Elisabet kgalhi kskgata

Chatum sacerdote xwanikan Zacarías chu xpuskat Elisabet, xlamakgolh lakatsu kJerusalén. Xtitaxtunita 400 kata lata xpatsaps Jerusalén xkaxtlawakgokanita. Zacarías chu Elisabet lhuwata kata la xtamakgaxtokgkgonit, pero ni xkgalhikgo kamanan. Akgtum kilhtamaku, akxni Zacarías xtlawama tamakamastan ktemplo, tasiyanilh ángel Gabriel. Zacarías lu pekualh, pero Gabriel wanilh: “Ni kapekuanti. Jehová kimaliminima tlan tamakatsinin. Mimpuskat, Elisabet, nakgalhi chatum kgawasa, chu nawanikan Juan. Jehová laksaknit Juan xlakata natlawa akgtum xlakaskinka taskujut”. Zacarías kgalhskilh: “¿La naklikatsi pi xlikana tuku wana? Kimpuskat chu akit klinawa kata xlakata nakkgalhiyaw chatum kgawasa”. Gabriel kgalhtilh: “Dios kimalakgachalh xlakata nakmaxkiyan uma tlan tamakatsinin. Pero komo ni kinkanajlani, nila katichuwinanti asta akxni nalakachin kgawasa”.

Zacarías tlakg lhuwa kilhtamaku tamakgxtakgli ktemplo ni chuna la xlismaninit. Pero akxni taxtulh, latamanin xkgalhkgalhimakgolh kkilhtin xlakata xkatsiputunkgo tuku xlanit. Pero Zacarías nila xchuwinan, kajwatiya tlan xkapakgawani. Wa xlakata latamanin katsikgolh pi xmakglhtinanit akgtum tamakatsinin xla Dios.

Titaxtulh kilhtamaku, Elisabet xʼama kgalhi kskgata chu kgalhilh chatum kgawasa chuna la xwanit ángel. Xʼamigos chu xfamilia Elisabet minkgolh lakgapaskgo skgata chu lipaxuwakgolh. Elisabet wa: “Xtukuwani nawan Juan”. Xlakan kgalhtikgolh: “Nitiku xalak mifamilia chuna wanikan. Wata kawanika Zacarías, chuna la xtlat”. Pero Zacarías tsokgli: “Xtukuwani wa Juan”. Ama kilhtamaku, Zacarías tlan tsukupa chuwinan. Tamakatsinin xlakata skgata takatsilh xliputum Judea, chu latamanin xkakgalhskinkan: “¿Tuku natlawa uma kgawasa akxni nastaka?”.

Zacarías litatsamalh espíritu santo chu wa tuku xʼama la: “¡Kamalankiw Jehová! Xla malaknunilh Abrahán pi xʼama makamin chatum lakgmaxtuna, Mesías, xlakata nakinkalakgmaxtuyan. Chu Juan palakachuwina nawan tiku ama lakkaxwili xtiji Mesías”.

Na lu tlan tuku akgspulalh chatum xfamilia Elisabet xwanikan María. Naʼakxilhaw kʼatanu capítulo.