Esdras masiyani kachikin xLimapakgsin Dios

Xtitaxtunita 70 kata akxni israelitas xtaspitparakgonit kJerusalén, maski makgapitsi chuntiyaku tanu tanu xlamakgolh kPersia. Chatum wa Esdras, sacerdote tiku xmasiya xLimapakgsin Jehová. Katsilh pi tiku xwilakgolh kJerusalén ni xkgalhakgaxmatmakgolh Limapakgsin, wa xlakata xʼamputun kamakgtaya. Artajerjes, mapakgsina xalak Persia, wanilh: “Dios maxkinitan liskgalala xlakata namasiyaya Limapakgsin. Wa xlakata kapit chu kakatapi tiku nataʼamputunkgoyan”. Esdras katatamakxtumilh putum tiku xtaspitputumparakgo kJerusalén. Skinikgolh Jehová pi xkakuentajtlawalh ktiji chu ankgolh.

Titaxtulh akgtati papaʼ, chankgolh kJerusalén. Chu príncipes xalak ama kachikin wanikgolh Esdras: “Israelitas ni kgalhakgaxmatkgonit Jehová chu tatamakgaxtokgkgonit lakpuskatin tiku kakninanikgo nixaxlikana dioses”. ¿Tuku tlawalh Esdras? Tatsokgostalh xlakatin kachikin chu tlawalh oración: “Jehová, lhuwa tuku tlawanita kimpalakatakan, pero akinin ktlawanitaw talakgalhin kmilakatin”. Kachikin nitlan limakgkatsikgolh tuku xtlawakgonit, pero chuntiyaku tlawakgolh tuku nitlan. Wa xlakata Esdras kalaksakli lakgkgolotsin chu jueces xlakata nalakputsananikgo uma. Akgtutu papaʼ kalitamakxtuka tiku ni xkakninaniputunkgo Jehová.

Titaxtulh 12 kata. Xpatsaps Jerusalén amakgtum kaxtlawaparakgoka. Esdras kamamakxtumilh latamanin kplaza xlakata nakalikgalhtawakgani xLimapakgsin Dios. Akxni malakkilh libro xla Limapakgsin, tiku anta xwilakgolh tayakgolh. Esdras malankilh Jehová, chu israelitas chaxkgolh xmakankan xlakata nalimasiyakgo pi tlan xʼakxilhkgo. Alistalh Esdras likgalhtawakgalh chu lichuwinalh Limapakgsin. Latamanin liwana kgaxmatkgolh. Katsikgolh pi amakgtum xtamakgatlinikgonit Jehová, chu tsukukgolh tasakgo. Lichali, Esdras chuntiyaku kalikgalhtawakganilh Limapakgsin. Israelitas katsikgolh pi nialh makgas xlitlawatkan xwanit Paskua xla Laktsu Chiki. Wa xlakata, tunkun tsukukgolh lakkaxwilikgo tuku xʼama tamaklakaskin kpaskua.

Israelitas lipaxuwakgolh paskua nema makgapalalh akgtujun kilhtamaku. Paxtikatsinikgolh Jehová xlakata lu tlan makgalanankgolh. Ni makgtum chuna xtlawakgonit Paskua xla Laktsu Chiki, lata xlama Josué. Akxni sputli paskua, tamakxtumikgolh chu tlawakgolh oración: “Jehová, wix kilalakgmaxtuw niku skujni xaklitaxtuyaw. Kilamaxkiw liwat kxakaskakni tiyat chu uma xastlan tiyat. Pero akinin makglhuwa ni kkakgalhakgaxmatnitan. Maski lhuwa kilamalakgachaniw palakachuwinanin xlakata nakinkawanikgoyan tuku nitlan xaktlawamaw, akinin ni kuenta ktlawaw. Maski chuna, ni lakapala sitsi. Ankgalhin lakapastakti tamalaknun nema tlawani Abrahán. La uku, kkawaniyan pi nakkakgalhakgaxmatan”. Kachikin tsokgwilikgolh tuku malaknukgolh chu príncipes, levitas chu sacerdotes lifirmarlikgolh akgtum sello.