SECCIÓN 13
Xatlan mapakgsinanin chu ni xatlan mapakgsinanin
Kachikin Israel pulaktiy tamapakgsin wa, chu lhuwa xmapakgsinanin makgxtakgkgolh Jehová. Babilonios masputukgo Jerusalén
AKXNI Salomón xmakgxtakgnita Jehová, Israel pulaktiy tamapakgsin wa chuna la xlichuwinanit Jehová. Tiku tawi ktamapakgsin wa Rehoboam, lu nitlan kalikatsinilh kachikin asta pulakkaw laklanka familia tiku xwilakgo knorte xakstukan tapakgsikgolh. Akgtiy laklanka familia, tamapakgsin xalak Judá wankgolh. Xlakan ni makgxtakgolh xtamapakgsin xfamilia David nema xwi kJerusalén.
Xlakata xmapakgsinanin ni kgalhakgaxmatnankgolh chu ni lipawankgolh Dios, uma akgtiy tamapakgsin ni makgas kilhtamaku kgalhikgolh takaksni chu na ni lhuwa tuku kgalhikgolh. Pero tiku tlakg nitlan likatsilh wa tamapakgsin nema xwi knorte xalak Israel, xlakata akxni tsukulh uma tamapakgsin xmapakgsinanin matsukikgolh nixaxlikana takanajla. Chu maski Dios kamalakgachanilh palakachuwinanin la Elías chu Eliseo tiku malakastakwanikgolh makgapitsi latamanin, umakgolh mapakgsinanin ni kuenta tlawakgolh. Alistalh Dios mastalh talakaskin pi Asiria xkamasputulh Israel.
Max akgtum ciento kata titaxtulh, tamapakgsin xalak Judá na kamalakgaxokgelh Dios. Xpalakachuwinanin Dios makatsinikgolh mapakgsinanin tuku xʼama kaʼakgspula pero kaj makgapitsi kgaxmatkgolh chu kamakgtayaputunkgolh kachikin. Akgtum liʼakxilhtit, mapakgsina Josías liwana lakapastakli nakamasputu ídolos chu kaxtlawapa xtemplo Jehová. Chu akxni xkaxtlawamaka templo tekgska akgtum tatsokgni xla kxLimapakgsin Moisés. Uma tlawalh pi Josías tlakg xmasputuputulh ídolos.
Pero, wantiku tawilakgolh xlakgxokgo Josías ni chuna tlawakgolh la tlawalh. Wa xlakata Jehová mastalh talakaskin pi babilonios xakgchipakgolh Judá chu xmasputukgolh Jerusalén chu xtemplo. Tiku lakgtaxtukgolh kachilinka kBabilonia, chu Dios xlichuwinanit pi xʼama titaxtu tutupuxamakaw kata xlakata tlan xtaspitkgolh kJerusalén. Uma tutupuxamakaw kata niti xlatamakgolh kJudá.
Asta akxni xchilh Mapakgsina tiku xwankanit pi namin tiku Mesías xʼama litaxtu, ni chatum xalak xfamilia David xʼama mapakgsinan. Xlakata tuku tlawakgolh mapakgsinanin tiku taxtukgolh kxfamilia David limasiyakgolh pi latamanin nila mapakgsinankgo. Wantuku xaxlikana, kajwatiya Mesías tlan namapakgsinan. Wa xlakata Jehová wanilh xaʼawatiya mapakgsina: «Ktamapakgsin [...] niti katitawi asta akxni namin ama tiku lakgchan namapakgsinan, chu wa nakmaxki» (Ezequiel 21:26, 27).
(Takilhtinit 1 Reyes, 2 Reyes, 2 Crónicas capítulo 10 asta 36 chu Jeremías 25:8-11.)