María nakgalhi skgata maski nina tamakgaxtokga

Akgtati papaʼ lin María la kgalhkgalhima nakgalhi kskgata. Kalakapastakti pi akgtutu papaʼ kitatawilalh Elisabet, nema lama kxsipi Judea, ksur. Pero la uku taspitlita kNazaret, chu nialh makgas putum latamanin nakatsikgo pi nakgalhi skgata. ¡Kalilakpuwanti la max lilakgaputsama uma!

María kgalhi xlitatawilat, chatum xwakna nema wanikan José, chu wa xlakata tlakg tuwa makgkatsi. Xlimapakgsin Dios wan pi komo chatum tsumat tiku kgalhi xlitatawilat tatalakgxtumi atanu chixku, talakaskin naʼaktalamakgnikan. Chu María katsi uma (Deuteronomio 22:23, 24). Wa xlakata, maski nitu tatalakgxtuminit chatum chixku, max lilakpuwama la nawani José pi nakgalhi skgata chu tuku nala alistalh.

Xlakata María akgtutu papaʼ niti xwi, José lu akxilhputun. Akxni laʼakxilha, María wani pi espíritu santo natlawa pi nakgalhi skgata. Maski chuna, José lu tuwa makgkatsi nakanajla tuku wani María.

Xla katsi pi María tlan tsumat chu amakgapitsin tlan lichuwinankgo. Pero maski paxki, nila kanajla tuku María wani. Chuntiya lakpuwan pi María nakgalhi skgata xlakata wi tiku tatalakgxtuminit. Pero ni lakaskin pi naʼaktalamakgnikan chu namamaxanikan xlakatin lhuwa latamanin. Wa xlakata, xatsekg makgxtakgputun. Amacha kilhtamaku, akxni chatum tsumat chu kgawasa litatawilat xlitaxtukgo xkaliʼakxilhkan la komo xtamakgaxtokgkgonita. Xlakata nalamakgxtakga talakaskin nalakxtlawakgo xtamakgaxtokgatkan.

Alistalh, akxni José chuntiya lilakpuwama uma, lhtatatama. Uma kilhtamaku tasiyani kxtamanixni chatum ángel chu wani: «Ni kapekuanti xlakata nalipina María mimpuskat kminchik, xlakata wa xlitliwakga espíritu santo tlawalh pi nakgalhi skgata. Namalakachini chatum aktsu kgawasa, chu wix nalimapakuwiya Jesús, xlakata xla nalakgmaxtu xkachikin kxtalakgalhinkan» (Mateo 1:20, 21).

Akxni José stakwanan, tlan makgkatsi xlakata lakkaxlalh tuku xlilakgaputsama. Tunkun tlawa tuku wani ángel chu lin María kxchik. Uma tuku tlawa litasiya pi tamakgaxtokgkgonita. Kxlakatin amakgapitsin, José chu María tamakgaxtokgkgonita. Maski chuna, José ni tatalakgxtumi María asta akxni lakachin o lakgawan kskgata.

Titaxtu makgapitsi papaʼ, talakaskin pi José chu María nataxtukgo kNazaret chu naʼankgo niku lu makgat. Pero nialh makgas tsankgani María nalakachin kskgata. ¿Niku xliʼanatkan uma lu xatuwa kilhtamaku?