¿Tlan nakimakgtaya Biblia?

¿TUKU XTLAWA WIX?

Kalilakpuwanti uma: David ama kxputlaw lakatum niku ni lakgapasnan. Akxni akxilha xtukuwani tiji chu laklanka chiki, akxilha pi ni anta wi niku xlitawilat. Tsankganit. Max wi niku tanu tiji tiyalh.

Komo wix David xwanti, ¿tuku xtlawa?

KALAKPUWANTI

Pulaklhuwa tuku tlan natlawaya:

1. Wi tiku nakgalhskina xlakata tlan nachipina niku xpimpat.

2. Naʼakxilha mapa o namaklakaskina GPS.

3. Chuntiya namatlawaniya mimputlaw asta akxni natekgsa mintiji.

Xlikana pi xlipulaktutu wa tuku tlakg nitlan.

Xlipulaktiy tlakg tlan nixawa xapulana: nakgalhiya mapa o GPS chu uma tlan napulalinan kputuminika tiji.

Biblia na tlan chuna namakgtayayan.

Libro nema tlakg tastanit lata makgasa tlan namakgtayayan:

• Napulalinan akxni natitaxtuya taʼakglhuwit.

• Namakgtayayan tlakg nalakgapaskana chu tlakg tlan nalikatsiya.

• Namasiyaniyan la tlakg tlan nalatapaya.

XTAKGALHTIN XLAKASKINKA TAKGALHSKININ XLA LATAMAT

Lata katsiniyaw chuwinanaw, tsukuyaw tlawayaw takgalhskinin:

• ¿Tuku xlakata akgapun xaspupuku?

• ¿Tuku litatlawanit staku?

Alistalh tsukuyaw tlawayaw takgalhskinin xlakata tuku la kkakilhtamaku:

• ¿Tuku xlakata la tuku nitlan?

• ¿Tuku xlakata niyaw?

¿Xkatsiya pi Biblia masta xtakgalhtin umakgolh takgalhskinin?

Lhuwa latamanin wankgo pi Biblia litsama cuentos chu leyendas, o wankgo pi maktum libro xala makgasa chu lu tuwa akgatekgsnikan. Pero ¿xlikana uma? ¿Xlikana tuku wankgo xlakata Biblia? ¿Max kaj ni liwana katsikgo xlakata uma?

Akgtum liʼakxilhtit, latamanin kanajlakgo pi wa Dios mapakgsinama kkakilhtamaku. Pero ¿xlilat chuna nalakpuwankan? Uma kakilhtamaku lu nitlan wi. Kaniwa niku akxilhaw takatsanajwat chu tapatin, tajatat chu linin, anankgo tiku limaxkgen chu lhuwa tuku masputunan. Chatum Dios tiku paxkinan, ¿tlan xtlawalh putum uma?

¿Katsiputuna tiku mapakgsi uma kakilhtamaku? Takgalhtin nema masta Biblia kaks namalakawaniyan.

Akxilhti pi tastakyaw nema tamasta kʼuma folleto takilhti kBiblia. Xtatayananin Jehová kanajlakgo pi Biblia pulalinan chu tlan lipawankan xlakata wa «wa xʼespíritu Dios pulalilh xlakata natsokgkan chu makgtayanan xlakata namasiyakan, xlakata nastakyawanankan, xlakata nalilakgpalikan tuku nitlan tatlawama» (2 Timoteo 3:16, 17, TNM). Kalakgapasti uma libro nema makgasa tlawakanit chu la uku chuntiyaku makgtayayan.