Josué chu gabaonitas

Amakgapitsi kachikinin xalak Canaán katsikgolh tuku akgspulalh Jericó. Xmapakgsinakan umakgolh kachikin lakapastakkgolh makxtum nalakgo xlakata natalatlawakgo israelitas. Pero tiku xlamakgolh k’Gabaón wi tuku lakpuwankgolh. Lilhakganankgolh xataxtitni xlhakgatkan, lakgankgolh Josué chu wanikgolh: “Xala makgat kminitanchaw. Kkgaxmatnitaw xlakata Jehová, chu putum tuku tlawanit mimpalakatakan k’Egipto chu kMoab. Komo nakilawaniyaw pi nitu nakilatlawaniyaw miskujnin naklitaxtuyaw”.

Josué kakanajlanilh chu kawanilh pi nitu x’amaka katlawanikan. Pero akgtutu kilhtamaku alistalh, Josué katsilh pi gabaonitas ni xalamakgat xwankgonit, wata xalak Canaán. Wa xlakata kakgalhskilh: “¿Tuku xlakata kilaʼakgskgawiw?”. Xlakan kgalhtinankgolh: “Xlakata xakpekuamaw. Kkatsiyaw pi Jehová miDioskan kamakgtayayan. Katlawatit litlan ni kakilamakgniw”. Josué makgantaxtilh xtachuwin chu nitu katlawanilh.

Ni lu makgas, kgalhakitsis mapakgsinanin xalak Canaán chu xsoldados ankgolh katalatlawakgo gabaonitas. Josué chu xsoldados tantaskaka tlawankgolh xlakata na’ankgo lakgmaxtukgo gabaonitas. Lichali lu tsisa tsukulh guerra. Cananeos tsukukgolh tsalakgo, pero Jehová tlawalh pi natakta laklanka chijit. Alistalh Josué skinilh Jehová pi chichini lakatum xtayalh. Chichini nikxni xtachokgonit. ¿Tuku xlakata Josué chuna skinilh Jehová? Xlakata lu xlipawan Jehová. Wa xlakata chichini ni tatsekgli. Ama kilhtamaku ni tsiswalh asta akxni israelitas katlajakgolh mapakgsinanin xalak Canaán chu xsoldados.