¿Lu xlakaskinka tuku wan Biblia?

«Ktsukulh katataxtu lakgkgawasan akxni xakkgalhi 10 kata. Pulana kaj xaklamakgachipayaw chu xaklakilhtsukaw, pero alistalh xaklaxamayaw niku ni xlilat. Akxni ktsukulh kskuja, kajku xakkgalhi akgkukitsis kata chu lakchixkuwin xkiwanikgoya pi xakkatatalakgxtumilh. Ni xakpekuamputun chu xaktlawaputun putum tuku xtlawakgo kimcompañeros. Chu xlakata tlan xkintalalinkgolh, chuntiyaku katiwa xaktatalakgxtumi.» (SARA, AUSTRALIA)a

¿KAKS xlilakawanti komo xkatsi pi Sara makgastakka niku kanajlanikan Dios? Maski xnatlatni masiyanikgolh xlakata xlilh xlatamat chuna la wan Biblia, xla laksakli natiya atanu tiji.

Max lhuwa lakpuwankgo pi tlan tuku laksakli Sara, xlakata lakpuwankgo pi tuku wan Biblia xlakata talakgxtumit nialh xlakaskinka la uku. Amakgapitsi lakpuwankgo pi tlan nakgalhiya mintakanajla chu natlawaya talakgxtumit chuna la tlawaputuna.

Pero ¿xlakaskinka nakatsiyaw chu natlawayaw tastakyaw nema wan Biblia xlakata talakgxtumit? Biblia wan: «Paks ntimapuwanikgolh Dios lantla natsokgkgoy [...], chu na lu wa tlan nalimakgalhtawakganankan» (2 Timoteo 3:16). Wa xlakata, komo kanajlayaw pi Dios tlawalh putum tuku anan chu Biblia wa xTachuwin, lu xlakaskinka kiliʼakxilhatkan tuku wan.

Lu nitlan pi lhuwa tiku ni liwana katsikgo tuku wan Biblia xlakata talakgxtumit. Asta xpulalinanin takanajla tiku wankgo pi kgalhakgaxmatkgo tuku wan Biblia, ni akxtum tuku lakpuwankgo. Uma tlawanit pi natapitsi laklanka takanajla.

Pero ni kakanajlaw tuku wankgo amakgapitsin, tlakg tlan akinin kalakputsananiw tuku wan Biblia xlakata uma. Artículo nema aku mima limin akgkaw takgalhskinin nema tlakg tlawakgo latamanin xlakata talakgxtumit chu nakinkamaxkiyan xtakgalhtin nema takilhtinit kBiblia. Kxaʼawatiya artículo nakinkawaniyan tuku xlakata xlakaskinka tuku natlawayaw alistalh.

[Nota nema wi kpágina]