LECCIÓN 14

Tlakg kalichuwinanti tuku xlakaskinka

Hebreos 8:1

TUKU NATALICHUWINAN: Kakamakgtaya tiku kgaxmatnimakgon nastalanikgo mintaʼakgchuwin chu liwana kamasiya la tuku tlakg xlakaskinka lichuwinampat tatalakxtumi tema chu tuku xlakata lichuwinampat uma.

LA NATLAWAYA

Kalakkaxwili tuku makgantaxtiputuna. Kalakpuwanti tuku lakaskina namatlawinan mintaʼakgchuwin: makatsininamputuna, lakaskina nakanajlakan o kamakgpuwatiniputuna tiku kgaxmatnimakgon chu kalakapastakti uma akxni nalakkaxtlawaya mintaʼakgchuwin. Kuenta katlawa pi putum tuku tlakg xlakaskinka nalichuwinana, namakgtayayan namakgantaxtiya tuku lakkaxwilinita.

Kalilakpuwanti uma: «¿Tuku takgalhskinin xlakata uma tema max nakintlawanikgo tiku kinkgaxmatnimakgo chu la natlawatilhakgo takgalhskinin?». Alistalh, kalakkaxwili pulakatunu tuku nalichuwinana kmintaʼakgchuwin chuna la xtlawanitilhakgon takgalhskinin, xlakata tiku kgaxmatnimakgon tlan nastalanikgo tuku lichuwinampat, naʼakgatekgskgo chu namakgamakglhtinankgo.
Tlakg kalichuwinanti xtema mintaʼakgchuwin. Chuna la namastatilhaya mintaʼakgchuwin, makglhuwa kamaklakaskinti tlakg xlakaskinka tachuwin o sinónimos nema tatalakxtumi tema.
Liwana kalichuwinanti tuku tlakg xlakaskinka chu ni tuwa kataʼakgatekgsli. Kajwatiya kalaksakti tuku tlan nalichuwinana kilhtamaku nema maxkikanita chu katatalakxtumilh tema. Ni lhuwa kalaksakti tuku tlakg xlakaskinka chu liwana kalichuwinanti. Katachokgotilha tsinu akxni lichuwinana pulakatunu chu ni lakapala kalakgpali tuku lichuwinampat.

Tlan nalichuwinana tuku tlakg xlakaskinka akxni namatsukiya mintaʼakgchuwin xlakata tiku kgaxmatnimakgon nakatsikgo tuku lichuwinampat chu kawampara akxni namasputuya xlakata nalakapastakkgo.