Mapakgsina kgewi aktsu burro akxni tanu kJerusalén

Lichali, domingo 9 xla nisán, taxtukgo kBetania chu ankgo kJerusalén. Akxni chankgo kBetfagué, ksipi xla Olivos, Jesús wi tuku kamatlawi chatiy xtamakgalhtawakgen.

Jesús kawani: «Kapitit kʼaktsu kachikin nema tasiyayacha, chu tunkun natekgsatit anta chiyawakanit tantum burra chu xaskgata xburro. Kakaxkuttit chu kakalitantit. Chu komo wi tiku nakakgalhskinan, nawaniyatit “Malana kamaklakaskima”. Akxni chuna nawaniyatit, tunkun nakatamalakgachakgoyan» (Mateo 21:2, 3).

Ama kilhtamaku, xtamakgalhtawakgen ni katsikgo pi tuku Jesús kawanima tatalakxtumi tuku xwankanit pi nala. Pero, alistalh akgatekgskgo pi chuna kgantaxtu xtachuwin Zacarías. Xla lichuwinalh pi Mapakgsina nema Dios xwanit pi namin ni xʼama talanki akxni xtanulh kJerusalén chu xʼama kgetawila «tantum burro, o tantum animal nema liwana staknit, xkgawasa tantum burra» (Zacarías 9:9).

Akxni xtamakgalhtawakgen Jesús tanukgo kBetfagué chu xkutkgo burra chu kskgata, makgapitsi tiku xala anta kakgalhskinkgo: «¿Tuku xlakata xkutpatit xaskgata burro?» (Marcos 11:5). Pero akxni katsikgo pi linimaka Malana, kamaxkikgo talakaskin nalinkgo. Xtamakgalhtawakgen likgetlapakgo xlhakgatkan uma tantiy animales, chu Jesús kgetawila aktsu burro.

Akxni Jesús talakatsuwima kJerusalén, tlakg lhuwa tiku katatanokglha. Lhuwa tiku mamikgo xlhakgatkan ktiji, chu amakgapitsi mamikgo «xpakgan kiwi xalak kapukuxtun». Pixlanka wankgo: «¡Dios, kkatasaskiniyan kalakgmaxtu! ¡Tasikulunatlawanit tiku mima kxtukuwani Jehová! ¡Katasikulunatlawalh Tamapakgsin nema aku mima xla kintlatkan David!» (Marcos 11:8-10). Akxni fariseos kgaxmatkgo umakgolh tachuwin, lisitsikgo chu wanikgo Jesús: «Makgalhtawakgena, kakakilhni mintamakgalhtawakgen». Xla kakgalhtilh: «Kkawaniyan pi komo umakgolh xtakgalhtsekgkgolh, chiwix pixlanka xchuwinankgolh» (Lucas 19:39, 40).

Akxni Jesús akxilha Jerusalén tsuku tasa chu wan: «Xaklakaskin pi xtiʼakgatekgsti tuku xʼama maxkiyan takaksni, pero uku matsekgnikanita». Jerusalén napati xlakata ni xlakata ni kgalhakgaxmatninalh. Jesús wan: «Mintalamakgasitsin nalimakgstiliwilikgoyan laklanka lakkankasajajan kiwi chu namakgapatikgoyan. Nalikatalakana katutsu, wix chu minkamanan kxpulakni mimpatsaps, chu ni katimakgxtakgnika akgtum xatalakgtsapsni chiwix nema ni katilaktilhwilika» (Lucas 19:42-44). Uma kgantaxtu akxni malakgsputukan Jerusalén kkata 70.

Akxni Jesús tanu kJerusalén, latamanin tachilikgo chu kgalhskininankgo: «¿Tiku uma chixku?». Latamanin kgalhtinankgo: «¡Wa uma palakachuwina Jesús, xalak Nazaret xla Galilea!» (Mateo 21:10, 11). Tiku akxilhkgolh akxni Jesús malakastakwanilh Lázaro kalitachuwinankgo amakgapitsin milagro nema tlawalh. Pero fariseos nitlan limakgkatsikgo xlakata nitlan kakitaxtunima tuku xlakpuwankgonit. Asta lawanikgo: «¡Kaʼakxilhtit! Putum latamanin wa stalanimakgolh» (Juan 12:18, 19).

Chuna la lismaninit akxni wi kJerusalén, Jesús an masiya ktemplo. Anta kamapaksa tiku ni lakawanankgo chu tiku nila tlawankgo. Xanapuxkun sacerdotes chu lakgtsokgkinanin lu sitsikgo akxni akxilhkgo tuku tlawa chu akxni kgaxmatkgo tuku kamanan pixlanka wankgo ktemplo: «¡Dios, kkatasaskiniyan kalakgmaxtu xKgawasa David!». Wa xlakata kgalhskinkgo Jesús: «¿Kgaxpatpat tuku kilhwamakgolh?». Chu xla kakgalhti: «¿Nikxni likgalhtawakgatit kTatsokgni niku wan: “Tlawanita pi xkilhnikan lakgkgawasan chu laktsu lakgskgatan namalankikgoyan”?» (Mateo 21:15, 16).

Jesús akxilha tuku lama ktemplo. Pero xlakata kgotanumaja, kataʼan xʼapóstoles. Akxni nina tsuku 10 xla nisán, taspita kBetania chu anta lakgtunkuwi domingo.