La xlitamatitaxtit tamakxtumit Xlatamat chu xtaskujut kstalanina Cristo

Liputsan

1. Unu lichuwinan tuku xlitlawatkan putum tiku wi tuku matitaxtikgo ktamakxtumit Xlatamat chu xtaskujut kstalanina Cristo. Atanu tuku na xlitlawatkan akxni nina lakkaxwilikgo tuku namatitaxtikgo wa pi naʼakxilhkgo tuku wan Tuku natalikgalhtawakga, Xlatamat chu xtaskujut kstalanina Cristo. Putum tiku lichuwinankgo Dios tlan nakamakgpuwantinikan xlakata namatitaxtikgo liʼakxilhtit ktamakxtumit. Tiku ankgalhin ankgo ktamakxtumit na tlan wi tuku namatitaxtikgo kʼuma tamakxtumit, pero talakaskin namakgamakglhtinankgo tuku masiya Biblia chu nalilatamakgo. Komo wi tiku nina publicador litaxtu, pero na wi tuku matitaxtiputun kʼuma tamakxtumit, Tiku lakkaxwili tuku natamatitaxti Xlatamat chu xtaskujut kstalanina Cristo nawani tuku xlimakgatsit chu alistalh namakatsini komo makgatsi tuku talakaskin. Akxni nakgalhchuwinankgo, anta xlitawilat tiku makgalhtawakgema (o xtlat o xtse komo xtatayananin Jehová litaxtukgo). Tiku wi tuku matitaxtiputun kʼuma tamakxtumit na xlimakgatsit tuku skinikan chatum publicador (od-S cap. 8 párr. 8).

TUKU NALIMATSUKIKAN

2. Akgtum minuto. Tamakxtumit nalitsuku takilhtlin chu oración. Alistalh, tiku pulalin tamakxtumit Xlatamat chu xtaskujut kstalanina Cristo natlawa pi lu nakatsiputunkan tuku aku natamatitaxti. Tlakg nalichuwinan tuku lu namakgtaya congregación.

TUKU LHUWA XTAPALH XALAK BIBLIA

3. Taʼakgchuwin: (10 minutos). Xtítulo chu akgtiy o akgtutu puntos nema tlakg xlakaskinka natalichuwinan kʼuma taʼakgchuwin, anta min klikgalhtawakga Xlatamat chu xtaskujut kstalanina Cristo. Uma taʼakgchuwin namatitaxti kgolotsin o siervo ministerial tiku liwana katsi la namatitaxti. Akxni natsukukan likgalhtawakgakan maktum xasasti libro xalak Biblia, naʼakxilhkan akgtum video nema lichuwinan uma libro. Tiku namatitaxti taʼakgchuwin tlan nalichuwinan la tatalakxtumi video xtema xtaʼakgchuwin, pero talakaskin nalichuwinan akgatunu puntos nema min klikgalhtawakga Xlatamat chu xtaskujut kstalanina Cristo. Komo ananku kilhtamaku, tlan nalichuwinan putum dibujos nema xtatakgatsin tuku lichuwinama. Komo wi atanu tuku namakgtayanan xlakata tlakg liwana nataʼakgatekgsa tuku lichuwinama, tlan namaklakaskin.

4. Kaputsaw kBiblia tuku lhuwa xtapalh: (10 minutos). Tiku namatitaxi uma, natlawa takgalhskinin chu tiku wilakgo ktamakxtumit tlan namastakgo xtakgalhtinkan. Ni talakaskin nalakkaxwilikan la namatsukikan chu la namakgalhsputukan. Namatitaxti chatum kgolotsin o siervo ministerial tiku liwana katsi la namatitaxti. Tala xlitlawat akgtiy takgalhskinin. Wa nalaksaka komo nalikgalhtawakgakan textos nema min anta o ni nalikgalhtawakgakan. Xtakgalhtinkan tiku wilakgo ktamakxtumit xlimakgapalat 30 segundos o maski ni natakgatsi.

5. Natalikgalhtawakga: (4 minutos). Uma namatitaxti chatum tala chixku. Kajwatiya nalikgalhtawakga tuku lakgchan, ni talakaskin nalakkaxwili tuku nalimatsuki chu tuku nalimakgalhsputu. Tiku pulalima uma tamakxtumit nakamakgtaya tiku kalakgchan nalikgalhtawakgakgo Biblia xlakata liwana nakgalhtawakgakgo, nataʼakgatekgsa tuku likgalhtawakgamakgo, nalikgalhtawakgakgo chuna la kgalhchuwinankgo, nalakgpalikgo la takgaxmata anta niku xlilat, tlakg pixlanka nawankgo tachuwin nema xlilat chu natachokgokgo niku talakaskin. Xlakata talakgpali la xlilhuwa versículos likgalhtawakgakan akgatunu semana, tiku lakkaxwili tuku natamatitaxti ktamakxtumit Xlatamat chu xtaskujut kstalanina Cristo xliʼakxilhat la xlilhuwa katsini kgalhtawakga tiku nalakgayawa uma.

TLAKG LIWANA KAMAKGALHTAWAKGENAW

6. Akgkukitsis minuto. Uma sección lakkaxwilikanit xlakata putum nakatsinikgo tlakg tlan nalichuwinankgo Dios chu nakatsinikgo la namatsukikgo takgalhchuwin chu la liwana namasiyakgo. Komo natalakaskin, lakgkgolotsin na tlan namatitaxtikgo tuku min kʼuma sección. Klikgalhtawakga Xlatamat chu xtaskujut kstalanina Cristo, nawilikan kparéntesis tukuya lección xla folleto Tlakg tlan kakgalhtawakga o Kakapaxki latamanin natalakaskin nalikgalhtawakga tiku wi tuku namatitaxti kʼuma sección. Makgapitsi semanas nalakkaxwilikan tuku nakalitakgalhchuwinankan congregación chu namatitaxti chatum kgolotsin o siervo ministerial tiku katsi la tlawakan (kaʼakxilhti párrafo 15 niku wan la namatitaxtikan akxni wi tuku nakalitakgalhchuwinankan congregación).

7. Kamatsuki takgalhchuwin: Uma tlan namatitaxti chatum tala chixku o tala puskat. Komo puskat tiku namatitaxti, chatum puskat namakgtaya; komo chixku tiku namatitaxti, chatum chixku namakgtaya; o tlan natamatitaxti chatum tala chixku o puskat komo xalak xfamilia. Tlan natawilakgo o kaj natayakgo. (Xlakata tlakg nakatsiya tuku militlawat, kaʼakxilhti párrafos 12 chu 13).

8. Kakalakgtaspitti latamanin: Uma tlan namatitaxti chatum tala chixku o tala puskat. Komo puskat tiku namatitaxti, chatum puskat namakgtaya; komo chixku tiku namatitaxti, chatum chixku namakgtaya (km-S 5/97 pág. 2). Tlan natawilakgo o kaj natayakgo. Tiku matitaxtima uma xlimasiyat tuku tlan nawankan akxni nalakgapaxialhnamparakan tiku lakgatilh tuku litachuwinanka akxni xapulana tachuwinanka. (Xlakata tlakg nakatsiya tuku militlawat, kaʼakxilhti párrafos 12 chu 13).

9. Kakamakgtaya latamanin kstalaninanin Jesús nawankgo: Uma tlan namatitaxti chatum tala chixku o tala puskat. Komo puskat tiku namatitaxti, chatum puskat namakgtaya; komo chixku tiku namatitaxti, chatum chixku namakgtaya (km-S 5/97 pág. 2). Tlan natawilakgo o kaj natayakgo. Lakkaxwilikanit uma xlakata nakinkamasiyaniyan la tlawakan akgtum takgalhtawakga xalak Biblia akxni matsukikanita takgalhtawakga. Ni talakaskin nalakkaxwili la namatsuki chu la namakgalhsputu. Kajwatiya tlan chuna natlawa komo wa uma tuku xliskujat. Maski tlan nalikgalhtawakga putum párrafos nema lakgchan, ni talakaskin chuna natlawa.

10. Kalichuwinanti tuku kanajlaya: Komo akgtum taʼakgchuwin, namatitaxti chatum tala chixku. Komo akgtum liʼakxilhtit, tlan namatitaxti chatum tala puskat o chatum tala chixku. Komo puskat tiku namatitaxti, chatum puskat namakgtaya; komo chixku tiku namatitaxti, chatum chixku namakgtaya; o tlan natamatitaxti chatum tala chixku o puskat komo xalak xfamilia. Tiku namatitaxti uma liwana xlikgalhtinat takgalhskinin nema min kxtítulo tuku lakgchan chu namaklakaskin referencia nema min anta. Tiku namatitaxti tlan nawan o ni nawan niku kilhtiyanit tuku lichuwinama.

11. Taʼakgchuwin: Xlimastat chatum tala chixku chu namasta la akgtum taʼakgchuwin kcongregación. Akxni natakilhtiya kxtatakgatsin 1 xla folleto Kakapaxki latamanin, tiku namatitaxti uma tlakg nalichuwinan la tlan namaklakaskinkan textos xalak Biblia akxni nalichuwinankan Dios. Akgtum liʼakxilhtit, tlan nalichuwinan tuku kilhchanima akgtum texto, tukuya kilhtamaku namaklakaskinkan chu la tlan namaklakaskinkan xlakata nalimalakpuwanikan tiku tachuwinamaka. Akxni natakilhtiya kʼakgtum takgalhtawakga xla folleto, tiku namatitaxti tlakg nalichuwinan la tlan namaklakaskinkan tuku wa uma takgalhtawakga akxni nalichuwinankan Dios. Komo lakpuwan pi namakgtayanan, tlan nalichuwinan liʼakxilhtit nema min kpunto 1 xla takgalhtawakga o atanu textos nema min anta.

12. Tuku natalichuwinan: Uma párrafo chu nema stala lichuwinan tuku xlitlawat tiku lakgchan namatitaxti «Kamatsuki takgalhchuwin» chu «Kakalakgtaspitti latamanin». Komo ni wilikanit atanu la xlitatlawat, tiku namatitaxti umakgolh liʼakxilhtit xliskujat xlakata nalichuwinan pulaktum tuku masiya Biblia nema max nalakgati tiku tachuwinama chu nalakkaxwili xlakata tlan nalakgtaspitpara. Wa xlilaksakat pulaktum tuku nalichuwinan nema max nakatsiputunkgo tiku xalak xkachikin. Na nalaksaka komo namasta maktum likgalhtawakga o namasiya akgtum video xla kit de enseñanza. Ni kaj de memoria xlikatsinit tuku nalichuwinan, wata xliskujat xlakata tlakg nakatsini la nakatakgalhchuwinan latamanin. Akgtum liʼakxilhtit, tlan naliskuja xlakata nakgalhchuwinan chuna la lismaninit chu nalimasiya pi kalilakgaputsa latamanin.

13. Pulakatunu la tlan nalichuwinankan Dios. Tiku namatitaxti liʼakxilhtit, xlitlawat chuna la katachuwinan latamanin niku xla lama. Akgtum liʼakxilhtit:

(1) K’akgatunu chiki. Uma kilhchanima akxni kalitachuwinanaw Dios latamanin kxchikkan (max kalakan, kteléfono o kamaxkiyaw carta) chu akxni kalakgtaspitparayaw.
(2) Akxni wi tiku natatanokglha. Uma kilhchanima akxni kalitachuwinanaw Dios latamanin kaxanikawa niku lamaw chu maski wi tuku tlawamaw, akgtum liʼakxilhtit, tlan nakalitachuwinanaw akgtum texto xalak Biblia tiku taskujaw, tiku taʼanaw kʼescuela, kintalakatsukan, akxni amaw kputlaw, o atanu.
(3) Niku anankgo latamanin. Uma kilhchanima akxni kalitachuwinankan Dios latamanin kcarritos, kpustan, kkatijin, kparques, niku taxtukgo chu chinkgo putlaw o alakatunu niku lamakgo lhuwa latamanin.

14. La namaklakaskinkan videos chu likgalhtawakga. Tiku nalakgchan namatitaxti liʼakxilhtit nalaksaka komo nalichuwinan akgtum video o namasta maktum likgalhtawakga. Komo tuku lakgchan namatitaxti wan pi kalichuwinalh akgtum video, o komo wa nalaksaka namaklakaskin akgtum video, tlan nalichuwinan pero ni nawili.

KILATAMATKAN LA KSTALANINANIN CRISTO

15. Uma sección limatsukikan akgtum takilhtlin. Kxapulana 15 minutos namatitaxtikan akgtum o akgtiy asignaciones nema nakamakgtaya congregación namakgantaxtikgo tuku wan xTachuwin Dios. Komo ni wan tiku xlimatitaxtit, tlan namatitaxti chatum kgolotsin o siervo ministerial tiku liwana katsi la namatitaxti, pero komo xlitamatitaxtit tuku xlitlawat congregación kajwatiya tlan namatitaxti chatum kgolotsin. Komo tuku matitaxtimaka wan pi kakalitakgalhchuwinanka congregación, tala tiku namatitaxti tlan natlawa atanu takgalhskinin nema ni min klikgalhtawakga. Ni lhuwa tuku xliwanat akxni namatsuki xlakata tlan liwana nalichuwinan tuku tlakg xlakaskinka chu xlakata tlan namastakgo xtakgalhtinkan tiku wilakgo ktamakxtumit. Komo natlawa entrevista, tlakg tlan pi tiku natlawanikan entrevista natawaka kplataforma komo matlani.

16. Takgalhtawakga nema takilhtinit kBiblia kcongregación (30 minutos). Uma namatitaxti kgolotsin tiku liwana katsi la namatitaxti (kcongregaciones niku ni anan lhuwa lakgkgolotsin, tlan nakamaklakaskinkan siervos ministeriales tiku liwana katsikgo la namatitaxtikgo). Lakgkgolotsin xalak congregación wa nalaksakkgo tiku tlan namatitaxti Takgalhtawakga nema takilhtinit kBiblia kcongregación. Tiku nakalaksakkan ni namalakatsalikgo kilhtamaku nema lakkaxwilikanit, nalichuwinankgo textos nema tlakg xlakaskinka chu nakawanikgo tiku wilakgo ktamakxtumit la makgtayanan tuku talichuwinama. Xlakata tlan chuna natlawakgo, tlan nalikgalhtawakgakgo tastakyaw nema min niku lichuwinan la namatitaxtikan asignaciones niku tlawakan takgalhskinin (w23.04 pág. 24, recuadro). Komo liwana lichuwinalha tuku xlakgchan maski nina takgatsi 30 minutos, ni talakaskin namakgatsi. Komo tatlani, akgatunu semana natalakgpalitilha tiku namatitaxti uma takgalhtawakga chu tiku nalikgalhtawakga párrafos. Komo tiku pulalima tamakxtumit naskini pi kamaʼaktsuwilh takgalhtawakga, tiku matitaxtima uma takgalhtawakga nalaksaka la namaʼaktsuwi. Pulaktum tuku tlan natlawa wa pi ni nalikgalhtawakgakan makgapitsi párrafos.

TUKU NALIMASPUTUKAN

17. Akgtutu minuto. Tiku pulalima uma tamakxtumit tlakg nalichuwinan tuku nalitamakgtayakgo natalan. Na nalichuwinan tuku naʼakxilhkan semana nema aku mima xlakata natalan tlakg nakatsiputunkgo chu nalilakapastaknankgo. Komo anan kilhtamaku, tlan nawan xtukuwanikan tiku kalakgchan namatitaxtikgo liʼakxilhtit semana nema aku mima. Akxni natalakaskin namastakan akgtum tamakatsin o nalikgalhtawakgakan maktum carta, tiku pulalima tamakxtumit tlan namaklakaskin uma kilhtamaku xlakata chuna natlawa. Tamakatsin xlakata tuku xlitlawat congregación, chuna la kilhtamaku chu hora akxni naʼankan lichuwinankan Dios o tiku lakgchan nakapalhnan, ni talakaskin nawankan kplataforma, wata nakawilikan ktablero. Komo ni akchan kilhtamaku xlakata namastakan tamakatsin o xlakata nalikgalhtawakgakan maktum carta, tiku pulalima tamakxtumit nakaskini tiku wi tuku namatitaxtikgo ksección «Kilatamatkan la kstalaninanin Cristo» pi kamaʼaktsuwikgolh tuku kalakgchan (kaʼakxilhti párrafos 16 chu 19). Tamakxtumit nalimakgalhsputukan takilhtlin chu oración.

TAʼAKGPUWANTIN CHU TASTAKYAW

18. Akxni natalan matitaxtikgonita tuku xkalakgchan, tiku pulalima tamakxtumit kgalhi max akgtum minuto xlakata nakalimaʼakgpuwantini chu nakalistakyawa tuku wan takgalhtawakga o lección nema liskujmakgo. Akxni tiku pulalima tamakxtumit nawan tuku kalakgchan natalan, ni xliwanat tuku takgalhtawakga liskujmakgo. Akxni tala matitaxtinita tuku xlakgchan chu akxni maʼakgpuwantinikanita, tiku pulalima tamakxtumit tlan nawan tuku takgalhtawakga xliskujma chu tuku xlakata tlan tlawalh o tuku xlakata talakaskin tlakg naliskuja uma lección chu la tlan chuna natlawa. Tiku pulalima tamakxtumit na tlan nalichuwinan atanu tuku tlan tlawalh tala komo naʼakxilha pi uma namakgtaya tala chu amakgapitsin tiku anta wilakgo. Akxni nasputa tamakxtumit o atanu kilhtamaku, tlan nakamaxkikan atanu tastakyaw nema nakamakgtaya chu anta natakilhtiya kfolleto Kakapaxki latamanin, Tlakg tlan kakgalhtawakga o klibro Benefíciese. Max tlan nalitachuwinankan lección nema xliskujma o atanu tuku tlan xliskujli (komo tlakg katsiputuna tuku xlitlawat tiku pulalin tamakxtumit chu tala tiku stakyawanan, kaʼakxilhti párrafos 19, 24 chu 25).

LA XLILHUWA XLIMAKGAPALAT

19. Niti xlimalakatsalit kilhtamaku nema lakgchan (nipara wa tiku pulalin tamakxtumit). Maski klikgalhtawakga Xlatamat chu xtaskujut kstalanina Cristo wan la xlilhuwa xlimakgapalat tuku matitaxtimaka, komo liwana lichuwinankaja tema, ni talakaskin amakgtum nalichuwinamparakan kaj xlakata namakgatsikan minutos nema min anta. Akxni chatum tala malakatsali xkilhtamaku nema xlakgchan, tiku pulalima tamakxtumit o tala tiku stakyawanan nastakyawa pero akxni xʼakstukan wilakgo (kaʼakxilhti párrafo 24 chu 25). Putum tamakxtumit, takilhtlin chu oraciones, xlimakgapalat akgtum hora 45 minutos.

AKXNI KINKALAKGAPAXIALHNANAN SUPERINTENDENTE DE CIRCUITO

20. Akxni superintendente de circuito lakgapaxialhnama congregación, programa namatitaxtikan chuna la wan Xlatamat chu xtaskujut kstalanina Cristo, pero wi tuku nalakgpalikan. Ni katimatitaxtika «Takgalhtawakga nema takilhtinit kBiblia kcongregación», wata superintendente namatitaxti akgtum taʼakgchuwin nema makgapala 30 minutos. Akxni nina matitaxti xtaʼakgchuwin superintendente, tiku pulalima tamakxtumit nalichuwinan tuku akxilhka, na nawan tuku natamatitaxti semana nema aku mima, namasta tamakatsin chu nalikgalhtawakga cartas nema tlakg xlakaskinka chu alistalh nawan tuku taʼakgchuwin namatitaxti superintendente. Akxni superintendente namasputu xtaʼakgchuwin, nalimasputu takilhtlin nema laksaknit. Superintendente tlan nawani chatum tala pi kalimasputulh oración. Ni xlitamaklakaskinat sala b xlakata namatitaxtikan liʼakxilhtit ktachuwin nema maklakaskinkan kcongregación akxni superintendente kalakgapaxialhnama. Grupos xla atanu tachuwin tlan nakgalhikgo xtamakxtumitkan kxtachuwinkan maski congregación tiku tapakgsinikgo kalakgapaxialhnama superintendente de circuito, pero naʼankgo ksala principal xlakata nakgaxmatkgo taʼakgchuwin nema namasta superintendente.

SEMANA XLA ASAMBLEA

21. Semana akxni nalakgchan asamblea, ni katiʼanalh tamakxtumit kcongregación. Nakamalakapastakakan natalan pi tuku xlakgchan natamatitaxti ktamakxtumit ama semana, chatunu chatunu nalikgalhtawakga o nakatalikgalhtawakga xfamilia.

SEMANA AKXNI LAKAPASTAKKAN AKXNI TINILH CRISTO

22. Komo xʼitat semana nalakgchan akxni nalakapastakkan akxni tinilh Cristo, ni katiʼanalh tamakxtumit Xlatamat chu xtaskujut kstalanina Cristo.

TIKU LAKKAXWILI TUKU NATAMATITAXTI XLATAMAT CHU XTASKUJUT KSTALANINA CRISTO

23. Chatum kgolotsin tiku laksakkanit xlakata nalakkaxwili tuku natamatitaxti ktamakxtumit. Wa lakgaya pi tlan nakitaxtu uma tamakxtumit chu natatlawa chuna la lichuwinamaw unu. Talakaskin pi akxtum nataskuja tala tiku stakyawanan. Akxni congregación kgalhiya nawan likgalhtawakga Xlatamat chu xtaskujut kstalanina Cristo xla akgatiyun papaʼ, tunkun xlilakkaxwilit tuku nakalakgchan natalan kʼumakgolh papaʼ: chuna la liʼakxilhtit, taʼakgchuwin, tiku napulalin tamakxtumit chu atanu tuku namatitaxtikan. Xaʼawatiya uma pulaktiy wa xlimatitaxtitkan natalan tiku lakgkgolotsin kalaksakkgonit (kaʼakxilhti párrafos 3-16 chu 24). Akxni nakalaksaka natalan tiku wi tuku namatitaxtikgo ktamakxtumit, kuenta xlitlawat la xlilhuwa kata kgalhikgo, la xlilhuwa tuku katsinikgo chu komo tlan nalichuwinankgo tuku kalakgayawamaka. Talakaskin pi nakamakatsinikan putum natalan tiku wi tuku kalakgchan akxni akgtutu semana tsankga. Xlitamaklakaskinat formulario Asignación xlakata xlatamat chu xtaskujut kstalanina Cristo (S-89) xlakata nakamakatsinikan tiku kalakgchan liʼakxilhtit, takgalhtawakga chu taʼakgchuwin. Uma kgolotsin kuenta xlitlawat pi namawakakan ktablero programa xla tamakxtumit. Tlan nalaksakkan atanu kgolotsin o siervo ministerial xlakata namakgtaya uma tala. Pero kajwatiya lakgkgolotsin tlan nakalaksakkgo tiku namatitaxtikgo atanu tuku naʼakxilhkan ktamakxtumit.

TIKU NAPULALIN TAMAKXTUMIT

24. Akgatunu semana, chatum kgolotsin napulalin tamakxtumit Xlatamat chu xtaskujut kstalanina Cristo (komo ni anan lhuwa lakgkgolotsin, tlan nakalakgayawakan siervos ministeriales tiku tlan namakgantaxtikgo uma taskujut). Tiku napulalin tamakxtumit nalakkaxwili tuku nalimatsuki chu tuku nalimakgalhsputu. Nalichuwinan putum tuku naʼakxilhkan, chu komo ni anan lhuwa lakgkgolotsin, max natalakaskin namatitaxti makgapitsi taʼakgchuwin. Tlan namatitaxti niku kaj xlitamasiyat video. Ni lhuwa xlichuwinat akxni sputa pulakatunu asignaciones. Lakgkgolotsin xalak congregación wa nalaksakkgo tiku xlilat natlawa uma taskujut. Lakgkgolotsin tiku kalaksakka, tlan napulalinkgo tamakxtumit ni xmakgasni. Komo ni lhuwa lakgkgolotsin anan, tiku lakkaxwili tuku natamatitaxti ktamakxtumit max wa tlakg makglhuwa napulalin tamakxtumit nixawa amakgapitsi lakgkgolotsin. Komo chatum kgolotsin tlan matitaxti «Takgalhtawakga nema takilhtinit kBiblia kcongregación», na tlan napulalin tamakxtumit. Pero kuenta xlitatlawat pi kgolotsin tiku napulalin tamakxtumit xlikatsinit la nakawani laktlan tachuwin tiku kalakgchalh taʼakgchuwin o liʼakxilhtit, chu komo natalakaskin, na xlikatsinit la nakamaxki tastakyaw. Na wa lakgchan kuenta natlawa pi ni namalakatsalikan kilhtamaku la xlikgalhsputat tamakxtumit (kaʼakxilhti párrafos 17 chu 19). Xlakata ni namalakatsalikan kilhtamaku, tlan nawilikan atanu micrófono kplataforma komo tatlani, xlakata tiku pulalima tamakxtumit anta namakatsininan tiku lakgchan na’akgchuwinan chu k’atanu micrófono niku wi atril kaxwilinimakaja nawan tiku na’akgchuwinan. Na tlan nawilikan kplataforma akgtum mesa chu silla xlakata tiku pulalima tamakxtumit natawila akxni nalikgalhtawakgakan Biblia chu akxni namatitaxtikan sección «Tlakg tlan kamakgalhtawakgenaw».

TALA TIKU STAKYAWANAN

25. Tlakg tlan nawan komo wa nalakgayawakan uma taskujut chatum kgolotsin tiku katsini la matitaxtikan taʼakgchuwin. Akxni natalakaskin, tala tiku stakyawanan wa nakamaxki tastakyaw lakgkgolotsin chu siervos ministeriales tiku wi tuku matitaxtikgo ktamakxtumit Xlatamat chu xtaskujut kstalanina Cristo, tiku mastakgo taʼakgchuwin xalak Biblia, tiku pulalinkgo takgalhtawakga xla Makatsinina o «Takgalhtawakga nema takilhtinit kBiblia kcongregación», chu nachuna tiku likgalhtawakgakgo párrafos (kaʼakxilhti párrafo 19). Komo anan lhuwa lakgkgolotsin kcongregación tiku lu katsinikgo mastakgo taʼakgchuwin chu tlan masiyakgo, tlan nalakgpalikan tala tiku stakyawanan akgatunu kata. Ni talakaskin namasta tastakyaw akxni makgalhsputumaka akgatunu asignación.

TAʼAKGCHUWIN KʼATANU SALA

26. Komo anankgo lhuwa natalan tiku tlan wi tuku namatitaxtikgo ktamakxtumit Xlatamat chu xtaskujut kstalanina Cristo, congregaciones tlan namaklakaskinkgo sala b. Kʼakgatunu sala natawila chatum tala tiku stakyawanan, tlakg tlan komo chatum kgolotsin. Komo natalakaskin, tlan nalakgataya chatum siervo ministerial tiku tlan namakgantaxti uma taskujut. Lakgkgolotsin wa nalaksakkgo tiku tlan namakgantaxti uma taskujut chu na wa nawankgo komo natalakgpalitilhakgo o ni. Tala tiku stakyawanan xlitlawat tuku wan párrafo 18. Tiku kalakgchan taʼakgchuwin o liʼakxilhtit xliʼanatkan ksala b akxni matitaxtikaja nawan «Kaputsaw kBiblia tuku lhuwa xtapalh» xla sección «Tuku lhuwa xtapalh xalak Biblia» chu nataspitparakgo ksala principal akxni matitaxtikaja nawan «Tlakg liwana kamakgalhtawakgenaw».

VIDEOS

27. Ktamakxtumit xla itat semana nawilikan makgapitsi videos nema tlan naʼakxilhkan kʼaplicación JW Library^® chu tlan namaklakaskinkan kteléfono o ktabletas.

S-38-TOT 11/23