¿Tuku xlakata nilh Jesús?

Jesús nilh xlakata tlan nalatamayaw putum kilhtamaku (Juan 3:16)

Akgtutu kilhtamaku akxni xninita Jesús, makgapitsi lakpuskatin akxilhkgolh pi nialh xwi Jesús niku xmaknukanit. Jehová xmalakastakwaninit.

Alistalh Jesús katasiyanilh xʼapóstoles tiku xʼamigos xwankgonit.

Jesús ni xkgalhi xmakni chuna la akinin akxni lakastakwanalh. Dios malakastakwanilh Jesús la espíritu chuna la ángeles. Kstalaninanin akxilhkgolh akxni alh kʼakgapun. La uku chatum tliwakga espíritu nema ni niy.

Dios malakastakwanilh Jesús chu mapakgsina tlawalh kxTamapakgsin (Daniel 7:13, 14)

Jesús mastalh xlatamat xlakata nakalakgmaxtu ktalakgalhin chu klinin putum latamanin (Mateo 20:28). Xlakata tamakamastalh, Dios kinkawaniyan pi nakinkamaxkiyan latamat nema ni kgalhi xlisputni.

Jehová laksakli Jesús xlakata natawila xlimapakgsina kʼakgapun chu namapakgsinan kKatiyatni. Pero ni xakstu katimapakgsinalh. Natamapakgsinankgo 144,000 latamanin tiku nakamalakastakwanikan chu nalatamakgo kʼakgapun. Uma tamapakgsin wa xTamapakgsin Dios xalak akgapun (Apocalipsis [Revelación] 14:1-3).

Uma xTamapakgsin Dios natlawa pi Katiyatni akgtum paraíso nawan. Ni katianalh guerras, tuku nitlan, tatsinksni chu tiku nitu kgalhikgo. Latamanin xatapaxuwan nalatamakgo (Salmo 145:16).