TAKGALHTAWAKGA 46
¿Tuku xlakata natamakamastaniya Dios chu natamunuya?
Akxni wi tiku tamakamastani Jehová, tlawani akgtum oración niku malaknuni pi kajwatiya xla nakakninani chu na malaknuni pi tuku tlakg xlakaskinka nawan kxlatamat wa pi natlawa tuku Dios lakaskin (Salmo 40:8). Alistalh akxni tamunu, limasiya kxlakatin amakgapitsin pi xla tamakamastaninita Dios. Tamakamastanikan Jehová wa tuku tlakg xlakaskinka tlawakan klatamat, uma lakgpali kilatamatkan. ¿Tuku namakgpuwantiniyan natamakamastaniya Dios?
1. ¿Tuku tlawa pi natamakamastaniyaw Dios?
Tapaxkit wa tuku tlawa pi natamakamastaniyaw Jehová (1 Juan 4:10, 19). Biblia kinkawaniyan: «Milipaxkit Jehová miDios xliputum minaku chu xliputum milatamat chu xliputum mintalakapastakni chu xliputum militliwakga» (Marcos 12:30). Tapaxkit nema kgalhiniyaw Jehová litasiya akxni chuwinanaw chu akxni wi tuku tlawayaw. Xtachuna la akxni chatum kgawasa chu chatum tsumat xlikana lapaxki lakpuwankgo natamakgaxtokgkgo, akxni akinin xlikana paxkiyaw Jehová tamakamastaniyaw chu tamunuyaw.
2. ¿Tuku tasikulunalin kamaxki Jehová tiku tamunukgo?
Akxni wix natamunuya namakgtapakgsiya kxfamilia Jehová, akgtum familia nema lu paxuwa. Naʼakxilha pi tipalhuwa la Dios limasiyaniyan xtapaxkit chu tlakg natalakatsuwiniya (kalikgalhtawakga Malaquías 3:16-18). Jehová minTlat nalitaxtu, pero ni kajwatiya uma, na nakgalhiya natalan kxlikalanka katiyatni tiku paxkikgo Dios chu na paxkikgoyan (kalikgalhtawakga Marcos 10:29, 30). Pero wi tuku militlawat xlakata tlan natamunuya. Talakaskin nalakgapasa Jehová, napaxkiya chu nalimasiyaya pi kanajlaniya xKgawasa. Xaʼawatiya, talakaskin namalaknuniya Jehová pi namakamaxkiya milatamat. Komo natlawaya putum uma chu alistalh natamunuya, wix tlan nalipaxuwaya latamat putum kilhtamaku. Xtachuwin Dios wan: «Tamunut […] kalakgmaxtuman uku» (1 Pedro 3:21).
TLAKG KALAKPUTSANANIW
Kaʼakxilhwi tuku xlakata lu xlakaskinka natamakamastaniya Jehová chu natamunuya.
3. Putum akinin kililaksakatkan tiku naskujnaniyaw
Kxamakgan Israel, makgapitsin latamanin xlakpuwankgo pi tlan xkakninanikgolh Jehová chu na xkakninanikgolh nixaxlikana dios Baal. Pero nitlan tuku xlakpuwankgo. Wa xlakata Jehová malakgachalh xpalakachuwina Elías xlakata xkastakyawalh. Kalikgalhtawakgatit 1 Reyes 18:21 chu kalichuwinantit uma:
¿Tuku xlilaksakatkan xwanit israelitas?
Xtachuna la israelitas, akinin na kililaksakatkan tiku naskujnaniyaw. Kalikgalhtawakgatit Lucas 16:13 chu kalichuwinantit uma:
¿Tuku xlakata nila kakninaniyaw Jehová chu na nakakninaniyaw atanu dios?
¿Tuku kilitlawatkan xlakata Jehová naʼakxilha pi laksaknitawa wa nakakninaniyaw?
4. Kalilakpuwanti la xlilhuwa paxkiyan Jehová
Jehová lhuwa tuku kinkamaskiwinitan. ¿Chu tuku tlan namaxkiyaw akinin? Kaʼakxilhtit VIDEO.
¿La limasiyaninitan Jehová xtapaxkit? Kalikgalhtawakgatit Salmo 104:14, 15 chu 1 Juan 4:9, 10 chu kalichuwinantit uma:
Xliputum tamaskiwin nema maxkinitan Jehová, ¿tuku tlakg paxtikatsiniya wix?
Akxni lilakpuwana putum umakgolh tamaskiwin, ¿makgtayayan tlakg napaxkiya Dios o tuku makgkatsiya?
Akxni chatum lataman kinkamaskiwiyan tuku lu lakgatiyaw, limasiyaniyaw pi paxtikatsiniyaw. Kalikgalhtawakgatit Deuteronomio 16:17 chu kalichuwinantit uma:
Akxni lilakpuwana putum tuku Jehová maxkinitan, ¿na wi tuku maxkiputuna? ¿Tuku tlan xmaxki?
5. Lhuwa tasikulunalin makglhtinankan akxni tamakamastanikan Dios
Lhuwa latamanin lakpuwankgo pi nakgalhikgo tapaxuwan komo nakgalhikgo lhuwa tumin, nakgalhikgo tlan taskujut o lu nakalakgapaskan. ¿Pero xlikana uma? Kaʼakxilhtit VIDEO chu kalichuwinantit uma:
Tiku tasiyalh kvideo lu xlakgati fútbol, pero ¿tuku xlakata makgxtakglhli uma?
Xla makamaxkilh xlatamat Jehová chu makgxtakglhli takgaman. ¿Lakpuwana pi tlan tuku laksakli? ¿Tuku xlakata?
Akxni apóstol Pablo nina kstalanina Cristo xlitaxtu, xtasiya pi lu tlan xʼama kitaxtuni kxlatamat. Xmakgalhtawakgenit chatum tiku lu xlakgapasa xlimapakgsinkan judíos chu lu xlakaskinka xliʼakxilhkan. Pero makgxtakglhli putum uma xlakata kstalanina Cristo xlitaxtulh. ¿Lilipuwa alistalh tuku xlaksaknit? Kalikgalhtawakgatit Filipenses 3:8 chu kalichuwinantit uma:
¿Tuku xlakata Pablo wa pi tuku xtlawanit akxni nina kstalanina Cristo xlitaxtu kaj «lhuwa palhma» o basura xlitaxtu?
¿Tuku makglhtinalh xlakata lhuwa tuku makgxtakglhli?
¿Lakpuwana pi tlakg tlan nakitaxtuniyan kmilatamat komo naskujnaniya Jehová? ¿Tuku xlakata chuna lakpuwana?
Akxni Pablo kstalanina Cristo litaxtulh, tlakg lhuwa tuku tlajalh nixawa tuku makgatsankgalh
MAKGAPITSIN WANKGO: «Kkatsi pi uma xaxlikana, pero kmakgkatsi pi nina la ktimakgantaxtilh».
¿Lakpuwana wix pi tlan nakitaxtuniyan komo namakamaxkiya milatamat Jehová? ¿Tuku xlakata?
TUKU KATSINIW
Tapaxkit nema kgalhiniyaw Jehová tlawa pi natamakamastaniyaw chu natamunuyaw.
¿Tuku xkgalhtinanti?
¿Tuku xlakata kajwatiya Jehová lakgchan napaxkiyaw xliputum kinakujkan chu nakakninaniyaw?
¿Tuku kamaxki Jehová tiku tamakamastanikgo chu tamunukgo?
¿Tamakamastaniputuna Jehová?
TLAKG KAKATSINI
Kaʼakxilhti tuku xlakata chatum tiku xkilhtli opera chu chatum tiku xkgamanan futbol americano laksakkgolh natamakamastanikgo Jehová.
Kamanan kgalhskininankgo... ¿Tuku naktlawa kkilatamat?: Tuku ktlawanit (6:54)
Kaʼakxilhti tuku atanu namakgtayayan natamakamastaniya Jehová.
«¿Tuku xlakata talakaskin natamakamastaniyaw Jehová?» (Makatsinina, 15 xla enero kata 2010)
Kaʼakxilhti kʼuma video musical tapaxuwan nema kgalhikgo tiku tamakamastanikgo Jehová.
Kalikgalhtawakga biografía, «Akstu xkinkgalhskinkan tuku xlakata lamaw», xlakata nakatsiya tuku tlawalh pi chatum puskat xlilakpuwa tuku tlakg xlakaskinka kxlatamat.
«Biblia kalakgpalinilh xlatamatkan» (Makatsinina, 1 xla noviembre kata 2012)