Fariseos tlawanikgo takgalhskinin tiku lakgaxokgo xlakachinit

Fariseos ni kanajlaputunkgo pi Jesús mapaksalh chixku tiku lakgaxokgo lakachilh, wa xlakata tasanikgo xnatlatni. Xnatlatni katsikgo pi max tlan xkatamakxtuka ksinagoga (Juan 9:22). Uma xtlawalh pi nialh akxtum xkatalalinkgolh amakgapitsi judíos chu uma xtlawalh pi xkalakgmakganka.

Fariseos katlawanikgo akgtiy takgalhskinin: «¿Wa uma minkgawasakan tiku wixin wanatit pi lakgaxokgo lakachilh? ¿Tuku xlakata uku tlan lakawanan?». Xlakan kgalhtinankgo: «Kkatsiyaw pi uma kinkgawasakan, chu lakgaxokgo xwanit akxni lakachilh. Pero ni kkatsiyaw tuku xlakata uku tlan lakawanan; chu ni kkatsiyaw tiku tlawalh pi nalakawanan». Maski max xkgawasakan kalitachuwinanit tuku lalh, xlakan kuenta tlawakgo la nakgalhtinankgo. Xlakan kgalhtinankgo: «Kakgalhskintit. Lankata. Xla xʼakstu xlikgalhtinat» (Juan 9:19-21).

Wa xlakata fariseos tasanikgo chixku chu makgapekuankgo akxni wanikgo pi anan tuku litasiya pi Jesús nitlan tuku tlawama. Wanikgo: «Kamalanki Dios; akinin kkatsiyaw pi uma chixku lakgalhina». Pero xla kakgalhti: «Komo lakgalhina, akit ni kkatsi. Kajwatiya kkatsi pi lakgaxokgo xakwanit, pero uku tlan klakawanan» (Juan 9:24, 25).

Pero fariseos ni anta makgxtakgkgo uma, kgalhskimparakgo: «¿Tuku tlawanin? ¿La tlawalh pi nalakawanana?». Chixku ni pekuan chu kawani: «Kkawaninitana, pero ni kgaxpattit. ¿Tuku xlakata kgaxmatputumparayatit amakgtum? ¿Na xtamakgalhtawakgen litaxtuputunatit?». Akxni fariseos kgaxmatkgo uma, lixkajnit tsukukgo wanikgo: «Wix xtamakgalhtawakgen ama chixku, pero akinin xtamakgalhtawakgen Moisés. Akinin kkatsiyaw pi Dios tachuwinanit Moisés, pero uma chixku ni kkatsiyaw niku minacha» (Juan 9:26-29).

Skiwaya kaks lilakawan chu kawani: «Uma lu kaks kimalakawani, pi wixin ni katsiyatit niku minacha, pero xla tlawalh pi naklakawanan». Xla wi tuku kawani xpalakata latamanin nema Dios kakgaxmatni chu tlan kaʼakxilha: «Katsiyaw pi Dios ni kgaxmata xʼoracionkan lakgalhinanin, pero komo wi tiku pekuani Dios chu tlawa xtalakaskin, wa uma tiku xla kgaxmatni. Lata makgasa ni takgaxmatnit pi wi tiku xtlawalh pi nalakawanan chatum tiku lakgaxokgo lakachinit». Chu xaʼawatiya wan: «Komo uma chixku ni wa Dios xtimalakgachalh, nila tuku xtlawalh» (Juan 9:30-33).

Komo fariseos nila masiyakgo pi xla nixlikana tuku lichuwinama, lixkajnit tsukukgo wanikgo: «Wix xlitsamaya talakgalhin akxni lakachita, ¿chu wata wix kilamasiyaniputunaw?» (Juan 9:34). Alistalh tamakxtukgo.

Jesús kgaxmata tuku akgspulanit uma chixku, chu akxni tatanokglha kgalhskin: «¿Wix kanajlaniya xKgawasa chixku?». Xla kgalhtinan: «Katlawa litlan, kakiwani tiku ama xlakata tlan nakkanajlani». Xlakata liwana nakanajla, Jesús wani: «Akxilhta chu wa ama tiku tachuwinaman» (Juan 9:35-37).

Chixku lakapala kgalhti: «Kkanajlani, Malana». Xlakata lu kanajla chu maxki kakni, lakgtatsokgosta Jesús, tiku uma kilhtamaku wan tuku lu xlakaskinka: «Kmilh kkakilhtamaku xlakata tlan nalakputsananikan, xlakata tiku lakgaxokgo tlan nalakawanankgo, chu tiku lakawanankgo lakgaxokgo nawankgo» (Juan 9:38, 39).

Fariseos tiku anta wilakgo ni lakgatsin. Pero ¿chu kxtakanajlakan? ¿Pulalimakgo kachikin chuna la xlilat? Sitsikgo chu kgalhskinkgo: «¿Lakpuwana pi na lakgaxokgo akinin?». Jesús kawani: «Komo lakgaxokgo xwantit, ni xkgalhitit talakgalhin. Pero uku wixin wanatit “Klakawananaw”. Ni katikatapatikantit mintalakgalhinkan» (Juan 9:40, 41). Xlakan xmakgalhtawakgenanin Israel, pero lakgmakgankgonit Mesías, wa xlakata ni anan tuku nalikilhankgo. Xlakata lakgapaskgo limapakgsin, akgtum lanka talakgalhin pi lakgmakgamakgo Jesús.