Xʼángel Jehová makgtayalh Ezequías

Tamapakgsin xalak Asiria xkaʼakgchipakgonit pulakkaw tribus xalak Israel. Pero mapakgsina xalak Asiria, Senaquerib, na xʼakgchipaputun akgtiy tribus xalak Judá. Wa xlakata akgatunu akgatunu kachikinin xalak Judá tsukulh kaʼakgchipa. Pero kachikin nema tlakg xlakaskin wa Jerusalén. Tuku Senaquerib ni xkatsi wa pi Jehová xmakgtayama uma kachikin.

Ezequías mapakgsina xalak Judá, lhuwa tumin xokgonilh Senaquerib xlakata ni xmasputulh Jerusalén. Senaquerib makgamakglhtinalh tumin, pero maski chuna, malakgachalh xalakgtliwakgan xsoldados xlakata xkamasputulh. Latamanin xalak kachikin lu xpekuamakgo xlakata tlakg xtalakatsuwimakgo asirios. Wa xlakata Ezequías kawanilh: “Ni kapekuantit. Asirios lakgtliwakgan, pero Jehová tlakg tliwakga nakinkatlawayan nixawa xlakan”.

Senaquerib malakgachalh xmakatsinina, Rabsaqué, xlakata xkalikgalhkgamanalh xalak Jerusalén. Rabsaqué tayalh kxkilhtin kachikin chu pixlanka wa: “Jehová nila kamakgtayayan. Ni kamastatit talakaskin pi Ezequías nakaʼakgskgawiyan. Nipara chatum Dios tlan nakalakgmaxtuyan kkimakankan”.

Ezequías kgalhskilh Jehová tuku xlitlawat chu Jehová kgalhtilh: “Ni kapekuani xtachuwin Rabsaqué. Senaquerib ni katiʼakgchipalh Jerusalén”. Alistalh, Ezequías makgamakglhtinalh xcartas Senaquerib nema xwan: “Katamakamastatit. Jehová nila katikalakgmaxtun”. Wa xlakata Ezequías tlawalh oración: “Jehová, katlawa litlan, kakilalakgmaxtuw, xlakata putum nakatsikgo pi kaj wix xaxlikana Dios”. Chu Jehová kgalhtilh: “Mapakgsina xalak Asiria ni katitanulh kJerusalén. Akit nakmakgtaya kinkachikin”.

Senaquerib liwana xkatsi pi xʼamaja akgchipa Jerusalén. Pero akgtum tsisni, Jehová malakgachalh chatum ángel niku xwilakgo asirios, kxkilhtin kachikin. ¡Ángel kamakgnilh 185,000 soldados! Mapakgsina Senaquerib makgatsankgalh xsoldados tiku tlakg lakgtliwakgan chu taspitli kxchik xlakata xtlajakanit. Chuna Jehová makgtayalh Ezequías chu Jerusalén, chuna la xwanit. Komo wix xtitawila kJerusalén, ¿xlipawanti Jehová?