Talakgmaxtut, tlakg xalanka xtamaskiwin Dios

1, 2. 1) ¿Tuku tlawa pi akgtum tamaskiwin lanka xtapalh naliʼakxilha? 2) ¿Tuku xlakata talakgmaxtut wa tlakg xalanka xtamaskiwin Dios?

¿TUKU tlakg xatlan tamaskiwin maxkikanita? Ni talakaskin pi tapalaxla nawan. Komo akgtum tamaskiwin makgapaxuwayan o xlikana maklakaskina napaxtikatsiniya tiku maxkin.

² Lhuwa tuku Dios kinkamaskiwinitan, pero wi pulaktum nema tlakg maklakaskinaw nixawa atanu. Wa tlakg xalanka xtamaskiwin Dios. Makamilh xKgawasa xlakata nakinkalakgmaxtuyan. Uma kinkamaxkiyan talakaskin tlan nalatamayaw putum kilhtamaku (kalikgalhtawakga Mateo 20:28). Jehová limasiyalh pi lu kinkapaxkiyan akxni makamilh Jesús kKatiyatni xlakata nakinkalakgmaxtuyan. K’uma capítulo lhuwa tuku nakatsiniyaw xlakata uma tamaskiwin.

¿TUKU TALAKGMAXTUT?

3. ¿Tuku xlakata niyaw?

³ Talakgmaxtut wa tuku Dios maklakaskin xlakata nakalakgmaxtu latamanin ktalakgalhin chu klinin (Efesios 1:7). Xlakata naʼakgatekgsaw tuku xlakata xtalakaskin talakgmaxtut, talakaskin nakatsiyaw tuku kaʼakgspulalh xapulana kinatlatnikan Adán chu Eva, anta kjardín xaʼEdén. Xlakan makglakgalhinankgolh chu wa xlakata nikgolh. Wa xlakata putum akinin nachuna niyaw (kaʼakxilhti nota 9, niku wan «Talakgalhin»).

4. ¿Tiku xwanit Adán chu tuku maxkilh Dios akxni malakatsukilh?

⁴ Akxni Dios malakatsukilh xapulana chixku, Adán, maxkilh tuku lanka xtapalh: akgtum latamat nema ni kgalhi talakgalhin. Xkgalhi akgtum makni chu talakapastakni nema ni xkgalhikgo talakgalhin. Nikxni xtatatlalh, nikxni xkgololh chu nikxni xnilh. Xlakata Jehová wa malakatsukilh Adán xla xtlat xlitaxtu (Lucas 3:38). Dios ankgalhin xtachuwinan Adán chu liwana xwani tuku xla xlakaskin natlawa. Nachuna, maxkilh akgtum taskujut nema xmakgapaxuwalh (Génesis 1:28-30; 2:16, 17).

5. ¿Tuku kilhchanima pi Adán tlawaka «xtachuna la Dios»?

⁵ Adán tlawaka «xtachuna la Dios» (Génesis 1:27). Jehová maxkilh tayat nema xla kgalhi, la komo tapaxkit, liskgalala chu litliwakga. Jehová maxkilh Adán akgtum talakapastakni, xla ni xtachuna xwanit la animales nema Jehová xkatlawanit, tlan xlaksakli tuku xtlawalh kxlatamat. Tlan xlaksakli komo xtlawalh tuku tlan o tuku nixatlan. Komo Adán xtilaksakli nakgalhakgaxmata Jehová, tlan xtilatamalh putum kilhtamaku anta kParaíso.

6. 1) ¿Tuku makgatsankgalh Adán xlakata ni kgalhakgaxmatli Dios? 2) ¿Chu tuku kinkakitaxtunin akinin?

⁶ Adán lu nitlan kitaxtunilh xlakata ni kgalhakgaxmatli Dios. Makgatsankgalh xlatamat nema ni xkgalhi talakgalhin, chuna la xtalalin Jehová, chu tamakxtuka kParaíso (Génesis 3:17-19). Xkuenta xlakata «talakgalhin tanulh kkakilhtamaku, chu linin xpalakata talakgalhin, chu wa xlakata linin kaʼakgchipalh putum latamanin xlakata putum xlakgalhinankgonit» (Romanos 5:12). Adán chu Eva ni kgalhakgaxmatkgolh Jehová, wa xlakata nialh xkgalhikgo akgtum takgalhkgalhin. Akxni Adán makglakgalhinalh, xla chu akinin kskujni litaxtuw talakgalhin chu linin. Biblia wan pi Adán kinkastamakgan ktalakgalhin (Romanos 7:14). Pero ¿anan akgtum takgalhkgalhin kimpalakatakan? Chuna.

7, 8. ¿Tuku akgtum talakgmaxtut?

⁷ ¿Tuku akgtum talakgmaxtut? Wa tuku mastakan xlakata nalixokgokan tuku natamawaparakan o wi tiku nalakgmaxtukan, la komo tiku kgalhankanit. Nachuna, wa lixokgon nema wi tuku lakgxokgowili, nema xtachuna xtapalh kgalhi.

⁸ Nipara chatum lataman tlan xlakgaxokgolh tuku Adán xtlawanit akxni makglakgalhinalh chu kinkaliminin linin. Pero Jehová wililh tuku tlan xkinkalilakgmaxtun ktalakgalhin chu klinin. Kaʼakxilhwi tuku uma talakgmaxtut chu la litamakgtayayaw.

JEHOVÁ MASTA TALAKGMAXTUT

9. ¿Tukuya talakgmaxtut xtalakaskin?

⁹ Nipara chatum lataman tlan kxokgolh latamat nema makgatsankgalh Adán. ¿Tuku xlakata? Xlakata putum akinin makglakgalhinanin. Tuku xkalilakgmaxtuka latamanin na watiya xtapalh xlikgalhit xwanit latamat nema makgatsankgalh Adán (Salmo 49:7, 8). Wa xlakata Jehová «xokgolh tuku xtalakaskin» o tuku xtachuna (1 Timoteo 2:6). Wa xlakata xtalakaskin atanu latamat nema ni xkgalhilh talakgalhin.

10. ¿Tuku tlawalh Jehová xlakata namasta talakgmaxtut?

¹⁰ ¿Tuku tlawalh Jehová xlakata namasta talakgmaxtut? Makamilh Jesús kKatiyatni, xKgawasa tiku tlakg paxki (1 Juan 4:9, 10). Jesús xatapaxuwan makgxtakgli xTlat chu xlatamat anta kʼakgapun (Filipenses 2:7). Jehová wililh xlatamat Jesús kxpan María. Chuna Jesús lakachilh kKatiyatni la chatum lataman tiku ni xkgalhi talakgalhin (Lucas 1:35).

11. ¿La tlan xkalakgmaxtulh putum latamanin kaj chatum chixku?

¹¹ Xapulana chixku ni kgalhakgaxmatli Jehová chu tlawalh pi kimputumkan xmakgatsankgaw latamat nema ni kgalhi talakgalhin. ¿Tlan chatum chixku xkalakgmaxtulh putum latamanin? Chuna (kalikgalhtawakga Romanos 5:19). Jesús nikxni makglakgalhinalh, wa xlakata tlan xmakamastalh xlatamat xlakata nakinkalakgmaxtuyan klinin putum akinin xlakkamanan Adán (1 Corintios 15:21, 22, 45).

12. ¿Tuku xlakata Jesús lu patinalh?

¹² Biblia lichuwinan pi Jesús lu patinalh akxni nina xniy. Kgesnokgka, xtokgowakaka kkgantum kiwi, xkatsanima chu ni lakapala nilh (Juan 19:1, 16-18, 30). ¿Tuku xlakata Jesús lu patinalh? Xlakata Satanás xwanit pi putum lataman xʼamakgolh makgxtakgkgo Dios komo lu xpatinankgolh. Jesús limasiyalh pi chatum chixku tiku ni kgalhi talakgalhin tlan ni namakgxtakga Dios maski lu namakgapatinankan. ¡Lu tlan xlimakgkatsi Jehová xlakata xKgawasa! (Proverbios 27:11). (Kaʼakxilhti nota 15, niku wan «Cruz»).

13. ¿La xokgoka talakgmaxtut?

¹³ ¿La xokgoka talakgmaxtut? Kilhtamaku 14 xla nisán papaʼ xla calendario judío kata 33, Jehová mastalh talakaskin pi xmakgnika Jesús (Hebreos 10:10). Akgtutu kilhtamaku alistalh, Jehová maxkipa xlatamat Jesús, pero nichuna la chatum lataman wata la chatum espíritu. Alistalh, akxni Jesús taspitpa kʼakgapun, makamaxkilh xTlat xtapalh xlatamat nema ni xkgalhi talakgalhin chu chuna xokgolh talakgmaxtut (Hebreos 9:24). Xlakata xokgoka talakgmaxtut, akinin kgalhiyaw talakgalhaman pi tlan nalakgtaxtuyaw ktalakgalhin chu klinin (kalikgalhtawakga Romanos 3:23, 24).

TALAKGMAXTUT KINKAMAKGTAYAYAN

14, 15. ¿Tuku natlawayaw xlakata Jehová nakinkatapatiyan?

¹⁴ Pulaklhuwa la kinkamakgtayayan talakgmaxtut. Kaʼakxilhwi la kinkamakgtayayan la uku chu la nakinkamakgtayayan kkilhtamaku nema aku mima.

¹⁵ Tlan nakinkatapatikanan. Tuwa tamakgkatsi ankgalhin natlawayaw tuku xatlan. Putum akinin tlawayaw chu wanaw tuku nitlan. ¿La tlan nakinkatapatikanan? Talakaskin nitlan nalimakgkatsiyaw chu namakgxtakgaw tuku nitlan tlawanitaw, chu nawaniyaw Jehová pi kakinkatapatin. Komo chuna natlawayaw, liwana katsiyaw pi xla nakinkatapatiyan (Colosenses 1:13, 14; 1 Juan 1:8, 9).

16. ¿Tuku talakaskin natlawayaw xlakata nakgalhiyaw akgtum tlan talakapastakni?

¹⁶ Tlan nakgalhiyaw xatlan talakapastakni. Komo kintalakapastaknikan kinkawaniyan pi tlawanitaw tuku nitlan, nitlan limakgkatsiyaw. Max asta namakgkatsiyaw pi nitu litaxtuyaw chu nalakpuwanaw pi nialhla tuku katitlawaw. Pero ni kataxlajwaniw. Katasaskiniw Jehová pi kakinkatapatin. Komo chuna natlawayaw, liwana kakatsiw pi xla nakinkakgaxmatniyan chu nakinkatapatiyan (Hebreos 9:13, 14). Jehová lakaskin pi nawaniyaw putum kintaʼakglhuwitkan o tuku makgkatsiyaw pi nila makgatlajayaw (Hebreos 4:14-16). Chuna nakgalhiyaw akgtum tlan talakapastakni kxlakatin Dios.

17. ¿Tukuya tasikulunalin tlan nalipaxuwayaw xlakata Jesús nilh kimpalakatakan?

¹⁷ Tlan nalatamayaw putum kilhtamaku. «Taskgaw nema masta talakgalhin wa linin, pero tamaskiwin nema Dios masta xpalakata kiMalanakan Cristo Jesús wa latamat nema ni kgalhi xlisputni» (Romanos 6:23). Xlakata Jesús nilh kimpalakatakan, kgalhiyaw takgalhkgalhin nalatamayaw putum kilhtamaku chu nikxni natatatlayaw (Apocalipsis 21:3, 4). ¿Tuku tlan natlawayaw xlakata nalipaxuwayaw umakgolh tasikulunalin?

KAPAXTIKATSINI TALAKGMAXTUT

18. ¿Tuku likatsiyaw pi Jehová kinkapaxkiyan?

¹⁸ Kalilakpuwaw la lipaxuwayaw akxni wi tiku kinkamaxkiyan akgtum stlan tamaskiwin. Talakgmaxtut wa tamaskiwin nema tlakg lanka xtapalh nixawa amakgapitsin chu talakaskin pi lu nalipaxtikatsiniyaw Jehová. Juan 3:16 lichuwinan pi «Dios lu kapaxkilh kakilhtamaku, wa xlakata mastalh kaj xachastum xKgawasa». Chuna, Jehová lu kinkapaxkiyan wa xlakata mastalh xKgawasa kimpalakatakan, tiku lu xpaxki, Jesús. Chu katsiyaw pi Jesús na kinkapaxkiyan xlakata xatapaxuwan nilh kimpalakatakan (Juan 15:13). Tamaskiwin xla talakgmaxtut kinkalimasiyaniyan pi Jehová chu Jesús xlikana kinkapaxkikgoyan kinchatunukan (Gálatas 2:20).

19. ¿Tuku tlan natlawaya xlakata xʼamigo Jehová nalitaxtuya?

¹⁹ Xlakata la uku katsiyata pi Jehová lu kinkapaxkiyan, ¿tuku tlan natlawaya xlakata xʼamigo nalitaxtuya? Kalakgapasti Jehová. Lu tuwa napaxkiya tiku ni lakgapasa. Wa xlakata, Juan 17:3 kinkamakgpuwantiniyan nalakgapasaw Jehová. Komo wix chuna natlawaya, tlakg namakgapaxuwaputuna chu xʼamigo nalitaxtuya. Wa xlakata chuntiya kalikgalhtawakga Biblia xlakata tlakg nalakgapasa Jehová (1 Juan 5:3).

20. ¿La tlan nalimasiyaya pi kgalhiniya takanajla talakgmaxtut?

²⁰ Kalimasiya pi kanajlaniya talakgmaxtut. Biblia lichuwinan pi «tiku nalimasiya pi kanajlani xaKgawasa kgalhi latamat nema ni kgalhi xlisputni» (Juan 3:36). ¿La limasiyayaw pi kgalhiyaw takanajla? Natlawaya tuku Jesús masiyalh (Juan 13:15). Ni kajwatiya talakaskin nawanaw pi kanajlaniyaw Jesús. Tuku tlawayaw nalimasiya pi kgalhiniyaw takanajla talakgmaxtut. Santiago 2:26 wan pi «kintakanajlakan, komo ni kgalhi laktlan tatlaw xtachuna la xanin» wi chu nitu litaxtu.

21, 22. 1) ¿Tuku xlakata kiliʼanatkan akgatunu kata Akxni lakapastakkan akxni tinilh Cristo? 2) ¿Tuku naʼakxilhaw kcapítulos 6 chu 7?

²¹ Kapit Akxni lakapastakkan akxni tinilh Cristo. Katsisni akxni nina xniy, Jesús wa pi kililakapastakatkan akxni nilh. Chuna tlawayaw akxni anaw akgatunu kata akxni lakapastakkan «xTaway Malana» (1 Corintios 11:20; Mateo 26:26-28). Jesús lakaskin pi nalakapastakaw pi mastalh xlatamat nema ni kgalhi talakgalhin xlakata nakinkalakgmaxtuyan. Xla wa: «Chuntiya katlawatit uma xlakata nakililakapastakatit» (kalikgalhtawakga Lucas 22:19). Akxni anaw kʼuma tamakxtumit, limasiyayaw pi lakapastakaw talakgmaxtut chu tapaxkit nema Jehová chu Jesús kinkakgalhinikgoyan. (Kaʼakxilhti nota 16, niku wan «Akxni lakapastakkan akxni tinilh Cristo»).

²² Nitu atanu tamaskiwin nema tlakg lanka xtapalh nixawa talakgmaxtut (2 Corintios 9:14, 15). Kcapítulos 6 chu 7 naʼakxilhaw la talakgmaxtut nakamakgtaya lhuwa latamanin tiku nikgonita.