Wantuku masiya xTachuwin Dios

¿Tuku nakaʼakgspula takanajla nialh makgas?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina, xtatayananin Jehová tlan natalikgalhtawakgakgoyan umakgolh takgalhskinin.

1. ¿Tlan putum takanajla?

Kputum takanajla wilakgolh latamanin tiku makgapaxuwaputunkgo Dios. Xla kalakgapasa chu lu xlakaskinka kaʼakxilha. Pero lhuwa tuku nitlan tatlawanit kxtukuwani takanajla. Makgasa makgapitsi tiku xpulalinkgo takanajla xkamakgapatinankgo tiku ni xkanajlakgo la xlakan (2 Corintios 4:3, 4; 11:13-15). Chu la uku kgaxmataw knoticas xlakata makgapitsi tiku makgtapakgsikgo akgtum takanajla makgtayanankgo xlakata namakgninankan, o makgtayanankgo xlakata naʼanan guerra chu kalikgamanankgonit kamanan. (Kalikgalhtawakga Mateo 24:3-5, 11, 12.)

Biblia wan pi kaj akgtum xaxlikana takanajla anan, chu amakgapitsin ni xaxlikana. Umakgolh takanajla masiyakgo taʼakgsanin xlakata Jehová Dios. Pero Jehová lakaskin pi latamanin kakatsikgolh tuku xaxlikana. (Kalikgalhtawakga 1 Timoteo 2:3-5.)

2. ¿Tuku nakaʼakgspula nixaxlikana takanajla?

Dios ni kaʼakxilhputun takanajla nema wankgo pi paxkikgo pero kamasiyanikgo latamanin taʼakgsanin xlakata Dios. Chu makgapitsi tiku makgtapakgsikgo knixaxlikana takanajla lakgatikgo kakilhtamaku nema mapakgsi Satanás (Santiago 4:4; 1 Juan 5:19). Biblia katamalakxtumi nixaxlikana takanajla, tiku tatayakgo mapakgsinanin chu ni Dios, la chatum puskat tiku sta xmakni nema wanikan «xaTlanka Babilonia». Uma tukuwani na xlilakgapaskan kachikin niku lakatsukulh nixaxlikana takanajla akxni xtitaxtunita Munkaklat. Nialh makgas Dios kaj xalan nakamasputu putum takanajla nema akgskgawikgo chu tlawakgo kakgalhikgolh taʼakglhuwit latamanin. (Kalikgalhtawakga Apocalipsis [Revelación] 17:1, 2, 5, 17 chu 18:8, 23, 24.)

3. ¿Tuku kilhtamaku natawila tapaxuwan xlikalanka Katiyatni?

Jehová nalimin tuku tlan kkakilhtamaku akxni nakamasputu nixaxlikana takanajla. Nialh katiʼakgskgawinankgolh chu nialh nakamapitsikgo latamanin. Putum kajwatiya nakakninanikgo xaxlikana Dios. ¿Ni lakpuwana pi uma lu tlan tamakatsin? (Kalikgalhtawakga Isaías 11:9; Apocalipsis 18:20, 21 chu 21:3, 4.)

4. ¿Tuku xlitlawatkan latamanin tiku tlan likatsikgo?

Jehová kalakapastaka latamanin tiku tlan likatsikgo chu tanumakgolh knixaxlikana takanajla nema wilakgolh xlikalanka kakilhtamaku. Xla tlawama pi latamanin tlan nalatalalinkgo akxni katsinikgo tuku xlikana masiya Biblia. (Kalikgalhtawakga Miqueas 4:2, 5.)

Jehová xatapaxuwan kamakgamakglhtinan tiku skujnaniputunkgo. Maski kiʼamigoskan o kifamiliajkan ni nalakgatikgo akxni natsukuyaw skujniyaw Jehová, namakglhtinanaw lhuwa tasikulunalin: tlan natalalinaw Jehová, nakgalhiyaw akgtum xasasti «familia» chu nakgalhiyaw takgalhkgalhin pi xliputum kilhtamaku nalatamayaw. (Kalikgalhtawakga Marcos 10:29, 30 chu 2 Corintios 6:17, 18.)

Komo tlakg katsiputuna xlakata uma, kaʼakxilhti capítulos 15 chu 16 xla uma libro, ¿Tuku xlikana masiyay Biblia?, tlawakgonit xtatayananin Jehová.

[Tiku tapakgsini fotografía xla página 26]

The Complete Encyclopedia of Illustration/J. G. Heck