakaskin lu makgas kaʼanalh tapatin?
Akxni Dios kamalakatsukilh Adán chu Eva, lu tlan katlawanika xmaknikan chu lu tlan katlawanika xtalakapastaknikan. Nachuna kawililh kʼakgtum xakalipaxaw katiyatni chu kamaxkilh akgtum lu tlan taskujut. Biblia wan: «Xampi wa xlipaks ntu malakatsukulh Dios luwa tlan» (1 Timoteo 4:4). Komo xlakgachixkuwilikgolh wantiku Kamalakatsukilh, ni makglakgalhinanin xwankgolh xkamanan chu xlikalanka Katiyatni xakalipaxaw xwa anta niku kristianos tlan xlatamakgolh putum kilhtamaku, xpaxuwakgolh chu ni xkgalhikgolh takglhuwit.
Dios kamaxkilh Adán chu Eva tuku tlan nema putum akinin na kgalhiyaw: tlan xlaksakkgolh tuku xtlawaputunkgolh. Ni katlawaka la akgtum carro nema kaj an niku linkan. Xlakata chuntiya xpaxuwakgolh xlakaskinka xatlan xlimaklakaskinkgolh uma tuku Dios xkamaxkinit, uma xwamputun xlakgachixkuwikgolh xlimapakgsin Dios. Xtachuwin Dios wan: «Snun talipaxaw talamana ti tamakgantaxti ixtachiwin y xliwakg ixnakujkan taputsa la natamakgapaxawa Dios» (Salmo 119:2). Komo nitlan xlaksakkgolh tuku natlawakgoy lu nitlan xʼama kaʼakgspulay, xlakata kristianos ni katlawaka xʼakstukan nakapulalinkan, katlawaka xlakata wa Dios nakapulalin. Biblia lichuwinan: «Chatum chixku ni tapakgsiniy xtiji. Ni lakgchan chixku napulalin xlatamat» (Jeremías 10:23).
Lu nitlan, xapulana kinatlatnikan lakpuwankgolh pi chuntiya xalipaxaw xlatamakgolh maski nixtapakgsinikgolh Dios. Pero akxni lakgmakgankgolh xtamapakgsin Dios makgatsankgakgolh xtasikulunalin Dios chu nachuna ktalekgalhin tawilakgolh. Chuna tsukukgolh makgatsankgakgoy xlitliwakgakan chu tsukukgolh kgolonkgoy chu alistalh o astan nikgolh. Chu xlakata akinin xkamanan kinkamatitaxtinikgon talekgalhin chu na niyaw (Romanos 5:12).
Wantuku tlakg xlakaskinka: xtamapakgsin
¿Tuku xlakata Dios ni tunkun kamasputulh Adán chu Eva chu katlawapa atanu kristianos? Xlakata xlakatayamaka xtamapakgsin Dios. Wa uma wantuku xlimasiyaputunkan: ¿tiku mininiy namapakgsinan chu tiku tlakg tlan mapakgsinan? Chu na xtamasiyaputun, ¿pi tlan nakitaxtuniy chixku komo namakgxtakga Dios? Dios kamaxkilh kilhtamaku xlakata xakstukan xtapakgsikgolh chu xtlawakgolh tuku xtlawaputunkgolh, chuna Dios xʼama limasiyay komo tlakg tlan xakstukan nakamapakgsikan o tlakg tlan natapakgsinikgoy Dios. Xʼama talakaskin lhuwa kilhtamaku xlakata tlan xlitsakgsakgolh tipalhuwa tamapakgsin, tipalhuwa la natawilakgoy, tipalhuwa la tlan natlajakan tumin, chu tipalhuwa takanajla chu niwa Dios xkapulalilh.
¿La kakitaxtunima? Uma akglhuwa mil kata nema titaxtunita kristianos akxilhkgonit xalaklixkajni tuku lanit. Chu uma akgtum ciento kata nema titaxtunitta tlakg nitlan tuku lanit, xlakata akglhuwa millón kristianos nikgolh anta kxliʼakgtiy guerra nema tatlawalh xlikalanka kakilhtamaku. Chu akgtum ciento millón kristianos tiku na nikgolh akxni lalh tanu tanu guerras. Chu uku lhuwa takgaxmata xlakata katiwa lakatsalay limapakgsin chu tiku ni machokgoy xtasitsi. Lu tlakg talhuwinit tiku maklakaskinkgoy drogas. Tajatat nema kachipay tiku tanu tanu tatalakgxtumiy, tlakg talhuwima. Kata kata akglhuwa millón kristianos kamakgni tatsinksni chu nikgoy xlakata tatatlakgoy. Xatlan tastakyaw nema mastakan kfamilia nialh katlawanikan kuenta. Lu liwana tasiyay pi xtamapakgsin chixku nila namasputuy putum tama takglhuwit. Nila masputukgoy takgolot, tajatat chu kalinin.
La lichuwinanit Biblia chuna wilaw uku. Xtachuwin Dios limasiyay pi la uku, «awatiya kilhtamaku» xla uma kakilhtamaku «luwa skalajwa namin kilhtamaku». Chu chuna kgantaxtuma la wan Biblia: «Wampi wanti ni lakwan nchixkuwin chu nti akgskgawinankgoy, kax nataliwakanikgoy» (2 Timoteo 3:1-5, 13).
Nialh makgas nasputa tapatin
Putum likxilhtit limasiyay pi nialh makgas nakamasputukan putum kristianos tiku litsakgsamakgolh xakstu natapakgsikgoy. Liwana talimasiyanit pi xtamapakgsinkan lakchixkuwin nitlan kakitaxtunima chu kaxmanwa xtamapakgsin Dios tlan nalimin takaksat, tapaxuwan, nialhti katitatatlalh chu nikxni nanikan. Wa xlakata uma kilhtamaku nema Jehová mastama talakaskin na anan tuku nitlan chu tapatin nialh makgas namasputukan. Nialh makgas Dios nakalaktlawaniy tuku tlawamakgolh lakchixkuwin chu skan namasputuy uma xalixkajni kakilhtamaku.
Makgasa Biblia xwanit: «Kxkilhtamaku tama mapakgsinanin [mapakgsinaninin nema wilakgolh uku] wa Dios xalak akgapun nawiliy akgtum tamapakgsin [kʼakgapun] nema nikxni katisputli. Chu tama tamapakgsin [...] nakalakxpulay chu nakamasputuy putum tamapakgsin [mapakgsinanin xala uku] chu tama tamapakgsin xliputum kilhtamaku natawilay» (Daniel 2:44). Tamasiy nema tlakg xlakaskinka wi kBiblia wa pi natamalankipara xlilanka Jehová chu nalimaklakaskin xTamapakgsin xalak akgapun. Jesús lichuwinalh tuku xlakaskinka nema xʼama litasiyay «awatiya kilhtamaku», uma tuku wa: «Na xapulh taliʼakgchuwinanit nawan xlikatlanka katuxawat yuma xatlan tamakatsinin xla tapakgsin, lakimpi paks nakgaxmatkgoy yuma ntalulokgtat xlipaks akgmakgat chixkuwin, akxniku nchu nachin xlikgatsputni nkatuxawat» (Mateo 24:14).
Akxni namin lisputni, ¿tiku nalakgtaxtukgoy? Biblia wan: «Tiku xalakatitum wa natalatamay kkatiyatni chu tiku nitu tlawakgonit wantiku anta nalatamakgoy. Chu wantiku lixkajni xtayat, nakamapanukan kkatiyatni, chu wantiku akgskgawinankgoy, nakapulhuakxtukan» (Proverbios 2:21, 22). Kristianos wantiku xalakatitum wa tiku katsinikgoy tuku xtalakaskin Jehová chu chuna tlawakgoy. Jesucristo wa: «Wacha yuma liwi latamat wantu xaliankgalhin mpi nalakgapaskgoyan wix mintastum Dios talulokgtat chu Jesucristo, wanti wix malakgachanita» (Juan 17:3). Xlikana, «na nalakgsputa nkatuxawat chu xtaxkgonalakan, wa mpi wanti ntlaway xtalakaskin Dios, xaliankgalhin nalatamay» (1 Juan 2:17).
Tatsokgni xalak Biblia xahebreo, NM: Traducción del Nuevo Mundo de las Santas Escrituras (con referencias) Kaj watiya Salmos takilhtinit: Salmos Ixtatlincan ti Talipawan Dios la xtachuwinkan xalak Papantla (tatsokgni xala uku) Tatsokgni xalak Biblia xagriego, takilhtinit kBiblia: Hua Xasasti Talaccaxlan la xtachuwinkan xalak Sierra (tatsokgni xala uku)