Jacob chu Esaú lakkaxtlawakgo xtaʼakglhuwitkan

Jehová malaknunilh Jacob pi xʼama kuentajtlawa chuna la kuentajtlawalh Abrahán chu Isaac. Jacob latamalh kʼHarán. Anta tamakgaxtokgli, kgalhilh akgtum lanka familia chu lhuwa tuku kgalhilh.

Titaxtulh kilhtamaku, Jehová wanilh Jacob: “Kataspitti kxtiyat minatlatni”. Wa xlakata, Jacob chu xfamilia ankgolh. Ktiji, makgapitsi kskujnin minkgolh wanikgo: “Mintala Esaú kinkalakgmiman chu limima 400 lakchixkuwin”. Jacob xpekuan pi Esaú wi tuku xtlawaniputulh chu nachuna xfamilia. Wa xlakata tlawanilh oración Jehová: “Katlawa litlan, kakilakgmaxtu xlakata nitu nakintlawani kintala”. Lichali, Jacob malakgachanilh Esaú tamaskiwin: lhuwa borregos, cabras, wakax, camellos chu burros.

Ama katsisni, akxni Jacob xakstu tamakgxtakgli, akxilhli chatum ángel. Ángel tsukulh talachipa. Latalachipalh asta lichali tsisa. Maski nitlan tuku lanilh Jacob, tayanilh. Ángel wanilh: “Kakimaxki talakaskin nakan”. Pero Jacob kgalhtilh: “Ni, asta akxni nakisikulunatlawaya”.

Xaʼawatiya, ángel sikulunatlawalh Jacob. La uku Jacob xkatsi pi Jehová ni xʼama masta talakaskin pi Esaú wi tuku xtlawanilh.

Ama tsisa, Jacob lakgamakgat akxilhli Esaú chu 400 lakchixkuwin. Taxtulh akxni nina xtaxtukgo xfamilia xlakata xtatanokgli Esaú chu akxni lakgchalh, makgtujun takilhputanilh. Esaú lakapala lakgalh Jacob chu akgpixtilh. Xchatiykan tsukukgolh tasakgo chu lakkaxtlawakgolh xtaʼakglhuwitkan. ¿Lakpuwana pi Jehová lakgatilh tuku tlawalh Jacob?

Akxni chuna lalh, Esaú taspitli kxchik chu Jacob ampa niku xʼama. Jacob xkgalhi 12 lakgkgawasan: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, chu Benjamín. Jehová xʼama lilakgmaxtu xkachikin chatum xkgawasa Jacob, wanikan José. ¿Katsiputuna la tlawalh? Kaʼakxilhwi.