Tuku xlikatsitkan tiku naʼankgo ktamakxtumit

XLAKASKINKA TAMAKXTUMIT

ESCUELA XLA TIKU LICHUWINANKGO XTAMAPAKGSIN DIOS. Tiku liskujmakgolh la precursores chu kgalhikgo 23 asta 65 kata chu tlakg lichuwinamputunkgo Dios, xlitawilatkan domingo kakgotanun niku natatlawa tamakxtumit xlakata uma escuela. Hora chu niku natatlawa namakatsininankan kplataforma.

TUKU XLIKATSITKAN TIKU NAʼANKGO KTAMAKXTUMIT

KAXWILINANIN. Tiku kaxwilinankgo wa namakgtayakgoyan. Katlawa tuku nawanikgoyan xlakata la nakaxwiliya mimputlaw, niku tlan natlawana, akxni makgataxtiya laktawilh chu atanu.

LAKTAWILH. Kalilakgaputsatit amakgapitsin. Kalakapastakti pi tlan nakamakgataxtiniya laktawilh kajwatiya tiku xalak mi familia, tiku akxtum katapina kputlaw o tiku wilakgolh kkinchikkan o tiku kamakgalhtawakgepat. Ni kawili tuku nalimakgataxtiya laktawilh komo ni tiku katitawilalh.

NIKU KAMAKGTAYAKAN TIKU KAJ LAKAPALA TUKU LANIKGO. Uma Departamento lakkaxwilikanit xlakata nakamakgtayakan AKXNI wi tiku KAJ LAKAPALA TUKU LANI.

TAMUNUT. Nakamakgataxtinikan laktawilh kxlakatin kplataforma tiku natamunukgo, o komo nalakgpalikan nawankan. Tiku natamunukgo xlitawilatkan niku kamakgataxtinikanit akxni nina tsuku taʼakgchuwin xla tamunut, sábado tsisa. Putum xliminatkan maktum toalla chu klhakgat nema nalimaklakaskin akxni natamunu.

TUKU MAKGATSANKGAKAN. Komo wi tuku natekgsa, kamakamasta niku makikan Tuku Makgatsankgakan. Komo wi tuku makgatsankgaya, kapit xlakata napina putsaya tuku makgatsankga. Na kakalipi laktsu kamanan tiku tsankgakgonit. Pero uma departamento ni kaj nakuentajtlawakan laktsu kamanan. Wa xlakata, katlawa litlan kakakuentajtlawa minkaman chu lakatsu kakatatawilakgon.

TUMIN NEMA XATAPAXUWAN MASTAKAN. Lhuwa tumin talaktlawa xlakata natakgalhi tlan laktawilh, liwana natakgaxmata chu na tlan natasiya videos, chu tipalhuwa tuku talakaskin xlakata tlan nalipaxuwayaw lanka tamakxtumit chu tlakg natalakatsuwiniyaw Jehová. Mintumin nema mastaya makgtayanan xlakata nataxokgo tuku tamaklakaskin chu nachuna la talichuwinama Dios xlikalanka katiyatni. Xlakata tlan namastaya min tumin, klaklanka tamakxtumit kawilikan cajas nema liwana tasiyakgo xlakata tlan namujuya mintamakgtay. Lu kkapaxtikatsiniyan tumin nema mastayatit. Lakgkgolotsin tiku Pulalinankgo kapaxtikatsinikgoyan xlakata xatapaxuwan mastayatit mintuminkan xlakata xTamapakgsin Dios.

XATAPAXUWAN MAKGTAYANANKAN. Komo makgtayanamputuna putum taskujut nema tatlawa klanka tamakxtumit, kapit niku wi departamento Xatapaxuwan Makgtayanankan.