Chatum tiku xkgalhi lepra paxtikatsininan xlakata mapaksaka

Sanedrín lakpuwanit namakgnikgo Jesús, pero ni matlanikgonit xlakata Jesús anit kkachikin xla Efraín nema wi kxnoreste Jerusalén. Anta katatamakgxtakga xtamakgalhtawakgen, makgat wilanikgo xtalamakgasitsinkan (Juan 11:54). Pero xlakata talakatsuwima Pascua kkata 33, Jesús ni makgas tamakgxtakga kʼuma kachikin. An knorte, titaxtu kSamaria chu an asta kʼGalilea. Xaʼawatiya uma kilhtamaku an lakgapaxialhnan uma kachikin.

Akxni nina makgas taxtunit chu ama kʼakgatunu kachikinin, katatanokglha kgalhakaw lakchixkuwin tiku kgalhikgo lepra. Uma tajatat tlawa pi tsinu tsinu nalaklatilha makni, la laktsu makan o takgen (Números 12:10-12). Xlimapakgsin Dios wan pi tiku kgalhikgo lepra pixlanka xliwanatkan: «¡Xataxkajwani, xataxkajwani!» chu makgat niku xlitawilatkan (Levítico 13:45, 46).

Xlakata uma, kgalhakaw tiku kgalhikgo lepra makgat tawilanikgo Jesús. Pero pixlanka wankgo: «¡Jesús, Makgalhtawakgena, kakilalakgalhamaw!». Akxni kaʼakxilha, Jesús kawani: «Kakalakgpitit sacerdotes xlakata nakaʼakxilhkgoyan» (Lucas 17:13, 14). Chuna limasiya pi maxki kakni Limapakgsin, nema kamaxki talakaskin sacerdotes nawankgo pi chatum tiku xkgalhi lepra paksnita chu nialh xataxkajwani. Chuna tlan akxtum nakatalatamaparakgo amakgapitsi latamanin (Levítico 13:9-17).

Xlakata kgalhakaw tiku kgalhikgo lepra lipawankgo pi Jesús kgalhi litliwakga xlakata natlawa milagro, ankgo niku wilakgo sacerdotes maski kgalhikgojku lepra. Akxni amakgo ktiji, akxilhkgo pi xtakanajlakan lu tlan kitaxtu, nialhtu kgalhikgo lepra.

Kgalhnajatsa tiku xkgalhikgo lepra nialh taspitkgo. Pero chatum, tiku samaritano xwanit, taspita xlakata naputsa Jesús. ¿Tuku xlakata chuna tlawa? Xlakata uma chixku lu paxtikatsini Jesús tuku tlawanit xpalakata. Wa xlakata taspita chu “pixlanka malankitilha Dios”, xlakata katsi pi xlitliwakga Jehová lipaksnit (Lucas 17:15). Akxni tekgsa Jesús, lakgtatsokgosta chu paxtikatsini.

Akxni Jesús akxilha uma, kawani tiku anta wilakgo: «Xkgalhakawkan pakskgolh, ¿ni xlikana? Wa xlakata, ¿niku wilakgolh akgalhnajatsa? ¿Nitiku achatum taspitli xlakata namalanki Dios, kajwatiya uma chixku tiku xalak atanu kachikin?». Chu wani samaritano: «Kataya chu kapit; mintakanajla mapaksanitan» (Lucas 17:17-19).

Akxni kamapaksa kgalhakaw tiku xkgalhikgo lepra, Jesús limasiya pi Jehová makgtayama. Nachuna, xlakata uma milagro, chatum tiku xkgalhi lepra ni kajwatiya paksa, max na tekgsa tiji nema linan klatamat. Kkinkilhtamakujkan, Dios ni maklakaskin xKgawasa xlakata natlawa umakgolh milagro. Pero komo kanajlaniyaw Jesús, na tlan namakglhtinanaw latamat nema nikxni sputa. Chuna la samaritano, ¿na paxtikatsininanaw xpalakata uma?