¿Tuku xlakata talakaskin natamakamastaniyaw Jehová?
«Uma katsisni chatum xʼángel Dios tiku akit kkakninani chu kmaxki xasanto taskujut anta xkimpaxtuya» (HECH. 27:23).
1. 1) ¿Tuku xlitlawat chatum lataman xlakata tlan natamunu? 2) ¿Tuku takgalhskinin nakgalhtinanaw?
«XLAKATA xtamakamastan Jesucristo, ¿makgxtakgnitata tuku nitlan xtlawaya chu tamakamastaninita Jehová xlakata natlawaya xtalakaskin?». Wa uma akgtum takgalhskinin nema tlawakan xlikgalhsputni taʼakgchuwin nema mastakan akxni tamunukan. Pero, ¿tuku xlakata natamakamastanikgo Jehová kstalaninanin Cristo? ¿Tuku tasikulunalin namakglhtinankgo komo chuna natlawakgo? ¿Tuku xlakata lu xlakaskinka chuna natlawakgo xlakata Dios namakgamakglhtinan xtaskujutkan? Xlakata nakatsiyaw xtakgalhtin umakgolh takgalhskinin pulana talakaskin naʼakgatekgsaw tuku wamputun natamakamastaniyaw.
2. ¿Tuku tlawakan akxni tamakamastanikan Dios?
2 ¿Tuku tlawakan akxni tamakamastanikan Dios? Xlakata nakatsiyaw xtakgalhtin kaʼakxilhwi tuku wa Pablo akxni xtajuma kbarco nema xʼama tsankga kchuchut. Apóstol limapakuwilh Jehová «Dios tiku akit kkakninani», uma limasiyalh pi xtapakgsini (kalikgalhtawakga Hechos 27:22-24). Maski, kakilhtamaku «wi kxmakan Akgskgawini», kstalaninanin Cristo tapakgsiniyaw Jehová (1 Juan 5:19). ¿La chuna tlawanitaw? Akxni tamakamastaniyaw Jehová, uma wamputun pi tlawaniyaw akgtum tamalaknun kʼoración chu alistalh tamunuyaw.
3. ¿Tuku limasiyalh xtamunut Jesús, chu la stalanikgo xliʼakxilhtit kstalaninanin Cristo?
3 Jesús wililh liʼakxilhtit kilhtamaku akxni tamunulh, chu limasiyalh kxlakatin amakgapitsin pi xtlawaputun xtalakaskin xTlat. Xlikana, xla xlakachinit kʼIsrael, akgtum kachikin nema xtamakamastaninita Dios, chu nialh xtalakaskin pi xtamakamastanilh. Na ni xmakgantaxtima tuku kskin Limapakgsin. Wata wi tuku lu xlakaskinka xtlawama. Chuna la wan Biblia, wanilh Jehová: «Kaʼakxilhti, kminit […] xlakata naktlawa mintalakaskin» (Heb. 10:7; Luc. 3:21). Chuna, akxni tamunulh limasiyalh kxlakatin Jehová pi xtlawaputun xtalakaskin. La uku, kstalaninanin Cristo stalaniyaw xliʼakxilhtit akxni tamunuyaw, pero akinin limasiyamaw pi tamakamastaninitawa kʼoración Dios.
Tasikulunalin nema makglhtinanaw akxni tamakamastaniyaw Dios
4. ¿Tuku kinkamasiyaniyan la xlatalalin David chu Jonatán?
4 Tamakamastanikan Dios ni kaj katuwa tamalaknun. Wata lu xlakaskinka. Pero, ¿tuku tasikulunalin makglhtinanaw? Tuku nakinkamakgtayayan wa naʼakgatekgsaw pi lu xlakaskinka namakgantaxtiyaw tuku kinkalakgchanan akxni wi tuku malaknuyaw. Kalichuwinaw la katalalinaw amakgapitsin. Xlakata nakgalhiyaw amigos talakaskin pulana akinin amigos nalitaxtuyaw. Lu xlakaskinka pi namakgantaxtiyaw tuku malaknuyaw chu nakuentajtlawayaw tiku talalinaw. Tiku lu tlan latalalilh makgasa nema lichuwinan Biblia wa David chu Jonatán, xlakan lu tlan xlatalalin tlawakgolh akgtum talakkaxlan (kalikgalhtawakga 1 Samuel 17:57 chu 18:1, 3). La uku ni lhuwa katekgsaw tiku latalalin chuna la xlakan. Pero, xtachuna la makgasa tiku lu tlan latalalin uku ni lamakgxtakgkgo chu makgantaxtikgo tuku lamalaknunikgo (Pro. 17:17; 18:24).
5. ¿Tuku xlitlawat xwanit chatum skujni komo chuntiya xtapakgsiniputun xmalana?
5 Anta kʼIsrael xwi atanu talakkaxlan nema xtlawa pi chatum skujni tlan xtalalilh xmalana. Limapakgsin xwan: «Komo skujni makglhuwa nawan: “Ni klitaxtuputun la tiku ni skujni, xlakata lu kpaxki kimalana, kimpuskat chu kinkamanan”, xmalana nalin kxlakatin xaxlikana Dios. Chu malana nalakachipawaka xtakgen kmalakcha o xkilhpan malakcha chu nalakglhukini xtakgen. Chuna kskujni nalitaxtu putum xlatamat» (Éxo. 21:5, 6). La akxilhaw, skujni chuntiya tlan xkgalhilh malana xalakgalhamanina tiku xkuentajtlawalh xlakata nitu xʼakgspulalh komo xtatlawalh akgtum talakkaxlan nema xlimasiyalh pi putum kilhtamaku xʼama tapakgsini.
6, 7. 1) ¿Tuku tlan nakinkakitaxtuniyan komo natlawayaw tuku kinkalakgchanan? 2) ¿Tuku tlan nawanaw xlakata la talalinaw Jehová chu la makgantaxtiyaw tuku kinkalakgchanan?
6 Atanu niku tlan namasiyakan pi namakgantaxtikan tuku malaknukan wa ktamakgaxtokgat. Tatlawakan talakkaxlan chatum lataman chu ni wa kapsnat nema firmarlikan. Chixku chu puskat tiku akxtum latawi pero ni tamakgaxtokgkgonit nikxni katitlawalh pi xlakan chu xkamanan namakgkatsikgo chuna la makgkatsikgo tiku tamakgaxtokgkgonit chu xkamanan. Chu tiku ni tamakgaxtokgkgonit max ni katimakgantaxtiputunkgolh tuku kalakgchan chu max na ni katilalimasiyanilh tapaxkit akxni nalakkaxtlawakgo xtaʼakglhuwitkan (Mat. 19:5, 6; 1 Cor. 13:7, 8; Heb. 13:4).
7 Xaʼawatiya kalichuwinaw taskujut. Lata makgasa, talakkaxlan lu xlakaskinka litaxtukgonit (Mat. 20:1, 2, 8). Wa xlakata, akxni matsukikan akgtum negocio o tsukukan taskujkan chatum lataman chu firmarlikan akgtum contrato xchatiykan litamakgtayakgo. Chuna, la akxilhnitawa tlakg tlan latalalin, tiku amigos, tiku makgaxtokgkgo chu tiku akxtum lataskuja akxni makgantaxtikgo tuku kalakgchan. Pero chuna la talalinaw Jehová tlakg tatliwakglha akxni tamakamastaniyaw chu waniyaw pi namakamaxkiyaw kilatamatkan. Nalichuwinanaw la lu tlan xkakitaxtuni makgasa akxni xtamakamastanikgo Dios, chu naʼakxilhaw tuku xlakata lu xlakaskinka xwanit.
Xlakata Israel tamakamastanilh Dios tlan kitaxtunilh
8. ¿Tuku xkilhchanima xpalakata israelitas natamakamastanikgo Dios?
8 Xputumkan israelitas tamakamastanikgolh Jehová akxni tlawanikgolh akgtum tamalaknun. Xla xkamamakxtuminit kxlakatin sipi Sinaí chu xkawaninit: «Komo wixin liwana nakgalhakgaxpatatit kintachuwin chu namakgantaxtiyatit tuku kkatalakkaxlan, akit nakintapakgsiniyatit nixawa la makgapitsi kachikinin, xlakata akit kintapakgsini putum katiyatni. Alistalh putum kachikin makxtum kgalhtinalh: “Xlikana naktlawayaw putum tuku Jehová wanit”» (Éxo. 19:4-8). Ama tamalaknun tlakg xlakaskinka xwanit nixawa atanu talakkaxlan. Uma xlimasiya pi xtapakgsinikgo Jehová, chu xla kawanilh pi xʼama kalikatsini la tiku “tapakgsinikgo”.
9. ¿Tuku tasikulunalin makglhtinankgolh israelitas xlakata tamakamastanikgolh Dios?
9 Jehová kamaxkilh lhuwa tasikulunalin israelitas xlakata tapakgsinikgolh. Xla ni kamakgxtakgli chu lu tlan kalikatsinilh la xkamanan. Asta kawanilh: «¿Tlan chatum puskat nialh nalakapastaka kskgata o nialh nalakgalhaman kgawasa nema xlin kxpan? Maski umakgolh lakpuskatin nialh xlakapastakkgolh, akit ankgalhin naklakapastakan» (Isa. 49:15). Dios limaklakaskilh limapakgsin xlakata xkapulalilh xkachikin, kalimatliwakgli xpalakachuwinanin chu kalikuentajtlawalh xʼángeles. Salmista wa: «[Jehová] makatsinima xtachuwin Jacob, xlimapakgsin chu tuku natlawani Israel. Ni chuna tlawanit xpalakata atanu kachikin» (Sal. 147:19, 20; kalikgalhtawakga Salmo 34:7, chu 48:14). Chuna la kakuentajtlawalh israelitas, tiku xtapakgsinikgo, la uku nachuna kakuentajtlawa kstalaninanin Cristo tiku tamakamastanikgonit.
¿Tuku xlakata natamakamastaniyaw Dios?
10, 11. ¿Tuku xlakata ni lakachiw kxfamilia Jehová?
10 Wi tiku lakpuwankgo: «¿Tuku xlakata naktamakamastani Jehová chu naktamunu xlakata tlan nakskujnani?». Naʼakgatekgsaw tuku xlakata chuna kilitlawatkan komo nalilakpuwanaw la tatekgsaw kxlakatin. Xlakata makglakgalhinalh Adán kimputumkan ni tapakgsiyaw kxfamilia Jehová (Rom. 3:23; 5:12). Chu xlakata tlan natapakgsiyaw kxfamilia xlakaskinka natamakamastaniyaw. Kaʼakxilhwi tuku xlakata.
11 Nipara chatum akinin kgalhiyaw tlat tiku nakinkamaxkiyan latamat nema ni kgalhi xlisputni (1 Tim. 6:19). Akxni lakachiw xtamakgatlininitaw kinTlatkan chu kiMalakatsukinakan chu nila xlitaxtuyaw xkamanan xlakata xapulana tamakgaxtokgat makglakgalhinalh (katamalakxtupi Deuteronomio 32:5). Lata ama kilhtamaku, latamanin ni lakachinkgo kxfamilia Jehová chu tamakgatlinikgonit.
12. 1) ¿La tlan xamakglakgalhinanin latamanin namakgtapakgsikgo kxfamilia Dios? 2) ¿Tuku xlitatlawat xlakata tlan natamunukan?
12 Maski chuna, chatunu akinin tlan naskiniyaw Jehová kakinkamaxkin talakaskin namakgtapakgsiyaw kxfamilia.a Pero ¿la tlan namakgtapakgsiyaw kxfamilia Dios maski makglakgalhinanin akinin? Xlakata la lichuwinalh Pablo, «akxni talatlawananin xlitaxtuyaw tlan talalimparaw Dios kaj xlakata nilh xKgawasa» (Rom. 5:10). Xlakata tlan nakinkamakgamakglhtinanan talakaskin naskiniyaw tlan talakapastakni chu kaj akxni natamunuyaw tlan chuna nakgalhiyaw kintalakapasknikan (1 Ped. 3:21). Pero pulana wi atanu tuku kilitlawatkan. Pulana talakaskin liwana nalakgapasaw Jehová, nalipawanaw chu alistalh natalakaskin nalakgmakganaw tuku nitlan tlawanitaw chu kililakgpalitkan kilatamatkan (Juan 17:3; Hech. 3:19; Heb. 11:6). ¿Tuku kilitlawatkan alistalh?
13. ¿Tuku xlakata xlakaskinka natamakamastaniyaw Jehová xlakata namakgtapakgsiyaw kxfamilia?
13 Xlakata namakgtapakgsiyaw kxfamilia Jehová, talakaskin natlawaniyaw akgtum tamalaknun. ¿Tuku xlakata? Kawiliw akgtum liʼakxilhtit. Chatum tlat tiku lu lakgapaskan kxkachikin lakgapasa chatum kgawasa tiku ni kgalhi xnatlatni, lakgalhaman chu lakpuwan pi xkgawasa nalimaxtu. Pero wani pi wi tuku xlitlawat: «Klakaskin pi nakimalaknuniya pi nakiliʼakxilha la mintlat, nakimaxkiya kakni chu ankgalhin nakimpaxkiya». Komo kgawasa ni natlawa uma tamalaknun ni katimakglhtinalh la xkgawasa. Xlikana pi ni lu tuwa tuku skinimaka. Nachuna kitaxtu xpalakata Jehová: kajwatiya tiku natamakamastanikgo namakgamakglhtinan kxfamilia. Chuna kinkamasiyaniyan Biblia akxni wan: «kamakamastatit mimaknikan xtachuna la xastakna tamakamastan, xasanto, nema Dios tlan makgamakglhtinan» (Rom. 12:1).
Limasiyakan tapaxkit chu takanajla
14. ¿La limasiyayaw tapaxkit akxni tamakamastaniyaw Dios?
14 Akxni tamakamastaniyaw Dios limasiyaniyaw kintapaxkitkan. Uma tatalakxtumi tamalaknun nema tlawakan akxni tamakgaxtokgkan. Kilhtamaku akxni tamakgaxtokga, kstalanina Cristo malaknuni xpuskat pi ankgalhin natatawila maski katuwa tuku natitaxtukgo chu chuna limasiya pi paxki. Ni kaj tatamakgaxtokgma, wata malaknunima pi nikxni katimakgxtakgli. Nachuna katsi pi nila akxtum katilatamakgolh komo ni natatlawa uma tamalaknun. Xtachuna la uma, nila katilipaxuwaw putum tuku lipaxuwa xfamilia Jehová komo ni natamakamastaniyaw. Chuna la akxilhaw tamakamastaniyaw Dios xlakata tapakgsiniyaw chu maski makglakgalhinanin akinin ni makgxtakgputunaw maski katuwa tuku natitaxtuyaw (Mat. 22:37).
15. ¿Tuku xlakata wanaw pi akxni tamakamastaniyaw Jehová limasiyayaw takanajla?
15 Limasiyayaw takanajla akxni tamakamastaniyaw Dios. Chuna: tamakamastaniyaw Jehová xlakata kanajlaniyaw chu lipawanaw pi akxni talalinaw tlan nakinkakitaxtuniyan (Sal. 73:28). Katsiyaw pi namin kilhtamaku tuwa namakgkatsiyaw naskujnaniyaw, xlakata lamaw kakilhtamaku niku «latamanin […] lixkajni likatsikgo chu ni tlawakgo tuku xaʼakgstitum». Pero nakatsiyaw pi Dios namakgantaxti xtamalaknun xlakata nakinkasikulunatlawayan xlakata la skujnanimaw (Fili. 2:15; 4:13). Liwana katsiyaw pi nakinkalimasiyaniyan talakgalhaman akxni namakglakgalhinanaw maski ni chuna xtlawaputunaw (kalikgalhtawakga Salmo 103:13, 14 chu Romanos 7:21-25). Chu liwana katsiyaw pi nakinkasikulunatlawayan komo naliskujaw xlakata ni namakgxtakgaw (Job 27:5).
Kgalhiyaw tapaxuwan akxni tamakamastaniyaw Jehová
16, 17. ¿Tuku xlakata kgalhiyaw tapaxuwan akxni tamakamastaniyaw Dios?
16 Akxni tamakamastaniyaw kinkamakgapaxuwayan xlakata makamaxkiyaw kilatamatakan Jehová, chu chuna la Jesús wa: «Tlakg anan tapaxuwan akxni mastakan nixawa akxni makglhtinankan» (Hech. 20:35). Akxni xKgawasa Dios xlama unu kKatiyatni lilatamalh uma tastakyaw chu makgkatsilh tapaxuwan nema makgkatsikan akxni mastakan. Akxni xtalakaskin, ni xjaxa, ni xwayan chu ni xputsa tuku xla xlakaskin xlakata xkamasiyanilh latamanin tiji xla latamat (Juan 4:34). Chu lu tlan xlimakgkatsi xlakata xmakgapaxuwa xTlat. Wa xlakata wa: «Akit putum kilhtamaku ktlawa tuku makgapaxuwa» (Juan 8:29; Pro. 27:11).
17 Jesús kamasiyanilh kstalaninanin latamat nema masta lhuwa tapaxuwan: «Komo wi tiku kistalaniputun, akstu kalakgmakganka» (Mat. 16:24). Akxni akstu kinkalakgmakgankanan, uma wamputun akxni nialh tlawayaw tuku akinin lakaskinaw, tlakg talakatsuwiniyaw Dios tiku paxkinan. ¿Tlakg tlan alakatanu xtawilaw?
18. ¿Tuku xlakata tlakg paxuwayaw akxni tamakamastaniyaw Dios nixawa atanu lataman o akxni wi tuku kiʼakstukan putsayaw?
18 Tiku tamakamastanikgo Jehová chu lilatamakgo la xla lakaskin tlakg paxuwakgo ni xtachuna tiku tamakamastanikgo achatum lataman o akxni wi tuku xʼakstukan tlawakgo, la akxni tlakg putsakgo tumin. Kstalaninanin Cristo xlikana paxuwakgo (Mat. 6:24). Xlikana pi paxuwakgo xlakata kgalhikgo talakgalhaman «xlakata […] xtaskujnin Dios» litaxtukgo (1 Cor. 3:9). Jehová lhuwa xtapalh liʼakxilha tuku tlawaya xlakata ni namakgxtakga chu putum tuku limakgxtakga xlakata naskujnaniya. Chu natlawa pi putum tiku linkgoya kata nalitaxtuparakgo la akxni ni xkgalhikgo lhuwa kata chu ankgalhin nakakuentajtlawa (Job 33:25; kalikgalhtawakga Hebreos 6:10).
19. ¿Tuku talakgalhaman kgalhikgo tiku tamakamastanikgonit Jehová?
19 Biblia limin uma invitación: «Katalakatsuwinitit Dios, chu xla nakatalakatsuwiniyan» (Sant. 4:8; Sal. 25:14). Tiku natamakamastanikgo Jehová, lu tlan natalalinkgo. Artículo, nema stala naʼakxilhaw tuku xlakata kilitamakamastanitkan Jehová xlakata natapakgsiniyaw.
[Nota nema wi kpágina]
a «Amakgapitsi borregos» nalitaxtukgo xkamanan Dios asta akxni nasputa akgtum mil kata. Pero lata kilhtamaku akxni tamakamastanikgo Jehová tlan limapakuwikgo «Tlat» chu tlan makgtapakgsikgo kxfamilia (Juan 10:16; Isa. 64:8; Mat. 6:9; Apoc. 20:5).
¿Tuku xkgalhtinanti?
• ¿Tuku kilhchanima natamakamastanikan Dios?
• ¿Tuku tasikulunalin makglhtinanaw akxni tamakamastaniyaw Dios?
• ¿Tuku xlakata natamakamastanikgo Jehová kstalaninanin Cristo?
[Dibujo]
Akxni makgantaxtiyaw tuku malaknuninitaw Dios kinkaliminiyan xaxlikana tapaxuwan