Jesús taspita kʼakgapun

Jesús katatamakxtumilh kstalaninanin kʼGalilea. Wi tuku lu xlakaskinka kalimapakgsilh: “Kapitit chu limakgalhtawakget kakatlawatit latamanin xalak putum kachikinin. Kakamasiyanitit putum tuku akit kkamasiyaninitan chu kakamunutit”. Alistalh kawanilh: “Kalakapastaktit, akit ankgalhin nakkatatawilayan”.

Akxni xlakastakwananita, Jesús katasiyanilh 40 kilhtamaku lhuwa ciento kstalaninanin kʼGalilea chu kJerusalén. Kamasiyanilh tuku lu xlakaskinka chu tlawalh lhuwa milagros. Alistalh, xaʼawatiya katatamakxtumilh xʼapóstoles ksipi xla Olivos. Jesús xkawaninit: “Ni nataxtuyatit kJerusalén. Chuntiya kakgalhkgalhitit tuku xaTlat malaknunit”.

Kstalaninanin ni xʼakgatekgskgonit tuku xwamputun Jesús, wa xlakata kgalhskinkgolh: “¿Xmapakgsina Israel nalitaxtuyata?”. Jesús kakgalhtilh: “Jehová nina lakaskin pi mapakgsina nakwan. Pero nialh makgas wixin namakglhtinanatit espíritu santo nema nakamaxkiyan litliwakga, chu kintatayananin nawanatit. Wa xlakata kapitit lichuwinanatit kJerusalén, kJudea, kSamaria chu asta niku tlakg lakgamakgat kkatiyatni”.

Alistalh Jesús alh kʼakgapun, chu akgtum puklhni matsekgli. Kstalaninanin chuntiya xlakankgonit talhman, pero xla nialh tasiyalh.

Kstalaninanin Cristo taspitkgolh kJerusalén. Anta xlismanikgonit xtamakxtumikgo chu xtlawakgo oración xlikilhmaktiy chiki. Xkgalhkgalhimakgo pi Jesús xkawanilh tuku natlawakgo.