CAPÍTULO 8
Tuku tamaklakaskin akxni talichuwinan Dios: Tatlawa likgalhtawakga xpalakata putum latamanin
1, 2. 1) Kxapulana siglo ¿tuku makgtayanalh xlakata xtamalakgatumilh xalakwan xalaksasti xlikalanka Roma? 2) ¿Tuku limasiya pi Jehová kinkamakgtayaman la uku? (Na kaʼakxilhti recuadro «Xasasti tamakatsin kliwaka 670 tachuwin».)
PENTECOSTÉS xla kata 33, tiku xʼankgonit kJerusalén nila xkanajlakgo tuku xkgaxmatmakgolh: makgapitsi xalak Galilea xkatachuwinamakgolh kxtachuwinkan chu xkalitachuwinamakgolh tuku kaks xkamalakawani. Kstalaninanin Cristo Dios aku xtlawanit pi xchuwinankgolh tanu tanu tachuwin nema limasiyalh pi Jehová xkamakgtayama (kalikgalhtawakga Hechos 2:1-8, 12, 15-17). Ama kilhtamaku lhuwa latamanin xalak tanu tanu kachikin kgaxmatkgolh xalakwan tamakatsin, chu ni lhuwa kata titaxtulh xlakata xlikalanka Roma na xkgaxmatkgolh (Col. 1:23).
2 La uku, Dios nialh tlawa pi akglhuwa tachuwin nachuwinanaw. Maski chuna, lichuwinankgo tamakatsin xla Tamapakgsin kliwaka 670 tanu tanu tachuwin, ¡tlakg lhuwa tachuwin nixawa kxapulana siglo! (Hech. 2:9-11.) Xkachikin Dios tlawamakgolh lu lhuwa likgalhtawakga chu klhuwa tachuwin chu tamakatsin takgaxmatma xlikalanka Katiyatni.a Uma liwana limasiya pi Jehová limaklakaskima Mapakgsina Jesucristo xlakata napulalin la natalichuwinan Dios (Mat. 28:19, 20). Naʼakxilhaw makgapitsin tuku talimaklakaskinit xlakata nalichuwinankan Dios uma akgtum ciento kata nema titaxtunit. Na naʼakxilhaw la Mapakgsina tsinu tsinu kinkamasiyaninitan xlakata nakalitachuwinanaw Dios chatunu chatunu chu nalimakgalhtawakgananaw xTachuwin Dios (2 Tim. 2:2).
Mapakgsina kamasiyani xlakskujni nachankgo talhtsi xla xaxlikana
3. ¿Tuku xlakata tanu tanu tuku maklakaskinaw akxni lichuwinanaw Dios?
3 Jesús tamalakxtumilh «ntachuwin xla tapakgsin» la talhtsi chu xnakujkan latamanin la tiyat niku chananankan (Mat. 13:18, 19). Chuna la chanana wi tuku limaklakaskin xlakata nakakuxtu xlakata nachananan, xtatayananin Jehová tanu tanu tuku limaklakaskinkgonit xlakata lhuwa millones latamanin tlan namakglhtinankgo tamakatsin xla Tamapakgsin. Makgapitsi kaj tsinu limaklakaskinka, amakgapitsin, la libros chu revistas, chuntiyaku makgtayanamakgolh. Lhuwa tuku lichuwinaw kcapítulo 7 nema limaklakaskina xlakata natamalakgatumi tamakatsin xla Tamapakgsin ni xkatachuwinankan chatunu chatunu, pero putum tuku nalichuwinanaw unu kamakgtayanit tiku lichuwinankgo Tamapakgsin nakatachuwinankgo chatunu chatunu (Hech. 5:42; 17:2, 3).
Tatlawama gramófonos chu aparatos xla sonido kToronto (Canadá)
4, 5. ¿La xtalimaklakaskin gramófono akxni xtalichuwinan Dios pero tuku nila xtatlawa?
4 Taʼakgchuwin nema xtagrabarlinit. Lata kdécada 1930 chu 1940, tiku xlichuwinankgo Dios xlimaklakaskinkgo grabaciones xalak Biblia, kaj akgkitsis minuto xmakgapala grabaciones nema xwilikgo kgramófonos. Na xkgalhikgo aktsu títulos la «Trinidad», «Pupatin» o «Tamapakgsin». ¿La xlimaklakaskinkan uma grabaciones? Tala Clayton Woodworth, xakgawasa, tiku tamunulh kata 1930 kʼEstados Unidos wa: «Xaklin akgtum akstu gramófono la portafolio xlilanka. Xaktalakatsuwi kmalakcha, xakmalakki gramófono. Xtalakaskin xakwililh tuku xmatlakgni niku tsuku disco xlakata tlan xtakgaxmatli. Alistalh xaktlakga timbre. Akxni xmalana chiki xmalakki, xakwani: “Kkgalhi akgtum lu xlakaskinka tamakatsin, nema klakaskin pi xkgaxpatti”». Tala Woodworth na wan: «Makglhuwa latamanin xkgaxmatkgo, chu xmin kilhtamaku kaj xkimalakchuwanikgo chu atanu xlakpuwankgo pi xakstamaw gramófonos».
Kkata 1940, xtatlawanit liwaka akgtum millón discos chu xtagrabarlinit liwaka 90 taʼakgchuwin
5 Kkata 1940, xtatlawanit liwaka akgtum millón discos chu xtagrabarlinit liwaka tatipuxamakaw taʼakgchuwin. John Barr, tiku precursor litaxtulh kʼGran Bretaña chu alistalh litaxtulh kgolotsin tiku Pulalinkgo xTatayananin Jehová, wa: «Kkata 1936 asta 1945, gramófono putum kilhtamaku xaklin. Chu kilhtamaku akxni ni xaklin nitlan xakmakgkatsi. Akxni xakkgaxmata tala Rutherford akgatunu malakcha lu xkimatliwakglha, chu xakmakgkatsi pi na anta xkintawi. Pero akxni xaklimaklakaskinaw gramófono nila xtlawa pi tuku xakkamasiyaniyaw xlakgchalh xnakujkan latamanin».
6, 7. 1) ¿La xmakgtayanan tarjetas nema xtalichuwinan Dios chu tuku nitlan xkitaxtu? 2) ¿Tuku xlakata tlan wanaw pi Jehová kinkamasiyanin tuku nawanaw?
6 Tarjetas nema xlichuwinankan Dios. Kkata 1933, kawanika tiku xlichuwinankgo Dios pi xlimaklakaskinkgolh tarjeta akxni xʼankgo akgatunu chiki. Uma tarjetas xlilanka xwanit la niku mastayaw kiʼinformejkan. Xkgalhi akgtum aktsu tamakatsin xalak Biblia chu xlichuwinan likgalhtawakga nema tlan kskinka. Tiku xlichuwinan Dios kaj xmaxki tarjeta xmalana chiki chu kskini pi xlikgalhtawakgalh. Lilian Kammerud, tiku alistalh misionera litaxtulh kPuerto Rico chu kʼArgentina wan: «Lu xaklakgati xakmaklakaskin tarjetas. Xlakata makgapitsi nila liwana xaklichuwinanaw Dios akgatunu chiki. Pero xlakata xtamakgtay uma tarjeta, tsinu tsinu tlan ktsukulh kkatachuwinan latamanin».
Tarjeta nema xlichuwinankan Dios xaʼitaliano
7 Tala David Reusch tiku tamunulh kkata 1918 wa: «Tarjetas xla tamakatsin kamakgtayalh natalan, xlakata lhuwa xmakgkatsikgo pi nila liwana xchuwinankgo». Pero uma tarjetas ni lu xmakgtayanan, tala Reusch wan: «Xmin kilhtamaku latamanin xlakpuwankgo pi nila xakchuwinanaw. Chu chuna, xlakata kilhuwakan nila xakkatachuwinanaw latamanin». Chu na wa: «Pero Jehová xkinkamasiyaniman xlakata xakwaw pi akinin xtatayananin. Ni makgas titaxtulh kinkamasiyanin tuku xaklichuwinaw; la xaklimaklakaskiw Biblia akgatunu chiki. Limaklakaskilh Niku Masiyakan xlakata la Lichuwinankan Dios nema tsukulh kdécada 1940» (kalikgalhtawakga Jeremías 1:6-9).
8. Komo lakaskinaw pi Cristo nakinkamasiyaniyan la namakgalhtawakgananaw, ¿tuku kilitlawatkan?
8 Libros. Lata 1914, xkachikin Jehová tlawakgonit liwaka akgtum ciento libros nema lichuwinan temas xalak Biblia, makgapitsi xlakata xkamakgtayalh tiku lichuwinankgo Dios tlakg tlan xtlawakgolh. Anna Larsen xalak Dinamarca, tiku lichuwinalh Dios max liwakata tutupuxamakaw kata wa: «Jehová limaklakaskilh Niku Masiyakan xlakata la Lichuwinankan Dios, chu libros nema tamaklakaskinit xlakata tlakg liwana natlawayaw kintaskujutkan. Klakapastaka pi xapulana wa Curso en el Ministerio Teocrático, nema taxtulh kdanés kkata 1944. Kkata 1946 [xaʼespañol kata 1950] kmakgamakglhtinaw “Equipado para toda buena obra”. Chu lata kkata 2001 kgalhiyaw libro Benefíciese de la Escuela del Ministerio Teocrático». Liwana tasiya pi Jehová kinkamasiyaninitan «lakimpi wa nakliskujnaniyaw» chu limaklakaskinit Niku Masiyakan xlakata la Lichuwinankan Dios chu likgalhtawakga nema tamaklakaskin (2 Cor. 3:5, 6). ¿Tatsokgtawilanitata kʼuma escuela? ¿Lipina milibro Benefíciese akgatunu semana chu akxilha kmilibro tuku wan tiku pulalin uma tamakxtumit? Akxni chuna tlawaya mastaya talakaskin pi Cristo namasiyaniyan tlakg tlan makgalhtawakgana nawana (2 Cor. 9:6; 2 Tim. 2:15).
9, 10. ¿La makgtayanankgolh libros xlakata natachan chu natamunuwili xtalhtsi xaxlikana?
9 Jehová na pulalinit xkachikin xlakata natlawakgo libros nema kamakgtaya tiku lichuwinankgo Dios liwana namasiyakgo tuku tlakg xlakaskinka masiya Biblia. Maktum libro nema lu makgtayanalh wa La verdad que lleva a vida eterna, taxtulh kkata 1968. Lu lakgatikgoka, chuna la lichuwinalh La Natlawayaw xTaskujut Dios xla mayo kata 1969: «Lhuwa skimaka libro La verdad, wa xlakata imprenta xla Sociedad xalak Brooklyn asta katsisni skujkgolh». Chuna tsukuka skujkan kseptiembre kata 1968 xlakata agosto chuna la kskinkanit akgtum millón aitat libros xkitsankga. Kkata 1982, liwaka 100 millón copias xtlawakanita chu 116 tachuwin. Akgkutati kata nema titaxtulh lata tatlawalh (kata 1968 asta 1982), liwaka akgtum millón taliwakalh tiku lichuwinankgo Dios.b
10 Kkata 2005, taxtulh atanu tuku limakgalhtawakganankan Biblia, libro ¿Tuku xlikana masiyay Biblia? nema liwaka 200 millón copias tlawakanit k256 tachuwin. ¡Chu lu makgtayananit! Kaj akgtujun kata nema titaxtukgolh (lata kata 2005 asta 2012), 1,200,000 latamanin na tsukukgolh lichuwinankgo Dios chu tiku kalimakgalhtawakgakan Biblia taliwakalh lata 6,000,000 asta 8,700,000. Liwana litasiyalh pi Jehová ksikulunatlawama kintaskujutkan pi nachanaw chu namunuwiliyaw xtalhtsi xla tuku xaxlikana xla Tamapakgsin (kalikgalhtawakga 1 Corintios 13:6, 7).
11, 12. Chuna la lichuwinankgo textos xalak Biblia, ¿tiku kalilakapastakkan akxni tlawakan revistas?
11 Revistas. Akxni tsukuka tlawakan revista Watch Tower xkalilakapastakkan «ni xalhuwa borregos», tiku xkgalhikgo «ntamalaknun xala kakgapun» (Luc. 12:32, TNM; Heb. 3:1). Kilhtamaku 1 xla octubre kata 1919, xkachikin Jehová maxtukgolh atanu revista, nema xtlawakanit xlakata tlan xlikgalhtawakgakgolh amakgapitsin. Xlikgalhtawakgananin Biblia chu amakgapitsin lu tlan makgamakglhtinankgolh chu akglhuwa kata tlakg xmaxtukan nixawa revista Watch Tower. Xwanikan The Golden Age, chu tsukulh tatlawa kxaʼespañol kkata1932 nema xwanikan Luz y Verdad. Kkata 1938 wanika Consolación, chu lata kata 1947, lilakgapaska ¡Despertad!
12 Chuna la titaxtukgonit kata, revistas Makatsinina chu ¡Despertad! talakgpalitilhakgonit la tasiyakgo, pero ni talakgpalinit tuku xlakata kalitlawaka: nalichuwinankgo xTamapakgsin Dios chu tlakg nakanajlanikan Biblia. La uku, maktum Makatsinina tlawakan xlakata natalikgalhtawakga ktamakxtumit chu atanu xlakata natamaʼakgpitsi. Tiku litaxtukgo «amakgapitsi skujnin» maklakaskinkgo revista nema talikgalhtawakga uma kilhchanima «ni xalhuwa borregos» chu “amakgapitsin nkalhnilu” o borregos (Mat. 24:45, TNM; Juan 10:16).c Revista nema tamaʼakgpitsi tlawakan xlakata tiku nina lakgapaskgo tuku xaxlikana pero maxkikgo kakni Biblia chu Dios (Hech. 13:16). Revista ¡Despertad! tlawakan xlakata tiku kaj tsinu katsikgo xlakata Biblia chu xlakata xaxlikana Dios, Jehová (Hech. 17:22, 23).
13. ¿Tuku tlakg xlakaskinka akxilhnita xlakata revistas? (Kalichuwinanti recuadro «Lu lhuwa tlawakanit kilikgalhtawakgakan».)
13 Akxni xtsukuma kata 2014, akgatunu papaʼ tatlawa liwaka 44 millón revista ¡Despertad! kmax 100 tachuwin, chu max 46 millón xla revista Makatsinina kliwaka 200 tachuwin. Uma maktiy revista wa nema tlakg lhuwa tamatitaxtima kʼatanu tachuwin chu tamaʼakgpitsi kkatiyatni. Xlikana pi lhuwa tuku tatlawama, pero ni kaj kaks lilakawanaw. ¿Tuku xlakata? Xlakata umakgolh revistas mastakgo tamakatsin nema Jesús wa pi xʼama talichuwinan xlikalanka Katiyatni (Mat. 24:14).
14. ¿Tuku lu lichuwinanaw xlakskujnin Dios chu tuku xlakata?
14 Biblia. Kkata 1896, tala Russell chu tiku xmakgtayakgo lakgpalikgolh xtukuwani tuku xlimaklakaskinkgo xlakata natlawakgo likgalhtawakga chu wanika Watch Tower Bible and Tract Society, xlakata xlakaskinkgo xwilika tachuwin Biblia. Uma tuku lakgpalika lu tlan wa, xlakata Biblia putum kilhtamaku wa tuku tlakg limaklakaskinitaw xlakata natalakgatumi xalakwan xalaksasti xla Tamapakgsin (Luc. 24:27). Wa xlakata xlakskujnin Dios kawanikgo amakgapitsin nalikgalhtawakgakgo chu namaʼakgpitsikgo Biblia. Akgtum liʼakxilhtit, kkata 1926 tatlawalh kkiʼimprentajkan, The Emphatic Diaglott, traducción xla Tatsokgni xaGriego nema tlawalh Benjamin Wilson. Kkata 1942, na ktlawaw chu kmaʼakgpitsiw 700,000 copias xla maktuminika Biblia nema wanikan King James Version. Akxni aku xtitaxtunit akgtiy kata ktsukuw tlawayaw Biblia nema wanikan American Standard Version, nema 6,823 xlimaklakaskin xtukuwani Jehová. Chu kkata 1950, xakmaʼakgpitsinitawa 250,000 copias xla uma Biblia.
15, 16. 1) ¿Tuku xlakata xlakaskinka akxilha Traducción del Nuevo Mundo? (Kalichuwinanti recuadro «Tamatitaxti Traducción del Nuevo Mundo klhuwa tachuwin».) 2) ¿La tlan namastayaw talakaskin pi xTachuwin Dios nachan kkinakujkan?
15 Kkata 1950 taxtulh xaʼinglés Biblia Traducción del Nuevo Mundo de las Escrituras Griegas Cristianas chu xaʼespañol taxtulh kkata 1963. Chu xatakgatsin Biblia Traducción del Nuevo Mundo de las Santas Escrituras taxtulh kkata 1961, chu xaʼespañol taxtulh kkata 1967. Uma Biblia malanki Jehová, xlakata wilipa xtukuwani niku xliʼanat chuna la xwi kxaHebreo. Xtukuwani Dios na wilikanit 237 kTatsokgni xaGriego. Xlakata xatakgatsin xwa chu ni tuwa la xlikgalhtawakgaka makglhuwa lakputsananiparaka. Xaʼawatiya tlawaka kxaʼinglés kkata 2013 chu uma kata, xtlawakanita liwaka 201 millón copias xla Traducción del Nuevo Mundo xatakgatsin o kaj Tatsokgni xaGriego 121 tachuwin.
16 ¿La akxilhkgonit makgapitsi Traducción del Nuevo Mundo akxni tamatitaxti kxtachuwinkan? Chatum chixku xalak Nepal wan: «Kilhuwakan tuwa xakmakgkatsiyaw nakʼakgatekgsaw Biblia kkintachuwinkan, xlakata maklakaskin xamakgan tachuwin. Pero la uku tlakg tlan kʼakgatekgsaw, xlakata limaklakaskin tachuwin nema kmaklakaskinaw chali chali». Akxni chatum puskat xalak República Centroafricana tsukulh likgalhtawakga Biblia nema xtlawakanit ktachuwin sango, tsukulh tasa chu wa: «Wa uma kintachuwin, lakgchalh kinaku». Xtachuwin Dios na nachan kkinakujkan komo nalikgalhtawakgayaw chali chali (Sal. 1:2; Mat. 22:36, 37).
Kapaxtikatsiniw tuku limaklakaskinaw chu la kinkamasiyanikanan
17. ¿La limasiyayaw pi lu xlakaskinka akxilhaw tuku limaklakaskinaw chu tuku kinkamasiyanikanan, chu tuku nakitaxtu komo chuna natlawayaw?
17 ¿Lu xlakaskinka akxilhaw tuku maklakaskinaw chu la kinkamasiyanitilhaman Mapakgsina Jesucristo? ¿Limaxtuya kilhtamaku xlakata nalikgalhtawakgaya tuku xkachikin Dios maxtutilhama chu limaklakaskinaw xlakata nakalimakgtayayaw amakgapitsin? Komo chuna natlawayaw nachuna nalakpuwanaw la tala Opal Betler, tiku tamunulh 4 xla octubre kkata 1914: «Chuna la titaxtunit kata, kinchixku [Edward] chu akit xakmaklakaskinaw gramófono chu alistalh tarjetas. Klichuwinaw Dios akgatunu chiki chu xaklimaklakaskinaw libros, folletos chu revistas. Kkilaw kcampañas, xaktlawayaw marchas chu kmaʼakgpitsiw likgalhtawakga. Alistalh kinkamasiyanikan la naktlawayaw revisitas chu la nakkamakgalhtawakgayaw kxchikkan tiku tlakg xkatsiputunkgo. Lu lhuwa taskujut kkgalhiw chu lu klipaxuwaw». Kgantaxtulh Jesús xlichuwinanit, pi xlakskujnin lhuwa xʼamakgolh chananankgo, xmakikgolh tachanan chu akxtum xpaxuwakgolh. Lhuwa millón tlan wankgo pi tuku wa Jesús na kgantaxtuma kxlatamatkan (kalikgalhtawakga Juan 4:35, 36).
18. ¿Tuku lanka talakgalhaman kgalhiyaw?
18 Lhuwa tiku nina skujnikgo Mapakgsina max lakpuwankgo pi xkachikin Dios ni kgalhtawakgakgonit (Hech. 4:13). Pero kalakpuwanti uma: Mapakgsina tlawanit pi tiku tasiyakgo pi kaj nitu litaxtukgo, «tiku ni kgalhtawakgakgonit» natlawakgo likgalhtawakga. Ktlawayaw takgalhtawakga nema ktlakg lhuwa tachuwin tamatitaxti chu tamaʼakgpitsi. Chu tuku tlakg xlakaskinka, na kinkamasiyaninitan la nakmaklakaskinaw tuku kgalhiyaw xlakata naklichuwinanaw xalakwan xalaksasti xliputum kachikinin. ¡Lanka talakgalhaman nataskujaw Cristo xlakata nachanaw talhtsi xla xaxlikana chu nakaputsayaw tiku tlan kstalaninanin Cristo nawankgo!
a Kxaʼawatiya década nema titaxtunita, xkachikin Jehová tlawanit liwaka 20,000 millón likgalhtawakga nema takilhtikgonit kBiblia. Nachuna, ksitio xla Internet jw.org, tanukgo liwaka 2,700 millón latamanin xlikalanka katiyatni anta niku anan Internet.
b Atanu libro nema maklakaskinkanit xlakata nalimasiyakan tuku xaxlikana xlakata Biblia wa El Arpa de Dios (tlawaka kkata 1925), «Sea Dios veraz» (tlawaka kkata 1949), Usted puede vivir para siempre en el paraíso en la Tierra (1982) chu El conocimiento que lleva a vida eterna (1995).
c Kaʼakxilhti Makatsinina 15 xla julio kata 2013, página 23, párrafo 13, anta talichuwinan tuku xasasti akgatekgsaw xlakata tiku «amakgapitsin skujnin».