¿Tuku xlakata chuntiya nalikgalhtawakgaya Biblia?

1. ¿La namakgtayayan chuntiya nalikgalhtawakgaya Biblia?

Xlikana, uma tuku akxilhwi xlakata tuku pulana masiya Biblia tlawalh pi tlakg napaxkiya Jehová. Pero, talakaskin tlakg namastakaya uma tapaxkit (1 Pedro 2:2). Tlan namakglhtinana latamat nema ni kgalhi xlisputni pero talakaskin nalikgalhtawakgaya xTachuwin xlakata natalakatsuwiniya Jehová. (Kalikgalhtawakga Juan 17:3 chu Judas 21.)

Chuna la tlakg nakatsinitilhaya xlakata Dios tlakg natatliwakglha mintakanajla, chu chuna namakgapaxuwaya (Hebreos 11:1, 6). Takanajla kinkamakgtayayan namakgxtakgaw tuku nitlan chu nalakgpaliyaw kilatamatkan. (Kalikgalhtawakga Hechos 3:19.)

2. ¿La tlan nakamakgtayaya amakgapitsin?

Max nakawaniputuna amakgapitsin tuku katsinipat, xlakata kimputumkan tunkun lichuwinamputunaw akxni wi tuku katsiyaw. Chuna la tlakg nakatsinitilhaya, nakatsiniya la nalimaklakaskina Biblia xlakata nalichuwinana Jehová chu xatlan tamakatsin nema lakaskin pi kakatsikgolh latamanin. (Kalikgalhtawakga Romanos 10:13-15.)

Tlan xkalitachuwinanti mifamilia chu miʼamigos. Tlan kakalikatsini chu ni kakalikgalhkgamananti. Ni kakawani pi nitlan tuku kanajlakgo, kakalitachuwinanti tuku Dios lakpuwanit natlawa. Kalakapastakti pi chuna la nalikatsiya wa tuku tlakg namakgtayanan chu ni wa tuku nawana. (Kalikgalhtawakga 2 Timoteo 2:24, 25.)

3. ¿La tlan natalalipina Dios?

Akxni nalikgalhtawakgaya Biblia tlakg natatliwakglha mintakanajla chu tlan natsukuya talalipina Jehová. Wix tlan nalitaxtuya la chatum xalak xfamilia Dios. (Kalikgalhtawakga 2 Corintios 6:18.)

4. ¿Tuku namakgtayayan tlakg natatliwakglha mintakanajla?

Chuntiya kalikgalhtawakga xTachuwin Dios (Hebreos 5:13, 14). Kaskini chatum xtatayana Jehová pi kalimakgalhtawakgen libro, ¿Tuku xlikana masiyay Biblia? Akxni tlakg nakatsiniya tlakg napaxuwaya. (Kalikgalhtawakga Salmo 1:1-3 chu 73:27, 28.)

Kalakapastakti pi xalakwan tamakatsin nema wi kBiblia Jehová kinkamaxkiyan, tiku xapaxuwana chu tlan natalakatsuwiniya komo nakatatamaxtupiya xlakskujnin tiku ni makgxtakgkgo (Hebreos 10:24, 25). Chu komo naliskuja xlakata natlawaya xtalakaskin Jehová, nakgalhiya xaxlikana latamat: latamat nema ni kgalhi xlisputni. Natalakatsuwiniya Dios wa tuku tlakg tlan natlawaya kmilatamat. (Kalikgalhtawakga 1 Timoteo 1:11 chu 6:19.)