Kalakgtaspittit “xmapuchwayanina, chu xkuentajtlawana milatamatkan”

LIWANA kakatsi pi Jehová kgalhkgalhiman nalakgtaspita. Namakgtayayan natayaniya mintalakgaputsit, nialhtu nalilipuwana chu tlan natawila mintapuwan chu minaku xlakata nialhtu xkajwanananit nawan mintalakapastakni. Alistalh max nakataskujparaya tiku kakninanikgo Jehová. Tuku titaxtupat max xtachuna la makgapitsi kstalaninanin Cristo kxapulana siglo, tiku apóstol Pedro katsokgnanilh: «Wixin xtachuna xaʼakgtsankgan kalhnilu xwanitantit, wampi wa nchu lakgtapuspitpalanitantit mapuchwanina, chu [...] nkuintaj xtlawana milistaknakan» (1 Pedro 2:25).

Komo nalakgtaspita Jehová wa tuku tlakg tlan natlawaya. ¿Tuku xlakata? Xlakata namakgapaxuwaya (Proverbios 27:11). Wix katsiya pi Jehová na makgkatsi, chu tuku tlawayaw makgalipuwan o makgapaxuwa. Pero ni fuerza tlawa pi kapaxkiw chu kaskujnaniw (Deuteronomio 30:19, 20). Chatum tiku lakputsanani Biblia, wa: «Nila atanu tiku nawan mimpalakata tuku makgkatsiya kminaku. Talakaskin wix nawana tuku makgkatsiya». Akxni nakakninaniyaw Jehová xlakata paxkiyaw, limasiyayaw tuku wi kkinakujkan. Akxni chuna tlawayaw maxkiyaw tlakg xlakaskinka tamaskiwin, wa pi ni makgatsankgananiyaw, chu uma lu makgapaxuwa. Xlikana, ni anan atanu tuku tlan natamalakxtumiyaw tapaxuwan nema makgkatsiyaw akxni maxkiyaw Jehová takaknin nema lakgchan (Hechos 20:35; Apocalipsis 4:11).

Nachuna, akxni tsukuparayaw kakninaniyaw Dios, tatliwakglhpara kintakanajlakan (Mateo 5:3). ¿Tuku xlakata chuna wanaw? Latamanin xalak kakilhtamaku akstu kakgalhskinkan: «¿Tuku xlakata lamaw unu?». Katsiputunkgo xtakgalhtin makgapitsi takgalhskinin xlakata latamat. Katsiputunkgo, xlakata Jehová chuna katlawanit. Kinkatlawanitan xlakata napaxuwayaw akxni naskujnaniyaw. Chu akxni katsiyaw pi skujnanimaw Jehová xlakata paxkiyaw wa tuku tlakg kinkamakgapaxuwayan (Salmo 63:1-5).

Jehová lakaskin pi nalakgtaspita. ¿La likatsiyaw pi chuna lakaskin? Kalilakapastakti uma. Lu lhuwa oración tatlawalh xlakata liwana xtlawaka uma folleto. Max chatum kgolotsin maxkin o atanu tiku na nakanajla la wix. Alistalh lakpuwanti nalikgalhtawakgaya chu namakgamakglhtinana uma tamakatsin. Putum uma limasiya pi Jehová chuntiya lakapastakan. Wata xatapaxuwan waniyan kalakgtaspitpara (Juan 6:44).

Lu tlan limakgkatsiyaw xlakata katsiyaw pi Jehová putum kilhtamaku kalakapastaka xlakskujnin. Wa uma tuku tala Donna lu paxtikatsininalh. Xla wan: «Tsinu tsinu ktsukulh tamakgatlini xaxlikana takanajla, pero xmin kilhtamaku xakmakgkatsi chuna la wan Salmo 139:23, 24, [TNM], nema wan: “Liwana kakilakputsanani, oh Dios, chu kalakgapasti kinaku. Kakimputsanani chu kalakgapasti talakpuwan nema klilakgaputsama. Kaʼakxilhti komo ktiyama tiji nema nakilimini takatsanajwa. Chu kakimpulalipi ktiji nema ni kgalhi xlisputni”. Xakkatsi pi ni xaktapakgsi kakilhtamaku chu nikxni lipaxuw kmakgkatsilh anta, xakkatsi pi kxkachikin Jehová kilitawilat xwanit. Kkatsilh pi Jehová nikxni xkimakgxtakgnit; kaj xtalakaskin xaktekgsli tiji xlakata xaklakgtaspitli. Chu lu klipaxuwa pi chuna ktlawalh».

Lu klakaskinaw pi amakgtum nakgalhiparaya «xtapaxuwan Jehová» (Nehemías 8:10). Komo nalakgtaspita nikxni katilakpuwanti pi nitlan tuku tlawa.