Liʼakxilhka xtakanajla

Abrahán masiyanilh xkgawasa Isaac napaxki Jehová chu nalipawan putum tuku malaknu. Pero akxni Isaac xkgalhi max 25 kata, Jehová skinilh Abrahán pi xtlawalh tuku lu tuwa. ¿Katsiya tuku skinilh?

Dios wanilh Abrahán: “Katlawa litlan, katiya chastum minkgawasa chu kakimakamaxki kʼakgtum sipi xalak kxtiyat Moria”. Abrahán nipara tsinu xkatsi tuku xlakata Jehová chuna skinilh, pero kgalhakgaxmatli.

Lichali tsisa, Abrahán lilh xkgawasa chu chatiy kskujnin anta kMoria. Akxni xtitaxtunita akgtutu kilhtamaku, lakgamakgat tsukukgolh akxilhkgo sipi. Abrahán kawanilh kskujnin pi xkgalhkgalhikgolh xlakata xla chu Isaac xʼama mastakgo tamakamastan. Abrahán lilh kuchillo chu maxkilh kiwi xkgawasa nema xlimalhkuyukgolh. Isaac kgalhskilh xtlat: “¿Niku wi animal nema namakamastayaw?”. Abrahán kgalhtilh: “Kinkgawasa, Jehová nakinkamaxkiyan”.

Akxni chankgolh ksipi, tlawakgolh pumakamastan. Alistalh Abrahán makachilh chu tantuchilh Isaac chu mamilh kpumakamastan.

Abrahán tiyalh kuchillo. Chu xʼángel Jehová chuwinalh kʼakgapun: “¡Abrahán! ¡Nitu katlawani minkgawasa! La uku kkatsi pi lipawana Dios, xlakata xpimpat makamastaya minkgawasa”. Chu Abrahán akxilhli tantum borrego nema xlilakgnuya xʼakgalokgot kkgantum aktsu kiwi. Wa xlakata tunkun xkutli Isaac chu wata wa borrego makamastalh.

Lata ama kilhtamaku, Jehová wanilh pi xʼamigo xwanit. ¿Katsiya tuku xlakata? Xlakata Abrahán tlawalh putum tuku skinilh Jehová, maski ni xkatsi tuku xlakata chuna kskinima.

Jehová wanipa Abrahán tuku xmalaknuninit: “Naksikulunatlawayan chu nalhuwana, lhuwa kamanan nakmaxkiyan”. Uma xwamputun pi xpalakata xfamilia Abrahán, Jehová xʼama kamaxki tuku tlan putum tiku tlan tayat xkgalhikgolh.