Tuku katsiputunkgo tiku likgalhtawakgakgo

¿Pi namalakgsputukan katiyatni?

▪ Makgapitsi xlakpuwankgo pi Katiyatni xʼama lakgsputa 21 xla octubre kkata 2011. Pero ni chuna lalh. Tuku xlichuwinanit pi nala tiku chuwinan kradio Harold Camping xalak Estados Unidos, ni kgantaxtulh. Harold Camping xwanit pi 21 xla mayo kata 2011 xʼama lakputsananikan latamanin. Xwanit pi xʼama tachiki Tiyat, chu xtitaxtulh akgkitsis papaʼ 21 xla octubre xʼama lakgsputa Katiyatni.

Pero tuku xaxlikana, Katiyatni nikatimalakgsputuka, xlakata kiMalakatsukinakan ni katimastalh talakaskin. Biblia wan: «Makgan wilinita katiyatni y asta chi latiya wij» (Salmo 119:90).

Maski chuna makgapitsi tiku likgalhtawakgakgo Biblia ni chuna lakpuwankgo chu wankgo pi lhkuyat namalakgsputu Katiyatni. Chu limaklakaskinkgo 2 Pedro 3:7, 10, niku wan: «Wampi wa ntu nchu akgapun, chu ntiyat [...] litamakinit lhkuyat akxni xlikgalhtsputni Katuxawat akxni na[...]putsananikgoy wanti lakgachixkuwimakganankgolh Dios. [...] Xkilhtamaku nkimPuchinakan akxni xliminat, namin xtachuna nkgalhana nkatsisni, akxni cha nalakgsputa akgapun, lipikua namakawan nalakgpankga, chu ntu litustuka ntiyat, napasay, na nalakgsputa. Wa ntiyat, chu xtatlawkan nchixkuwin, paks nalhkuy». Uma tuku wa apóstol Pedro ¿pi xlikana chuna naʼakgspula Katiyatni chu akgapun?

Ni, xlakata tuku wankgo umakgolh versículos, chu putum xcarta Pedro chu amakgapitsi libros xalak Biblia nachuna xlichuwinankgolh. Komo chuna xlalh tuku wankgo umakgolh versículos, akgapun chu lhuwa millón staku chu amakgapitsi tuku anan, putum nakalhkuyukan kaj xpalakata ni lhuwa latamanin. ¿Pi xmalakgsputu akgtum lu stlan xkilhtun pupunu kaj xlakata ni lakgatiya akgtum aktsu muntsaya? Na xtachuna Jehová ni katimalakgsputulh putum kakilhtamaku nema tlawanit kaj xlakata makgapitsi kKatiyatni ni kgalhakgaxmatkgolh.

Nachuna komo wanaw pi namalakgsputukan Katiyatni ni xtachuna tuku wa Jesucristo: «Chapaxuwana lamakgo wa nti xalaksmalhwan, xampi wa namakgamakglhtinankgoy nkatiyatna» (Mateo 5:5; Salmo 37:29). ¿Tikuya tlat nakatlawani lu stlan chiki xfamilia chu alistalh nalhkuyu? (Salmo 115:16.) ¡Niti chuna xtlawalh! Jehová nikaj Malakatsukina: xla Tlat xapaxkina (Salmo 103:13; 1 Juan 4:8).

Anta 2 Pedro 3:7, 10, apóstol Pedro maklakaskilh tachuwin tiyat akxni xkilhchanima latamanin tiku lixkajni likatsikgo. Kaʼakxilhwi pi xtamalakxtumima akxni namasputunankan xtachuna akxni milh Munkaklat xkilhtamaku Noé (2 Pedro 3:5, 6). Kajwatiya nikgolh tiku lixkajni xlikatsikgo. Katiyatni, Noé chu xfamilia lakgtaxtukgolh. Na chuna, akxni Pedro lichuwinalh akgapun kʼuma versículo, xkilhchanima mapakgsinanin xalak Katiyatni. Wa xlakata, tiku lixkajni likatsikgo chu nikxni kgalhakgaxmatnankgo nakamalakgsputukan nachuna mapakgsinanin chu xlakgxokgo natawila xTamapakgsin Dios xalak akgapun (Daniel 2:44).

Wa xlakata, ¿pi namalakgsputukan kinKatiyatnikan? Ni. Wa tuku nalakgsputa wa, latamanin tiku lixkajni likatsikgo. Katiyatni chu latamanin tiku kgalhakgaxmatkgo Dios putum kilhtamaku nalatamakgo (Proverbios 2:21, 22).