Xkuentajtlawana pulachin katsini xaxlikana

Anta kFilipos, xwi chatum tsumat skitiwina tiku xwan tuku aku xʼama la xlakata xlaktanuma demonio. Lhuwa tumin xkamatlaji xmalananin. Akxni Pablo chu Silas chankgolh kFilipos, uma tsumat tsukulh kastalani niku xʼankgo akglhuwa kilhtamaku. Demonio xtlawa pi pixlanka xwa: “Umakgolh lakchixkuwin kskujnin Dios tiku Lanka xlakatsukut”. Alistalh, Pablo wanilh demonio: “¡Klimapakgsiyan kxtukuwani Jesús pi kataxtuni!”. Chu demonio taxtunilh.

Akxni xmalananin akxilhkgolh pi nialh xʼamakgo litlajakgo lhuwa tumin, lu sitsikgolh. Kaxwatalinkgolh Pablo chu Silas kxlakatin mapakgsinanin tiku xlakkaxtlawakgo taʼakglhuwit chu kawanikgolh: “¡Umakgolh lakchixkuwin ni kgalhakgaxmatkgo limapakgsin chu tlawamakgo pi tiku xalak kachikin nataʼakglhuwikgo!”. Mapakgsinanin wankgolh pi xkakgaxika Pablo chu Silas chu xkatamaknuka kpulachin. Tiku xlakgayawakanit pulachin katamaknulh asta niku tlakg pulhman chu tlakg kapukswa. Nachuna, kawililh kcepo, o katamaknunilh xtantunkan kpakglhat o klhtakala.

Pablo chu Silas tsukukgolh kilhtlikgo xlakata namalankikgo Jehová chu makgapitsi tachin xkakgaxmatnimakgo. Kaj xalan, xʼitat tsisni, lu tliwakga tachikilh tiyat chu lakchikimilh pulachin. Talakkikgolh putum malakcha chu talakgxtukgolh xcadenas chu kcepos tachin. Tiku xkuentajtlawanama lakapala alh asta niku tlakg pulhman chu akxilhli pi malakcha xlakikgo. Lakpuwa pi putum tachin xtsalakgonit, wa xlakata tiyalh kgantum espada xlakata namakgnikan.

Akxnitiya, Pablo pixlanka wa: “¡Nitu katlawanika! ¡Putum unu kwilaw!”. Xkuentajtlawana pulachin lakapala alh niku xwi Pablo chu Silas chu kalakgtakilhputalh. Kakgalhskilh: “¿Tuku kilitlawat xlakata naklakgtaxtu?”. Xlakan kgalhtinankgolh: “Wix chu putum tiku wilakgo kminchik milikanajlanitkan Jesús”. Wa xlakata Pablo chu Silas tsukukgolh kamasiyanikgo xtachuwin Jehová chu xkuentajtlawana pulachin chu putum tiku xalak kxchik tamunukgolh.