¿Tiku Dios?

1. ¿Tuku xlakata nakakninaniyaw Dios?

Dios Malakatsukilh putum tuku anan. Putum kilhtamaku wi chu nikxni katinilh (Salmo 90:2). Wa kinkawaniyan tlan tamakatsin nema wi kBiblia (1 Timoteo 1:11). Xlakata kinkamaxkin latamat, kaj wa lakgchan naskujniyaw chu nakakninaniyaw. (Kalikgalhtawakga Apocalipsis [Revelación] 4:11.)

2. ¿La tasiya Dios?

Nipara chatum lataman akxilhnit Dios xlakata xla espíritu, xla lu lanka, ni chuna la akinin xlakata kgalhiyaw kimaknikan (Juan 1:18; 4:24). Pero, tlan nakatsiyaw la likatsi akxni akxilhaw tuku tlawanit. Akgtum liʼakxilhtit, lhuwa tawakat chu xanat nema katlawanit kinkalimasiyaniyan pi kinkapaxkiyan chu lu skgalala. Nachuna, xlakata akgapun lu lanka limasiya pi kgalhi lhuwa litliwakga. (Kalikgalhtawakga Romanos 1:20.)

Na tlan nalakgapasaw Dios komo nalikgalhtawakgayaw Biblia. Kinkamasiyaniyan la kalikatsini latamanin, tuku lakgati chu tuku ni lakgati, chu tuku tlawa akxni wi tiku ni kgalhakgaxmata. (Kalikgalhtawakga Salmo 103:7-10.)

3. ¿Kgalhi xtukuwani Dios?

Jesús wa: «KinTlatikan nti wilapi nkakgapun, katamasantujlilh mintukuwini» (Mateo 6:9). Maski lhuwa tuku lilakgapaskan kgalhi xtukuwani. Kmakgapitsi tachuwin max tanu tanu la wankan. Kxaʼespañol wankan Jehová, maski na tlan wankan Yavé. (Kalikgalhtawakga Salmo 83:18 [82:19 kʼatanu biblias].)

Kmakgapitsi biblias, ni wilikanit xtukuwani chu kaj wilikanit tuku lilakgapaskan, la Dios o Puchina. Pero akxni tsokgka Biblia xtukuwani Dios xwilikanit akgtujun mil. Akxni Jesús xkamasiyani latamanin xlakata Dios maklakaskilh xtukuwani. (Kalikgalhtawakga Juan 17:26.)

Kaʼakxilhti video ¿Kgalhi xtukuwani Dios?

4. ¿Kinkapaxkiyan Dios?

Komo Jehová xlikana kinkapaxkiyan, ¿tuku xlakata masta talakaskin kaʼanalh lhuwa tapatin? Makgapitsi lakpuwankgo pi kinkamakgapatinanan xlakata kaj kinkaliʼakxilhan. Pero uma ni xlikana. (Kalikgalhtawakga Santiago 1:13.)

Jehová kinkamaxkinitan talakaskin xlakata nalaksakaw tuku natlawayaw kkilatamatkan. Chu akinin kililaksakatkan naskujniyaw (Josué 24:15). Pero lhuwa latamanin, laksakkgo tuku nitlan chu wa xlakata anan lhuwa tapatin. Pero Jehová nitlan limakgkatsi uma tuku nitlan tlawakan. (Kalikgalhtawakga Génesis 6:5, 6.)

Xlakata Jehová kinkapaxkiyan chu lakaskin pi kalipaxuwaw latamat, nialh makgas namasputu takatsanajwat chu tuku nitlan. Pero katsi tuku xlakata mastama talakaskin kaʼanalh tapatin. Ktakgalhtawakga 8 naʼakxilhaw tuku xlakata. (Kalikgalhtawakga 2 Pedro 2:9 chu 3:7, 13.)

5. ¿La tlan natalakatsuwiniyaw Dios?

Jehová kinkamaxkiyan talakaskin natlawaniyaw oración xlakata nalakgtalakatsuwiyaw. Kinchatunukan kinkapaxkiyan (Salmo 65:2; 145:18). Nachuna, kinkatapatiyan chu katsi pi akinin liskujaw xlakata natlawayaw xtalakaskin maski min kilhtamaku nila makgantaxtiyaw. Wa xlakata, maski makglakgalhinanin akinin tlan xʼamigo Dios nawanaw. (Kalikgalhtawakga Salmo 103:12-14 chu Santiago 4:8.)

Xlakata kinkamaxkin kilatamatkan, Dios lakgchan kaj wa lu napaxkiyaw (Marcos 12:30). Limasiyayaw pi paxkiyaw akxni lakgapasaw chu kgalhakgaxmataw xlimapakgsin. Chu xlakata chuna tlawayaw, tlakg tlan natalalinaw. (Kalikgalhtawakga 1 Timoteo 2:4 chu 1 Juan 5:3.)