Chatum soldado chu chatum aktsu tsumat

Anta kSiria, xwi chatum aktsu tsumat israelita tiku lu makgat xlinkanit chu ni xkatawi xfamilia. Soldados asirios xlinkgonit chu la uku kskujni xpuskat chatum xapuxku soldado wanikan Naamán. Uma tsumat xkakninani Jehová maski latamanin niku xwi ni xkakninanikgo.

Naamán xkgalhi lixkajni tajatat anta kxmakni chu lu xkatsan. Aktsu tsumat xmakgtayaputun, wa xlakata wanilh xpuskat Naamán: “Klakgapasa tiku tlan natlawa pi minchixku tlakg tlan namakgkatsi. Anta kʼIsrael wi chatum xpalakachuwina Jehová wanikan Eliseo. Xla tlan namapaksa minchixku”.

Xpuskat Naamán litachuwinalh tuku xwaninit aktsu tsumat. Xla katuwa tuku xlitsakgsaputun xlakata xpaksli chu wa xlakata alh kʼIsrael kxchik Eliseo. Naamán xlakpuwan pi Eliseo xʼama makgamakglhtinan la chatum tiku lu xlakaskinka. Pero Eliseo ni wa tiku makgamakglhtinalh, wata malakgachalh kskujni xlakata namakgamakglhtinan chu namaxki uma tamakatsin: “Kapit chu makgtujun kataju kkgalhtuchokgo Jordán. Chu chuna napaksa”.

Naamán lu ni lakgatilh chu wa: “Xaklakpuwan pi uma palakachuwina xʼama tachuwinan xDios chu xʼama matsuwi xmakan xlakata xkimapaksalh. Pero kajwatiya kiwanima pi nakan kʼuma kgalhtuchokgo xla Israel. Kkgalhiyaw tlakg lakwan kgalhtuchokgo anta kSiria. ¿Tuku xlakata nila nakan kʼumakgolh kgalhtuchokgo?”. Naamán lu sitsilh chu taxtulh kxchik Eliseo.

Kskujnin Naamán makgtayakgolh xlakata tlakg liwana xlakapastakli. Wanikgolh: “¿Nixlikana pi xtlawa putum tuku xtalakaskilh xlakata xpaksti? Tuku skiniman uma palakachuwina ni tuwa. ¿Tuku xlakata nichuna tlawaya?”. Naamán kakgalhakgaxmatli chu alh kkgalhtuchokgo Jordán chu makgtujun tajulh kkgalhtuchokgo. Akxni xlimakgtujun tajulh, Naamán xpaksnita akxni takutli. Lu paxuwalh chu taspitli xlakata namaxki paxtikatsinit Eliseo. Wanilh: “La uku kkatsi pi Jehová wa xaxlikana Dios”. Xpaksnita akxni Naamán taspitli kxchik. ¿La lakpuwana pi makgkatsilh aktsu tsumat israelita akxni akxilhli?