¿Tiku xwanit Job?

Kʼakgtum kachikin nema xwanikan Uz, xlama chatum chixku nema xkakninani Jehová. Xwanikan Job, lanka rico xwanit chu xkgalhi akgtum lanka familia. Xla tlan xlikatsi, xkamakgtaya tiku nitu xkgalhikgo, lakpuskatin tiku xnikgonita xchixkukan chu kamanan tiku ni xkgalhikgo xnatlatnikan. Job xtlawa tuku tlan ¿Lakpuwana pi xlakata uma nikxni xkgalhi taʼakglhuwit?

Job ni xkatsi, pero Akgskgawini xʼakxilhma. Jehová wanilh Satanás: “¿Akxilhnita kiskujni Job? Niti anan tiku xtachuna kkatiyatni. Kgalhakgaxmatnan chu tlan lin xlatamat”. Satanás kgalhtilh: “Job kgalhakgaxmatan xlakata makgtayaya, sikulunatlawaya, maxkiya pukuxtu chu animales... Kamakglhti putum tuku kgalhi chu nialh katikakninanin”. Jehová wanilh: “Tlan naliʼakxilha, pero kwaniyan pi ni namakgniya”. Jehová mastalh talakaskin pi Satanás xliʼakxilhli Job, ¿katsiya tuku xlakata? Xlakata liwana xkatsi pi Job chuntiya xʼama kgalhakgaxmata.

Pulaklhuwa tuku Satanás tlawanilh Job xlakata naliʼakxilha. Pulana maklakaskilh tiku xkawanikan sabeos xlakata xkgalhankgolh xwakax, xtoros chu xburros. Alistalh, laklhkutamakgolh xborregos. Atanu tiku xkawanikan caldeos, lakgakgalhankgolh xcamellos. Na nikgolh kskujnin tiku xkuentajtlawamakgo xʼanimales. Pero tuku tlakg nitlan, lalh alistalh: nikgolh putum xkamanan Job akxni kaʼaktamalh chiki niku xwayamakgolh. Job lu lilipuwa, pero chuntiya kakninanilh Jehová.

Satanás xlakaskin pi Job tlakg xpatinalh, wa xlakata tlawalh pi xtaxtunilh tsitsi putum kxmakni. Uma lu xmapatini xlakata lu xkatsani. Xla ni xkatsi tuku xlakata xtitaxtuma lhuwa tuku nitlan, pero chuntiya kakninanilh Jehová. Dios akxilhli uma chu lu makgapaxuwalh tuku tlawalh Job.

Alistalh, Satanás kamalakgachalh kgalhtutu lakchixkuwin xlakata naliʼakxilhkgo Job. Xlakan wanikgolh: “Max tlawa talakgalhin chu matsekgputuna. Wa xlakata Dios malakgaxokgeman”. Job kgalhtinalh: “Akit ni ktlawanit tuku nitlan”. Pero alistalh tsukulh lakpuwan pi wa xkuenta Jehová putum xtaʼakglhuwit chu wa pi Dios nitlan xlikatsinima.

Chatum kgawasa xwanikan Elihú xkgaxmatma tuku xlichuwinamakgo, chu nitu xwan. Pero lakpuwa nachuwinan chu wa: “Mimputumkan nixlikana tuku lichuwinampatit. Jehová lu tlan likatsi, nixawa la lakpuwanaw, xla nikxni xtlawalh tuku nitlan. Putum akxilha chu kamakgtaya latamanin akxni kgalhikgo taʼakglhuwit”.

Jehová na tachuwinalh Job. Wanilh: “¿Niku xwila akxni ktlawalh akgapun chu katiyatni? ¿Tuku xlakata lakpuwana pi nitlan klikatsi? Chuwinana chu ni lakpuwana tuku xlakata chuna lama”. Job wa pi xʼakgtsankganit chu wa: “Nitlan tuku klakpuwama. Kakintapati xlakata tuku kwa. Xakkgaxmatnit mimpalakata, pero la uku xlikana klakgapasan chu kakxilha pi wix putum matlaniya”.

Akxni sputli tuku xliʼakxilhmaka, Jehová mapaksalh Job chu tlakg lhuwa maxkilh nixawa tuku xkgalhi. Job makgas latamalh chu xatapaxuwan. Jehová sikulunatlawalh xlakata putum kilhtamaku kgalhakgaxmatnalh, maski milh kilhtamaku tuwa makgkatsilh. ¿Chu wix? ¿Nachuna nawana la Job chu putum kilhtamaku nakakninaniya Jehová maski katuwa tuku nala?