¿Xlilat natlawakan tuku tlan sábado?

Jesús lhuwa tuku tlawanit akxni lichuwinan Dios kʼGalilea. Pero akxni wa: «Na kiliʼanat alakatanu kachikinin xlakata naklichuwinan xatlan tamakatsinin xla xTamapakgsin Dios», ni kajwatiya xkalilakpuwama kachikin nema xtapakgsikgo kʼGalilea. Wa xlakata an kxlikalanka Judea chu lichuwinan Dios ksinagoga (Lucas 4:43, 44). An kJudea xlakata talakatsuwinita kilhtamaku xlakata natlawakan Pascua, uma tlawakan kJerusalén marzo chu abril.

Evangelios lhuwa tuku lichuwinankgo xlakata tuku Jesús tlawalh kʼGalilea, pero ni lu lichuwinankgo tuku tlawalh kJudea. Max lhuwa latamanin xalak Judea ni xatapaxuwan makgamakglhtinankgo, pero Jesús chuntiya lichuwinan Dios chu tlawa tuku tlan anta niku an.

Alistalh, an kJerusalén, niku tapakgsi Judea, xlakata natlawa Pascua xla kata 31. Kxpaxtun Malakcha xla Borregos, niku lu lhuwa titaxtukgokan, wi lanka pila nema wanikan Betzata, nema litamakgstilinit talayaw. Lhuwa tiku nila akxilhkgo, nila tlawankgo chu amakgapitsi tiku tatatlakgo, ankgo anta xlakata lakpuwankgo pi komo natajukgo akxni chuchut natalakgwilha napakskgo.

Uma kilhtamaku sábado chu akxni Jesús titaxtu anta, akxilha chatum chixku tiku lata puxamakutsayan kata tatatla. Jesús talakatsuwini chu kgalhskin: «¿Paksputuna?». Chu chixku kgalhti: «Malana, ni kkgalhi tiku nakimuju kpila akxni chuchut talakgwilha, chu akxni akit aku kama, atanu tiku pulana taju» (Juan 5:6, 7).

Jesús wani tuku max lu kaks malakawani uma chixku chu putum tiku kgaxmatnikgo: «¡Kataki! Katiya aktsu mimputama chu katlawanti» (Juan 5:8). Uma chixku lakapala paksa chu tlawa tuku Jesús wani: tiya aktsu xputama chu tsuku tlawan.

Akxni judíos akxilhkgo, ni lipaxuwakgo tuku lanit, wata wanikgo: «Uku Sábado chu ni xlilat nalipina aktsu mimputama». Pero xla kakgalhti: «Ama tiku kimapaksalh kiwanilh: “Katiya aktsu mimputama chu katlawanti”» (Juan 5:10, 11). Umakgolh judíos lu nitlan akxilhkgo pi wi tiku mapaksanama sábado.

Kgalhskinkgo uma chixku: «¿Tiku ama chixku tiku wanin: “Katiya chu katlawanti”?». Pero Jesús kalakgstipatanu latamanin chu nila tekgskan, chu chixku ni katsi tuku wanikan tiku mapaksakanit (Juan 5:12, 13). Pero alistalh, tatanokglhpara Jesús anta ktemplo chu katsi tiku litaxtu.

Wa xlakata, chixku kaputsa judíos tiku xkgalhskinkgonit chu kawani pi wa Jesús tiku mapaksanit. Wa xlakata umakgolh judíos ankgo tachuwinankgo Jesús, pero ni kaj katsiputunkgo xlakata tuku tlawa, lakgankgo xlakata nalilakawanikgo pi mapaksanama sábado. Asta tsukukgo putsastalanikgo.