Jesús kamawi lhuwa mil latamanin

Akxni nialh makgas xtsankga natlawakan Pascua xla kata 32, apóstoles kitaspitkgolh kilichuwinankgolh Dios. Xtlakgwankgonit, wa xlakata Jesús kalilh kʼakgtum barca kBetsaida xlakata xjaxkgolh. Pero akxni xtalakatsuwimakgolh kxkilhtun, Jesús akxilhli pi lhuwa mil latamanin xkastalanikgonit asta anta. Xatapaxuwan kamakgamakglhtinalh latamanin maski kaj xʼapóstoles xkatatawilaputun. Kamapaksalh tatatlanin chu lhuwa tuku tsukulh kamasiyani. Tantaku kalitachuwinalh xTamapakgsin Dios. Akxni kgotanulh, apóstoles wanikgolh: “Latamanin max tsinksmakgolh. Kakawani kaʼankgolh putsakgo tuku nawakgo”.

Pero Jesús kakgalhtilh: “Ni talakaskin naʼankgo. Wixin wi tuku kakamawitit unu”. Apóstoles kgalhskinkgolh: “¿Lakaskina nakanaw katamawaniyaw kaxtalanchu?”. Apóstol Felipe, wa: “Maski lhuwa tumin xakkgalhiw, nila xakkatamawanikgow kaxtalanchu putum umakgolh latamanin”.

Jesús kakgalhskilh: “¿La xlilhuwa liwat kgalhiyaw?”. Andrés kgalhtilh: “Kgalhiyaw makkitsis kaxtalanchu chu tantiy laktsu skiti o tamakgnin. Pero ni lhuwa xlakata nakakchani umakgolh latamanin”. Jesús wa: “Kakilaliminiw kaxtalanchu chu skiti”. Alistalh kawanilh latamanin pi xtawilakgolh kkasekgetni, makgapitsi grupos xla 50 chu amakgapitsi xla 100. Tiyalh kaxtalanchu chu laktsu skiti, talakayawalh kʼakgapun chu tlawalh akgtum oración. Alistalh kamaxkilh taway xʼapóstoles xlakata xmaʼakgpitsikgolh. Putum 5,000 lakchixkuwin tiku xwilakgo anta, nachuna lakpuskatin chu kamanan wayankgolh asta kgalhkgaskgolh. Xaʼawatiya, apóstoles makikgolh tuku xʼakgataxtunit xlakata nitu xlaklatamalh. ¡Matsamakgolh 12 canastas! ¿Ni xlikana pi akgtum milagro nema lu kaks malakawaninan?

Putum latamanin lu kaks lilakawankgolh chu asta xlakaskinkgo pi Jesús xmapakgsinakan xlitaxtulh. Pero Jehová ni xlakaskin pi mapakgsina xlitaxtulh xlakata nina xlakgchan kilhtamaku, chu Jesús xkatsi. Wa xlakata kawanilh latamanin pi tlan xʼankgolh chu kawanilh xʼapóstoles pi xʼankgolh kxakilhtutu pupunu xalak Galilea. Xlakan ankgolh kbarca, chu Jesús kaj xakstu alh ksipi. ¿Tuku xlakata? Xlakata xtlawaniputun oración xTlat. Maski lhuwa tuku xlitlawat xwanit, Jesús ankgalhin xlimaxtu kilhtamaku natlawa oración.