Juan kgalhkgalhi xtakgalhtin Jesús

Max akgtumta kata la Juan Mununa tanuma kpulachin. Maski chuna, kgaxmata tuku tlawama Jesús. Kalakpuwanti la makgkatsi akxni xtamakgalhtawakgen wanikgo pi Jesús malakastakwanilh xkgawasa puskat xalak Naín. Pero Juan lakaskin pi Jesús nawani komo xla wa Mesías. Wa xlakata kawani chatiy xtamakgalhtawakgen pi kalakgankgolh Jesús chu kakgalhskinkgolh: «¿Wix Tiku xʼama Min, o nakkgalhkgalhiyaw atanu?» (Lucas 7:19).

¿Lakpuwana pi xlilat natlawa uma takgalhskinin? Xla chatum chixku tiku ni makgxtakga Dios. Kalakapastakwi pi, max akgtiy kata lata munulh Jesús, akxilhli pi xʼespíritu Dios lakgmilh Jesús la tantum paloma chu kgaxmatli xtachuwin Dios nema xwan pi Jesús xmakgapaxuwa. Wa xlakata nila lakpuwanaw pi makgatsankgama xtakanajla. Komo chuna xlalh, ama kilhtamaku Jesús ni xlichuwinalh pi tlan tuku tlawalh Juan. Pero komo ni makgatsankgama xtakanajla, ¿tuku xlakata tlawa uma takgalhskinin?

Max kaj lakaskin pi Jesús nawani pi xla wa Mesías, xlakata uma namakgtaya natayani maski tanuma kpulachin. Pero xtakgalhskinin wi atanu tuku kilhchanima. Xla lakgapasa tuku lichuwinankgolh palakachuwinanin tiku wankgolh pi xTalaksakni Dios mapakgsina nawan chu nalakgmaxtunan, pero titaxtukgonita lhuwa papa’ lata tamunulh Jesús, chu xla chuntiya tanuma kpulachin. Wa xlakata katsiputun komo namin atanu lataman tiku namakgantaxti tuku xlichuwinankanit xlakata Mesías.

Jesús ni kawani xtamakgalhtawakgen Juan pi xla wa tiku x’ama min. Wata kamapaksa lhuwa latamanin xlakata nakalimasiyani pi Dios tataya. Alistalh kawani: «Kapitit chu kawanitit Juan tuku kgaxpatpatit chu akxilhpatit: tiku lakgaxokgo xwankgonit lakawanankgo chu tiku nila xtlawankgo tlan tlawankgo, tiku xkgalhikgo lepra pakskgonit chu tiku xʼakgatapakgo tlan kgaxmatkgo, tiku xnikgonit kamalakastakwanikanit chu limaxkgenin kalitachuwinamaka xatlan tamakatsinin» (Mateo 11:4, 5).

Juan max tlawa uma takgalhskinin xlakata kgalhkgalhi pi Jesús tlakg lhuwa tuku katlawalh chu katamakxtulh kpulachin. Pero Jesús wani pi kaj natlawa milagros nema tlawamaja chu ni katitlawalh atanu tuku xla lakpuwan.

Akxni xtamakgalhtawakgen Juan ankgo, Jesús kawani latamanin pi Juan ni kaj chatum palakachuwina. Xla «makatsinina» tiku Jehová malakgachalh nema talichuwinan kMalaquías 3:1 chu wa palakachuwina Elías nema talichuwinan kMalaquías 4:5, 6. Jesús wan: «Xlikana kkawaniyan, niti lakachinit tiku tlakg xlakaskinka nixawa Juan Mununa, pero tiku ni xlakaskinka litaxtu kTamapakgsin xalak akgapun wa tlakg lanka nixawa Juan» (Mateo 11:11).

Akxni wan pi tiku ni xlakaskinka litaxtu kTamapakgsin xalak akgapun wa tlakg lanka nixawa Juan, Jesús wamputun pi Juan ni katitamapakgsinalh kTamapakgsin xalak akgapun. Juan malakkilh tiji xlakata nachin Cristo, pero nani akxni nina talakki tiji nema linan klatamat k’akgapun (Hebreos 10:19, 20). Maski chuna, xla chatum palakachuwina tiku ni makgxtakga Dios chu nalatama kKatiyatni akxni xTamapakgsin Dios namapakgsinan.