Abrahán chixku tiku xkgalhi takanajla

Abrahán ya kkilhtin chu akxilhma staku kʼakgtum stlan katsisni. Lakapastakma tuku Dios waninit, pi xfamilia xʼama lhuwan chuna la xlilhuwa staku (Génesis 15:5). Akxni Abrahán akxilha staku ni kaj wa lakapastaka tuku Jehová waninit, na katsi pi xlikana nakgantaxtu. Komo Jehová tlawalh putum tuku anan kkakilhtamaku, ¿nila katikamaxkilh Abrahán chu Sara chatum aktsu kgawasa? ¡Akgtum lu tlan liʼakxilhtit xlakata kanajlanikan Dios!

¿TUKU TAKANAJLA? Biblia wan pi tiku kgalhi takanajla liwana katsi pi nakgantaxtu tuku wanikan maski ni akxilha xlakata wi tuku makgtaya chuna nakanajla. Wa xlakata, tiku kanajlani Jehová liwana katsi pi namakgantaxti tuku wanit chu makgkatsi pi kgantaxtunita.

¿LA LIMASIYALH ABRAHÁN TAKANAJLA? Limasiyalh pi xkanajlani tuku xwani Dios. Xlakata xkgalhi takanajla makgxtakgli kachikin niku lakachilh, liwana xkatsi pi Jehová xʼama lin kʼatanu tiyat. Xlakata xkanajlani Dios makgxtakgli xkachikin chu lakalhuwa latamalh kxtiyat Canaán, liwana xkatsi pi xfamilia xʼamaka kamaxkikan uma tiyat. Chu xlakata xtakanajla kgalhakgaxmatli Dios chu xʼama makamasta Isaac, liwana xkatsi pi Jehová tlan xmalakastakwanilh komo xtalakaskilh xlakata xmakgantaxtilh tuku xwaninit (Hebreos 11:8, 9, 17-19).

Wa akxilhlakachalh tuku xʼamaka maxkikan, chu ni wa tuku makgxtakgli. Max lu tlan latamat xkgalhikgo Abrahán chu Sara anta kʼUr ni xtachuna kʼCanaán. Pero maski chuna, xlakan ni «xlakapastaklakankgo[...] yama ntani ntitaxtukgolh» (Hebreos 11:15). Wata lakapastakkgolh tasikulunalin nema Dios xʼama kamaxki chu tuku na xʼama kamaxki xkamanan (Hebreos 11:16).

¿Tlan kitaxtunilh Abrahán xlakata kanajlanilh Dios? Chuna. Jehová putum makgantaxtilh tuku xwaninit. Xfamilia Abrahán lu lhuwa wankgolh, akxni titaxtulh kilhtamaku lu lanka kachikin wankgolh. Nachuna, israelitas anta tawilakgolh kxtiyat Canaán, nema Dios xwaninit pi xʼama maxki Abrahán (Josué 11:23).

¿TUKU KINKAMASIYANIYAN XLIʼAKXILHTIT? Akinin tlan nakanajlayaw pi Jehová namakgantaxti tuku wanit. Maski xlakatin latamanin wi tuku tasiya pi nila katikgantaxtulh, kilikanajlatkan pi «Dios ni pala pulaktum wi wantu napuwa[naw] pala nilay tlaway» (Mateo 19:26).

Tuku tlawalh Abrahán kinkamasiyaniyan pi akinin ni nalakapastakaw tuku makgxtakgnitaw, wata wa nalakapastakaw tuku namakgamakglhtinanaw. Wa uma tuku tlawa Jason, chatum chixku tiku nila tatsuwi xlakata kgalhi akgtum tajatat nema tlakg masnunima. Xla wan, «kkatsi pi lakgachunin klakapastaka tuku tlan xaktlawa chu uku nialhla ktlawa. Lu lhuwa tuku klakapastaka la akxni xakʼakgpixti kimpuskat, Amanda».

Pero, Jason kanajla pi Jehová akgtum paraíso natlawa xlikalanka Katiyatni chu xlakskujnin tiku ni makgatsankgananikgo nakamaxki latamat nema nikxni sputa chu nialh katitatatlakgolh (Salmo 37:10, 11, 29; Isaías 35:5, 6; Apocalipsis [Revelación] 21:3, 4).a Jason wan: «Akit klakapastaka pi namin tlakg xatlan latamat chu nialh katitlakgwalh kintalakapastaknikan, nialh nalipuwanaw, nialhtu katililakgaputsaw chu nialh katimakgkatsiw pi wi tuku nitlan tlawanitaw». ¡Jason wili lu tlan liʼakxilhtit xla takanajla chuna la Abrahán!

[Nota nema wi kpágina]