TAKGALHTAWAKGA 12
¿Tuku namakgtayayan chuntiya nalikgalhtawakgaya Biblia?
Nalikgalhtawakgaya Biblia xtachuna la wi niku napina lakgapasnana. Lu nalipaxuwaya, pero namin kilhtamaku tuwa namakgkatsiya. Max namin kilhtamaku tuwa namakgkatsiya chuntiya nalikgalhtawakgaya Biblia. ¿La namakgtayayan komo chuntiya nalikgalhtawakgaya? ¿Tuku namakgtayayan ni namakgxtakga maski namin kilhtamaku nakgalhiya taʼakglhuwit?
1. ¿La namakgtayayan komo chuntiya nalikgalhtawakgaya Biblia?
«Xtachuwin Dios xastakna chu lhuwa litliwakga kgalhi» (Hebreos 4:12). Biblia maktum libro nema lhuwa xtapalh, xlakata masiya tuku lakpuwan Dios chu tuku makgkatsi mimpalakata. Ni kajwatiya katimakgtayan lhuwa tuku nakatsiya, na namakgtayayan nalaksaka tuku tlan chu nakgalhiya takgalhkgalhin. Chu tuku tlakg xlakaskinka wa pi Biblia namakgtayayan xʼamigo Jehová nawana. Akxni likgalhtawakgaya, maxkipat talakaskin pi nalakgpali milatamat.
2. ¿Tuku xlakata lu xlakaskinka naʼakxilhaw tuku masiya Biblia?
Tuku Biblia masiya xtachuna la tuku lhuwa xtapalh. Wa xlakata Biblia wan: «Katamawa xaxlikana chu nikxni kastat» (Proverbios 23:23). Komo naʼakgatekgsaw pi lhuwa xtapalh tuku masiya Biblia, chuntiya nakgalhtawakgayaw maski nakgalhiyaw taʼakglhuwit (kalikgalhtawakga Proverbios 2:4, 5).
3. ¿La namakgtayayan Jehová xlakata chuntiya nakgalhtawakgaya?
Xlakata Jehová wa Malakatsukina tiku kgalhi putum litliwakga chu miʼamigo, xla liwana lakgapasan chu makgtayaputunan xlakata tlakg nalakgapasa. Dios natlawa pi “natlawaputuna chu namaxkiyan litliwakga xlakata chuna natlawaya” (kalikgalhtawakga Filipenses 2:13). Wa xlakata, komo namin kilhtamaku tuwa namakgkatsiya nalikgalhtawakgaya o nalilatapaya tuku katsinipat, Dios namakgtayayan. Chu komo tlakg maklakaskina litliwakga xlakata natayaniya tuku tuwa o taputsastalanit, xla namaxkiyan litliwakga. Chuntiya kaskini Jehová pi kamakgtayan ni namakgxtakga mintakgalhtawakga (1 Tesalonicenses 5:17).
TLAKG KALAKPUTSANANIW
Kaʼakxilhwi tuku tlan natlawaya xlakata chuntiya nalikgalhtawakgaya Biblia, maski amakgapitsin ni lakgatikgo o ni lu lhuwa kilhtamaku kgalhiya. Chu alistalh naʼakxilhaw la Jehová namakgtayayan.
4. Xlakaskinka kaliʼakxilhti nalikgalhtawakgaya Biblia
Min kilhtamaku lu lhuwa tuku kilitlawatkan chu tuwa makgkatsiyaw nalimaxtuyaw kilhtamaku nalikgalhtawakgayaw Biblia. ¿Tuku tlan natlawayaw? Kalikgalhtawakgatit Filipenses 1:10 chu kalichuwinantit uma:
¿Tuku tlakg xlakaskinka liʼakxilha wix?
¿Tuku tlan natlawaya xlakata takgalhtawakga xalak Biblia wa tuku tlakg xlakaskinka nawan kmilatamat?
Komo namujuya muntsaya o kuku kpatum cubeta chu alistalh namujuputuna lhuwa chiwix, nila katitajukgolh chiwix.
Komo pulana nakamujuya chiwix, max tlan natajukgo putum muntsaya. Nachuna, komo pulana nawiliya kmilatamat tuku tlakg xlakaskinka, tlan namakgantaxtiya uma chu na nakgalhiya kilhtamaku xlakata natlawaya tuku ni lu xlakaskinka.
Akxni likgalhtawakgayaw Biblia, limasiyayaw pi lakaskinaw pi Dios kakinkapulalin, uma wamputun pi lakgapasputunaw chu kakninaniputunaw. Kalikgalhtawakgatit Mateo 5:3 chu kalichuwinantit uma:
Komo takgalhtawakga xalak Biblia wa tuku tlakg xlakaskinka liʼakxilhaw, ¿la tlan nalitamakgtayayaw?
5. Ni kamakgxtakgti mintakgalhtawakga maski amakgapitsin ni nalakgatikgo
Max namin kilhtamaku wi tiku nawanikgoyan pi nialh kalikgalhtawakga Biblia. Kaʼakxilhti tuku titaxtulh Francesco. Kaʼakxilhtit VIDEO chu kalichuwinantit uma:
¿Tuku tlawakgolh xʼamigos chu xfamilia Francesco akxni kalitachuwinalh tuku xla xkatsinima?
¿Tuku xlakata lu tlan kitaxtulh pi ni makgxtakglhli xtakgalhtawakga xalak Biblia?
Kalikgalhtawakgatit 2 Timoteo 2:24, 25 chu kalichuwinantit uma:
¿Tuku wankgo miʼamigos chu mifamilia xlakata kgalhtawakgapat?
Chuna la wan texto nema likgalhtawakgaw, ¿tuku militlawat akxni wi tiku nawaniyan pi nialh kakgalhtawakga? ¿Tuku xlakata chuna militlawat?
6. Kalipawanti pi Jehová namakgtayayan
Akxni tlakg talalinaw Dios tlakg makgapaxuwaputunaw. Pero maski chuna, max tuwa namakgkatsiyaw nalakgpaliyaw kilatamatkan chuna la wan xLimapakgsin. Komo namin kilhtamaku chuna namakgkatsiya, ni kataxlajwani, Jehová namakgtayayan. Kaʼakxilhtit VIDEO chu kalichuwinantit uma:
Chuna la akxilhwi kvideo, ¿tuku lakgpalilh Jim kxlatamat xlakata xmakgapaxuwalh Jehová?
¿Tuku tlakg kaks malakawanin xlakata la lakgpalilh xlatamat uma chixku?
Kalikgalhtawakgatit Hebreos 11:6 chu kalichuwinantit uma:
¿Tuku natlawa Jehová xpalakatakan tiku lakgapasputunkgo chu «xatapaxuwan tlawaputunkgo xtalakaskin»?
¿La lakpuwana pi makgkatsi Jehová akxni akxilha pi wix lu liskujpat xlakata nalikgalhtawakgaya Biblia?
MAKGAPITSIN KGALHSKININANKGO: «¿Tuku xlakata katakgalhtawakgapat xtatayananin Jehová?».
¿La xkgalhtinanti wix?
TUKU KATSINIW
Maski namin kilhtamaku tuwa namakgkatsiya, komo nalikgalhtawakgaya Biblia namakgtayayan nalipaxuwaya latamat putum kilhtamaku. Komo chuntiya nalipawana Jehová, xla nasikulunatlawayan.
¿Tuku xkgalhtinanti?
¿Tuku xlakata lu lhuwa xtapalh akxilha tuku masiya Biblia?
¿Tuku militlawat xlakata la uku katsiyata «tuku tlakg xlakaskinka»?
¿Tuku xlakata chuntiya miliskinit Jehová pi kamakgtayan ni namakgxtakga mintakgalhtawakga xalak Biblia?
TLAKG KAKATSINI
Kaʼakxilhti pulaktati tuku kamakgtayanit lhuwa latamanin liwana namaklakaskinkgo xkilhtamakujkan.
“Cómo invertir sabiamente el tiempo” (¡Despertad!, febrero kata 2014)
Chatum puskat xmakgapaxuwaputun Dios, pero xchixku ni xʼakgatekgsa putum tuku xla xtlawama. Kaʼakxilhti la makgtayalh Jehová.
Jehová kinkamaxkiyan litliwakga xlakata natayaniyaw kintaʼakglhuwitkan (5:05)
Kaʼakxilhti la chatum puskat makgtayalh xchixku xlakata ni makgxtakglhli xtakgalhtawakga xalak Biblia.
Lhuwa latamanin wankgo pi xtatayananin Jehová kamapitsikgo familias, ¿pero xlikana uma?
«¿Kamapitsikgo familias xtatayananin Jehová o makxtum katlawakgo?» (Artículo xalak jw.org)