Makgnikan Cristo

JESÚS akgtutu kata a itat xlichuwinama xtachuwin Dios chu xkatsi pi xtalakatsuwinit nasputa xlatamat kKatiyatni. Tiku xpulalinkgo xtakanajlakan judíos xmakgniputunkgo, pero xkapekuanikgo latamanin xlakata xwankgo pi Jesús palakachuwina xwanit. Wa xlakata, Satanás tamaknunilh Judas nitlan talakapastakni xlakata kstamakgalh Jesús chu na xʼapóstol xwanit. Tiku xpulalinkgo takanajla maxkikgolh puxamakaw tumin xaplata.

Xlakgchanit katsisni akxni xtlawakan Pascua chu Jesús xkatatamakxtuminit xʼapóstoles. Akxni xwaninita kaʼalh Judas, Cristo uma tuku lakkaxwililh: Taway xla kiMalanakan. Tiyalh aktsu kaxtalanchu, tlawalh oración chu kamaxkilh kgalhkawitu xʼapóstoles. Alistalh kawanilh: «Wa yuma nkintiyatliwa, wantu wixin mimpalakatakan natamastay. Wa yuma ntlawamaw nchu, ankgalhin natlawayatit nakililakapastakatit». Alistalh matitaxtilh vino chu wa: «Wa yuma ntu ntajuma mpukgotnu, wa yuma xasasti talakkaxlan wantu lilakkaxlay nkinkgalhni» (Lucas 22:19, 20).

Uma xaʼawatiya katsisni Jesús lhuwa tuku kamasiyanilh xʼapóstoles. Na kamaxkilh xasasti limapakgsin: lu xlikana xlapaxkikgolh. Asta wa: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit nchatunu chatunu» (Juan 13:34, 35). Kawanilh pi ni xlipuwankgolh xlakata tuku xʼama akgspula chu alistalh tlawalh lhuwa oración xpalakatakan. Xaʼawatiya, kilhtlinikgolh Dios xlakata nalimalankikgo chu ankgolh kjardín nema wanikan Getsemaní.

Anta Jesús tatsokgostalh chu malakkinilh xnaku Jehová. Pero kaj lakapala, chinkgolh soldados, lakchixkuwin chu sacerdotes xlakata nachipakgo. Xlakata nalakgapaskgo Jesús, Judas limaklakaskilh tuku xkawaninit pi natlawa xlakata tlan xlakgapaskgolh: tsukli o sputli. Soldados chipakgolh Cristo, chu apóstoles tsalakgolh.

Jesús wa kxlakatin xalakpuxku tiku xlakkaxtlawakgo xtaʼakglhuwitkan judíos pi xKgawasa Dios xwanit. Tiku xlakkaxtlawakgo taʼakglhuwit wankgolh pi lu lixkajni tuku wa, wa xlakata wankgolh pi xlakgchan namakgnikan. Alistalh linkgolh kxlakatin Poncio Pilato, mapakgsina xalak Roma. Xla akxilhli pi Jesús nitu xtlawanit, pero maski chuna, tlawalh tuku wanikgolh kachikin xlakata xlakan lu xlakaskinkgo pi kamakgnika.

Cristo linka asta kʼGólgota chu anta soldados xtokgowakakgolh kkgantum kiwi. Maski kakuwani xwanit lakapala tsiswalh. Ama kakgotanun o smalankgan akxni nilh Jesús tachikilh tiyat. Jesús tamaknuka niku xlakalhukikanit chiwix chu lichali, sacerdotes liwana malakchuwakgolh chu putsakgolh tiku nakuentajtlawakgo. ¿Antiya xʼama tamakgxtakga Jesús? Ni, xlakata xʼama la tuku tlakg xalanka nila tamakanajla.

(Takilhtinit kMateo capítulo 26 chu 27, kMarcos capítulo 14 chu 15, kLucas capítulo 22 chu 23 chu kJuan capítulo 12 asta 19.)