PULAKTATI
Nitlan limakgkatsikan talakgalhin: «Kakinchakgemakgani wakg kintalakgalhin»
Martha wan: «Xasasti kintaskujut kimakgtayalh xlakata kifamilia tlakg tlan xtawilalh, pero tipalhuwa tuku nitlan kimatlawilh. Ktsukulh makgtlawa makgapitsi paskua, kmakgtanulh kpolítica chu asta kkilalh ksikulan. Titaxtulh 40 kata lata ni xtatayana Jehová klitaxtulh. Chuna la tlakg xtitaxtu kilhtamaku, tlakg xaklakpuwan pi Jehová nila xkintapatilh. Xakmakgkatsi pi nila kiʼakstu xkintapatika tuku xaktlawanit. Xlakata xakkatsiya pi nitlan tuku xaktlawama akxni ktsukulh tiya nixatlan tiji».
AKXNI nitlan limakgkatsikan talakgalhin kitaxtu la akgtum tsinka takuka. Mapakgsina David tsokgli: «Kintalakgalhin wi kkiʼakgxekga; xtachuna la tsinka takuka, lu lhuwa chu nila kkukalin» (Salmo 38:4, TNM). Makgapitsi kstalaninanin Cristo lu lipuwankgo chu lakpuwankgo pi Jehová nikxni katikapatilh (2 Corintios 2:7). ¿Xlilat chuna nalakpuwankgo? Komo tlawanita lanka talakgalhin, ¿wamputun pi Jehová nikxni natapatiyan? Ni, nichuna.
«Kalakkaxtlawaw taʼakglhuwit»
Jehová ni kamakgxtakga tiku nitlan limakgkatsikgo xtalakgalhinkan. Xla kaputsa. Kparábola xla kgawasa tiku akglakgwa lilh xlatamat, Jesús tamalakxtumilh Jehová la chatum xapaxkina tlat tiku xkgalhi xkgawasa nema kaʼakgxtakgwililh chu lu nitlan tsukulh lin xlatamat. Titaxtulh kilhtamaku, lakpuwa nataspitpara kxchik. «Cha nchu makgatku xminacha; ukxilhli tunkan xtlat; tunkan kgayaj katsanilh; kgosnalh; alh paxtokga [o taxtokgti]; na snatli tunkan; chu [...]tsukli.» (Lucas 15:11-20.) Chu wix, ¿talakatsuwiniputuna Jehová pero makgkatsiya pi lu «makgatku» wila? Chuna la xatlat nema Jesús lichuwinalh, Jehová lu lakgalhamanan. Chu lu lakaskin kalakgtaspitti.
Pero ¿chu komo lakpuwana pi mintalakgalhin lu lanka o lu lhuwa xlakata Jehová tlan natapatiyan? Kalilakpuwanti tuku Jehová waniyan kʼIsaías 1:18: «Jehová wan: “Katantit, chu kalakkaxtlawaw taʼakglhuwit wixin chu akit. Maski mintalakgalhinkan xtachuna la escarlata, xasnapapa la miki nawankgo”». Chuna, maski mintalakgalhin tasiya la escarlata kxasnapapa lhakgat nema nila taktani, Jehová tlan natapatiyan.
Jehová ni lakaskin chuntiyaku nalipatinana xlakata nitlan limakgkatsiya mintalakapastakni. ¿Tuku tlan natlawaya xlakata natapatiyan Dios chu tlan natawilapara mintalakapastakni? Kaʼakxilhwi pulaktiy tuku tlawalh David. Pulana, xla wa: «Nakwani Jehová tuku nitlan ktlawanit» (Salmo 32:5, TNM). Kalakapastakti pi Jehová waniyan katlawani oración xlakata natalakatsuwiniya chu nalakkaxtlawayatit taʼakglhuwit. Katlawa tuku skiniyan. Kawani mintalakgalhin chu tuku makgkatsiya. Xlakata tuku titaxtulh David, tlan tlawalh uma oración: «Kakinchakgemakgani wakg kintalakgalhin. [...] Ama ti nak ixnaku snun lipuwan, akxni tlawa tu nitlan y takgalhtutsuwij [o tataktuju], wix ni lakgmakgana» (Salmo 51:2, 17).
Xlipulaktiy, chatum xlakskujni Jehová, palakachuwina Natán, makgtayalh David (2 Samuel 12:13). La uku, Jehová wilinit lakgkgolotsin kcongregación nema kamasiyanikanit la nakamakgtayakgo tiku nitlan limakgkatsikgo xtalakgalhinkan xlakata tlan natalalimparakgo Jehová. Akxni nakatalakatsuwiniya lakgkgolotsin xalak congregación, nalimaklakaskinkgo Biblia chu natlawakgo oración mimpalakata xlakata tlan nalimakgkatsiya o nialh lu nalipuwana, chu namakgtayakgoyan tlan natawilapara mintakanajla (Santiago 5:14-16).
Jehová lakaskin pi nachuna tlan kamakgkatsi kmintalakapastakni
«Lipaxaw makglhkatsi ama ti matsankgenikanit ixtalakgalhin»
Xlikana, max wa tuku tlakg tuwa namakgkatsiya natlawaya wa nawaniya Jehová Dios tuku nitlan tlawanita chu nakawaniya lakgkgolotsin. David nachuna xmakgkatsi. Xla wa pi “ni xlitayaputun” xtalakgalhin (Salmo 32:3). Pero alistalh paxtikatsininalh tuku tlan kitaxtunilh xlakata litayalh xtalakgalhin chu lakgpalilh xtayat.
Tuku tlakg tlan kitaxtunilh David wa pi paxuwapa. Xla tsokgli: «Lipaxaw makglhkatsi ama ti matsankgenikanit ixtalakgalhin, ama ti wakg xapanikanit tu nitlan tlawanit» (Salmo 32:1). Na tlawalh uma oración: «Dios, kakimaxki tachiwin xlakata kinkilhni nalikgalhchiwinan mintalakgalhaman» (Salmo 51:15). Xlakata tlan xmakgkatsi chu xpaxtikatsini Jehová xlakata xtapatinit, David kalitachuwinalh amakgapitsin xlakata Jehová.
Jehová lakaskin pi nachuna tlan kamakgkatsi kmintalakapastakni. Chu lakaskin nakalitachuwinana xtukuwani amakgapitsin chu tuku lakapastaknit natlawa, pero ni lakaskin pi chuntiya nitlan nalimakgkatsiya mintalakgalhin, wata lu xatapaxuwan natlawaya (Salmo 65:1-4). Kalakapastakti uma tuku kinkawaniyan: «Katalakgpalitit kmintapuwankan, lakimpi nataxapay mintalakgalhinkan; lakimpi chuna nakaminiyan ntakgtsiyajna [o takaksni] kxlakatin nkimPuchinakan» (Hechos 3:19).
Wa uma tuku titaxtulh Martha. Xla wan: «Kinkgawasa tsukulh kimalakgachani revistas Makatsinina chu ¡Despertad! Tsinu tsinu ktsukupa ktalalin Jehová. Pero tuku tlakg tuwa kmakgkatsilh akxni ktaspitli, wa nakskini Jehová xkintapatilh xlakata putum talakgalhin nema xaktlawanit. Pero alistalh ktlawanilh oración Jehová chu kskinilh xkintapatilh. Nila takanajla pi 40 kata titaxtulh xlakata naklakgtaspitpara Jehová. Tuku ktitaxtulh limasiya pi maski lhuwa kata tamakgatlinikan Dios, tlan amakgtum naskujnaniparakan Dios chu nakgalhiparakan xtapaxkit».