Makgapitsi astrólogos ankgo akxilhkgo Jesús

Makgapitsi astrólogos minkgoyacha niku taxtu Chichini. Astrólogos wa tiku wankgo pi akxni putsananikgo la wilakgo staku tlan lichuwinankgo tuku xlakata wi tuku kaʼakgspula latamanin (Isaías 47:13). Akxni xwilakgo kxkachikinkan, umakgolh lakchixkuwin akxilhkgolh akgtum «staku» chu lhuwa ciento kilómetros stalanikgonit. Pero uma ni kalin kBelén, wata kalin kJerusalén.

Akxni chankgo anta, astrólogos tsukukgo kgalhskininankgo: «¿Niku wi xmapakgsinakan judíos tiku aku lakachilh? Kakxilhwi kstaku akxni xakwilachaw niku taxtu chichini chu kminitaw xlakata nakmaxkiyaw kakni» (Mateo 2:1, 2).

Akxni Herodes, xmapakgsina Jerusalén katsi uma, lu sitsi. Wa xlakata katasani xapuxku sacerdotes chu amakgapitsi judíos tiku xpulalinanin takanajla chu kakgalhskin niku xʼama lakachin Cristo. Xlakan likgalhtinankgo tuku wan Tatsokgni: «Anta kBelén» (Mateo 2:5; Miqueas 5:2). Akxni kgaxmata uma, Herodes tsekg kamatasaninan astrólogos chu kawani: «Kapitit chu liwana kaputsatit aktsu kgawasa, chu akxni natekgsatit, katantit kiwaniyatit xlakata na nakan maxki kakni» (Mateo 2:8). Pero uma ni xlikana, Herodes kaj makgniputun aktsu kgawasa.

Akxni astrólogos taxtukgo, «staku» nema kalimincha lata niku taxtu chichini tsukupara kapulalin. Liwana tasiya pi uma staku ni kaj katuwa staku. Wi tiku maklakaskima xlakata nakapulalin. Astrólogos stalanikgo asta akxni staku tachokgo xʼakgstin chiki niku José chu María tawilakgo aktsu xkgawasakan.

Akxni tanukgo kchiki, astrólogos akxilhkgo pi María talawi Jesús. Ama kilhtamaku lakgtatsokgostakgo aktsu kgawasa xlakata nakakninanikgo chu maxkikgo tamaskiwin nema liminikgonit: oro, incienso chu mirra. Alistalh, akxni lakgamputunkgo Herodes, Dios kamakatsini kʼakgtum tamanixni pi ni kaʼankgolh. Wa xlakata atanu tiji tiyakgo xlakata nataspitkgo kxkachikinkan.

¿Tiku maklakaskilh uma «staku» xlakata nakapulalin astrólogos? Kalakapastakti pi ni pulana kalilh kBelén, anta niku xwi Jesús. Kalilh kJerusalén. ¿Chu tiku tachuwinankgolh anta? Herodes. Uma mapakgsina xmakgniputun Jesús, chu chuna xtlawalh komo Dios ni xkawanilh astrólogos pi ni xmakatsinikgolh niku xwi aktsu kgawasa. Uma liwana masiya pi wa Satanás, xtalatlawana Dios, maklakaskilh «staku» xlakata xmakgniputun Jesús.