Apóstoles ni pekuankgolh akxni lichuwinankgolh Dios

AKXNI xtitaxtunitta akgkaw kilhtamaku akxni Jesús alh kʼakgapun, tamakxtumikgolh 120 kstalaninanin Jesús kʼakgtum chiki kJerusalén kPentecostés kata 33, xlakata natlawakgo pascua. Kaj lakapala takgaxmatli la un, chu kstalaninanin tsukulh chuwinankgo tachuwin nema nixkatsinikgo. ¿Tuku xlama? Dios xkamaxkinit xespíritu santo.

Lhuwa xala ktanu tanu kachikinin xminkgonit kJerusalén xlakata natlawakgo pascua. Putum kaks lakawankgolh akxni akxilhkgolh pi kstalaninanin Jesús tlan xkatachuwinankgo kxtachuwinkan. Xlakata Pedro tlan xkawanilh tuku xlakata chuna xlama, kamalakapastakalh pi palakachuwina Joel xwanit pi Dios xʼama kamaxki xespíritu xlakskujnin chu kajwatiya xlakan wi tuku tlan xtlawakgolh (Joel 2:28, 29). Xlakata kamaxkika espíritu santo liwana xlitasiya pi la uku congregación xla kstalaninanin Cristo wa chu ni Israel, uma congregación xkasikulunatlawa Dios. Wa xlakata tiku kskujnaniputunkgolh Dios xtalakaskin pi kstalaninanin Cristo xwankgolh.

Pero, tiku ksitsinikgo Cristo tsukukgolh kaputsastalanikgo kstalaninanin. Akgtum kilhtamaku makgapitsi katamaknuka kpulachin pero kkatsisni milh chatum ángel, kalakgmaxtulh chu kawanilh pi chuntiya xlichuwinankgolh Dios. Akxni xkgakgalh, tanukgolh ktemplo chu tsukukgolh lichuwinankgo Jesús. Tiku xpulalinkgo takanajla lu sitsikgolh chu kawanikgolh pi nialh xlichuwinankgolh. Pero apóstoles ni pekuankgolh chu kgalhtinankgolh: «Xlakaskinka mpi pulh wa nakkgalhakgaxmataw Dios, nixawa nchixkukuwin» (Hechos 5:28, 29).

Tiku nixkaʼakxilhputunkgo ni chuntiya tamakgxtakgkgolh, wata tlakg tsukulh kaputsastalanikgo. Makgapitsi judíos limawakakgolh Esteban pi nitlan tuku wa chu aktalamakgnikgolh. Na anta xya Saulo xalak Tarso akxni makgnika Esteban, chatum kgawasa tiku nixkaʼakxilhputun kstalaninanin Cristo. Akxni xmakgnikanita Esteban Saulo alh kDamasco xlakata nakatamaknu kpulachin wantiku xkatakgsli. Pero ktiji malakgatsilh akgtum xkgakganat nema taxtucha kʼakgapun. Chu kgaxmatli tachuwin nema xwani: «Saulo, Saulo, ¿tuku xlakata kinputsastalanipat?». Xlakata nixkatsi tuku xwan, kgalhskininalh: «¿Tiku wix?». Chu tiku xchuwinama kgalhtinalh: «Akit Jesús» (Hechos 9:3-5, NM).

Xliʼakgtutu kilhtamaku Jesús malakgachalh Ananías chatum kstalanina xlakata xmalakawanipa. Saulo tamunulh chu lu lhuwa tsukulh lichuwinan Dios. Alistalh litalakgapasli apóstol Pablo, chatum tiku lu lhuwa xlichuwinan Dios.

Xapulana, kstalaninanin Cristo kajwatiya xkalitachuwinankgo xTamapakgsin Dios tiku judíos xwankgonit chu samaritanos. Pero akgtum kilhtamaku, chatum ángel tasiyanilh Cornelio chatum xapuxku soldado xalak Roma tiku xkanajlani xaxlikana Dios chu matasaninalh apóstol Pedro. Pedro katamilh makgapitsi kstalaninanin Jesús chu litachuwinalh Dios Cornelio chu xfamilia. Akxni xchuwinamajku apóstol, umakgolh kanajlanin makglhtinankgolh espíritu santo chu Pedro wa pi xkalimunuka kxtukuwani Jesús. Akxni ama kilhtamaku putum latamanin maski tanu tanu xkachikinkan tlan xmakglhtinankgolh latamat nema ni kgalhi xlisputni. Xlikana, xalakwan xalaksasti xlakata tamapakgsin xʼamaka kalitachuwinankan putum latamanin.

(Takilhtinit kHechos 1:1–11:21.)