Rut chu Noemí

Milh kilhtamaku analh tatsinkstat kʼIsrael. Wa xlakata chatum puskat israelita, tiku xwanikan Noemí, taʼalh xchixku chu chatiy xkamanan kxtiyat Moab. Titaxtulh kilhtamaku, xchixku Noemí nilh. Xkamanan tatamakgaxtokgkgolh moabitas: Rut chu Orpá. Lu nitlan, pero alistalh xkamanan Noemí na nikgolh.

Akxni Noemí kgaxmatli pi nialh xʼanan tatsinksni kxkachikin, lakpuwa nataspitpara. Rut chu Orpá na taʼankgolh, pero ktiji Noemí kawanilh: “Wixin lu tlan kalikasinitit kinkamanan chu tlan nataskinin litaxtutit. Lu xaklakgatilh xtamakgaxtokgparatit. Kataspittit kminchikkan kMoab”. Lakpuskatin kgalhtinankgolh: “Lu kkapaxkiyan, ni miʼakstu kkamakgxtakgputunan”. Noemí makglhuwa kawanilh pi xtaspitkgolh kxkachikinkan. Alistalh, Orpá taspitli kxkachikin, pero Rut tamakgxtakgli. Noemí wanilh Rut: “Orpá taspitli kxkachikin chu kalakgtaspitli xdioses. Katapi chu kataspitti kxchik mintse”. Pero Rut kgalhtinalh: “Ni ktimakgxtakgni. Minkachikin kinkachikin nawan, chu miDios kiDios nawan”. ¿La lakpuwana pi makgkatsilh Noemí akxni Rut chuna wanilh?

Rut chu Noemí chankgolh kʼIsrael akxni xmakgalamaka cebada. Akgtum kilhtamaku Rut alh saka cebada nema xʼakgataxtunit kxtiyat Boaz, tiku xkgawasa Rahab xwanit. Boaz xkgaxmatnit pi Rut chatum moabita tiku ni xmakgxtakgnit Noemí. Xla kawanilh kskujnin pi tlakg xmakgxtakgkgolh cebada xlakata Rut ksakli.

Uma katsisni Noemí kgalhskilh Rut: “¿Tiku xpukuxtu kiskujti uku?”. Rut kgalhtilh: “Kxpukuxtu Boaz”. Noemí wanilh: “Boaz xtalilakgapasni kinchixku. Chuntiya kxpukuxtu kaskujti, kakataskujti amakgapitsi laktsuman. Anta tlan natawilaya”.

Rut anta skujli kxpukuxtu Boaz asta akxni makgalanankgoka. Boaz akxilhli pi Rut chatum lu tlan puskat chu lu skulujwa. Kʼuma kilhtamaku, komo chatum chixku xniy chu ni xkgalhi kamanan, chatum xtalilakgapasni tlan xtatamakgaxtokga puskat tiku xninita xchixku. Wa xlakata, Boaz tatamakgaxtokgli Rut. Kgalhikgolh chatum kgawasa chu wanikgolh Obed. Titaxtulh makgapitsi kata, Obed xtata mapakgsina David litaxtulh. Xʼamigas Noemí lu lipaxuwakgolh. Xwanikgo: “Pulana, Dios maxkin Rut, tiku lu tlan likatsininitan. Chu la uku kgalhiya chatum mintanat. Kamalankiw Jehová xlakata uma”.