Xlisputni kakilhtamaku: kilipekuanitkan, nalakgatiyaw chu nakinkamakgalipuwanan

¿La makgkatsiya xlakata 21 xla diciembre kata 2012, niku lhuwa wankgo pi xcalendariojkan mayas xwan pi xlikalanka katiyatni xʼama talakgpali? Komo wi tuku xlakpuwanita xʼama la, max tlan mamakgkatsiniyan, makgalipuwanan o nitu mamakgkatsiniyan. ¿Watiya tuku nixlikana wankan xlakata xlisputni kakilhtamaku?

¿Chu tuku lakpuwana «akxni nasputa kakilhtamaku» nema lichuwinan Biblia? (Mateo 24:3, TNM.) Wi tiku pekuanikgo pi nalhkuyukan Katiyatni. Makgapitsi lakgatikgo kgaxmatkgo tuku nala akxni namin xlisputni kakilhtamaku. Makgapitsi nialh kgaxmatputunkgo pi talakatsuwinita lisputni. Chuna lakpuwankgo xlakata tuku wankgo amakgapitsin, chu ni xlakata tuku wan Biblia.

Kaks nalilakawana akxni nakatsiya tuku xlikana lichuwinan Biblia xlakata lisputni. Biblia wan tuku xlakata nakgalhkgalhiyaw lisputni; pero na kinkawaniyan pi nialh nakgalhkgalhiputunaw komo nalakpuwanaw pi ni lakapala mima. Wa xlakata kkawaniyan pi kalikgalhtawakga tuku wan Biblia xlakata xtakgalhtin akgtati takgalhskinin nema tatlawa latamanin xlakata lisputni.

¿Nalhkuyukan Katiyatni?

BIBLIA KGALHTINAN: «Akxni [Dios] tlawalh katiyatni, tliwekglh matutilh xlakata nikxni natalaksija» (SALMO 104:5).

Katiyatni ni katilhkuyuka chu ni tuku atanu katilimalakgsputuka; Biblia wan pi tlawaka xlakata putum kilhtamaku anta nalatamakgo latamanin. Salmo 37:29 wan: «Xalaktankswa xlakan nawan ama lipaxaw pulataman [...] kanikxniwa natalatama ana» (Salmo 115:16; Isaías 45:18).

Akxni Dios xtlawakgonita Katiyatni wa pi «lu tlan tuku xtlawanit» chu chuntiya makgkatsi (Génesis 1:31). Dios ni malakgsputuputun katiyatni; wata wa “nakamasputuy tiku lakglakgalhimakgolh katuxawat” chu ni katimastalh talakaskin putum kilhtamaku natlawanikgo tuku nitlan (Apocalipsis o Revelación 11:18).

Pero wix max lakapastakpat tuku wan 2 Pedro 3:7, Hua Xasasti Talaccaxlan, TXS, 1999: «Akgapun xawa katiyatna [...] aya lipulhkakanit pi wa lhkuyat nalimalakgsputukan». ¿Ni masiya uma texto pi nalhkuyukan Katiyatni? Min kilhtamaku akxni Biblia lichuwinan akgapun, katiyatni chu lhkuyat atanu tuku wamputun. Akgtum liʼakxilhtit akxni Génesis 11:1 wan: «Putum Katiyatni chuntiya kaj akgtum tachuwin xkgalhikgo». Akxni limaklakaskin, «Katiyatni» kilhchanima latamanin.

Tuku wan xcontexto 2 Pedro 3:7 xlakata akgapun, katiyatni chu lhkuyat limasiya pi atanu tuku wamputun. Versículo 5 chu 6 lichuwinan Munkaklat nema milh kxkilhtamaku Noé. Latamanin kamasputuka pero Katiyatni nitu lanilh. «Katiyatni» nema masputuka wa tiku lixkajni xlikatsikgo chu «akgapun» wa tiku xkamapakgsikgo latamanin (Génesis 6:11). Nachuna, kversículo 7 nema lichuwinan «lhkuyat», wamputun pi putum nakamasputukan latamanin tiku lixkajni likatsikgo chu xmapakgsinanin tiku nachuna xtayatkan.

¿Tuku nala akxni namin xlisputni kakilhtamaku?

BIBLIA KGALHTINAN: «Kakilhtamaku titaxtuma chu nachuna tuku lakgati, pero tiku tlawa xtalakaskin Dios putum kilhtamaku latama» (1 JUAN 2:17, TNM).

«Kakilhtamaku» nema natitaxtu ni wa Katiyatni, wa latamanin tiku ni tlawakgo xtalakaskin Dios. Chuna la makuchina chukuxtu niku kgalhi cáncer xlakata nalakgmaxtuni xlatamat tiku tatatla, nachuna Dios nakamasputu kKatiyatni tiku lixkajni likatsikgo, xlakata tiku tlan likatsikgo xlikana nalipaxuwakgo latamat (Salmo 37:9). Wamputun pi «akxni nasputa kakilhtamaku» lu tlan tuku nakitaxtu.

Tachuwin «akxni nasputa kakilhtamaku», makgapitsi biblias wilikgo umakgolh tachuwin «xkgalhsputat tuku anan uku [o xkgalhsputat kakilhtamaku, Biblia Textual] chu uma kinkamakgtayayan naʼakgatekgsaw tuku wamputun (Mateo 24:3). Xlakata latamanin chu Katiyatni nitu katilanikgolh akxni namin lisputni, ¿ni lakpuwana pi talakaskin na natawila xasasti kakilhtamaku? Biblia wan pi chuna nala«wantu namin kilhtamaku» (Lucas 18:30).

Jesús mapakuwilh uma kilhtamaku akxni “natalakgpali latamat”. Jesús nakaxwilipara chuna la xlakaskin Dios nalatamakgo latamanin (Mateo 19:28). Akxniku tlan nalipaxuwayaw umakgolh tasikulunalin:

• Anta Katiyatni niku akgtum paraíso nawan nialh kalipekua katiwa chu putum tlan natawilakgokan (Isaías 35:1; Miqueas 4:4).

• Taskujut lu tlan nawan chu lu namakgapaxuwanan (Isaías 65:21-23).

• Nakamasputukan putum tajatat (Isaías 33:24).

• Lakgkgolun lakgkgawasan nawamparakgo (Job 33:25).

• Nalakastakwanamparakgo tiku nikgonitta (Juan 5:28, 29).

Komo natlawayaw xtalakaskin Dios ni katipekuaniw xlisputni kakilhtamaku, wata lu nakgalhkgalhiputunaw.

¿Xlikana lu lakatsu wi xlisputni kakilhtamaku?

BIBLIA KGALHTINAN: «Akxni chuna wixinin naʼukxilhatit pi kgantaxtuma nawan wantu lanchu kkawaniman, pus kakatsitit pi aya lakgchanit kilhtamaku lantla Dios laklhkawilinit nakalakgmaxtuyan» (LUCAS 21:31, TXS, 1999).

Klibro The Last Days Are Here Again (Taspitparanit xaʼawatiya kilhtamaku) makgalhtawakgena Richard Kyle tsokgli pi «akxni kaj lakapala talakgpali chu akxni tawila taʼakglhuwit kkakilhtamaku tlakg lhuwa tuku wankgo xlakata akxni namin lisputni». Tlakg chuna kitaxtu komo ni takatsi tuku xlakata chuna lama.

Pero palakachuwinanin tiku tsokgkgolh Biblia nema lichuwinankgolh lisputni ni kaj xkalimakgapekuwamputunkgo latamanin. Dios kamalakpuwanilh xpalakachuwinanin xlakata xlichuwinankgolh tuku xʼama litasiya xlisputni kakilhtamaku. Kaʼakxilhti makgapitsi tuku xwankanit pi nala chu kaʼakxilhti komo kgantaxtuma o ni.

• Guerras, tatsinksni, tachiki tiyat chu tajatat nema makgninan (Mateo 24:7; Lucas 21:11).

• Tlakg xʼamaka lamakgnikan (Mateo 24:12).

• Latamanin xʼamakgo laktlawakgo Katiyatni (Apocalipsis 11:18).

• Latamanin xakstukan xʼamaka kapaxkikan, xpaxkikgolh tumin, chu tuku xlipaxuwakgolh, pero ni xpaxkikgolh Dios (2 Timoteo 3:2, 4).

• Xʼama laklakgo familias (2 Timoteo 3:2, 3).

• Lhuwa ni xʼamakgo kanajlakgo tuku litasiya pi talakatsuwinita lisputni (Mateo 24:37-39).

• Xʼamaka lichuwinankan xalakwan xalaksasti xlakata xTamapakgsin Dios xlikalanka katiyatni (Mateo 24:14).

Chuna la wa Jesús «xlipaks yuma nkatuwaj» kinkamakgtayayan xlakata nakatsiyaw pi talakatsuwinit xlisputni kakilhtamaku (Mateo 24:33). Xtatayananin Jehová liwana kkatsiyaw pi chuna kgantaxtuma uku chu wa xlakata klichuwinanaw Dios k236 países.

¿Xlakata ni katsikgo akxni namin lisputni wamputun pi nikxni katimilh?

BIBLIA KGALHTINAN: «Akxni nawankgoy: “Anan ntakaksni [o tlan wilaw], nitu ntamakpuwan anan”, pus akxni lakapala nalakgchinkgoy ntalakgsputni, xtachuna nkaj xalan min xtakatsanajwat nchatum mpuskat natawila kskgata; na ni katilakgtaxtukgolhku» (1 TESALONICENSES 5:3).

Biblia tamalakxtumi xlisputni kakilhtamaku la akxni chatum puskat nakgalhi kskgata: kaj xalan chu ni machokgo xtakatsanajwat. Nachuna, lisputni xtachuna tiku nakgalhi kskgata xlakata xatse tlakg makgkatsi pi lakgchamaja xkilhtamaku. Chu maski ni nalakachin kskgata akxni nawani makuchina, puskat liwana katsi pi nialh makgas nalakachin kskgata. Nachuna, maski ni min akxni lakpuwankgo latamanin pi namin lisputni ni lakgpali xlakata lamaw «xaʼawatiya kilhtamaku» (2 Timoteo 3:1, TNM).

Max wix nakgalhskinkana: «Komo liwana tasiya pi lakatsu wi lisputni, ¿tuku xlakata lhuwa latamanin ni akxilhkgo? Biblia wan pi akxni lisputni lakatsu xtawi lhuwa ni xʼamakgolh kanajlakgo maski lhuwa tuku litasiya pi talakatsuwinita. Ni kuenta xtlawakgolh tuku xʼama talakgpali kxaʼawatiya kilhtamaku, chu kaj xlikgalhkgamanankgolh: «Xampi asta akxni yama nkilhtamaku, akxni nkinatlatnakan ntinikgolh, xlipaks xaliʼankgalhin chuna nkatuwaj, nitu ntalakgpaliy lantla asta akxni xakgasiyaj tikilhtsukulh nkatuxawat» (2 Pedro 3:3, 4). Uma wamputun pi maski liwana tasiya pi xaʼawatiya kilhtamaku wilaw lhuwa ni xʼamakgolh kanajlakgo (Mateo 24:38, 39).

Uma artículo kaj makgapitsi lichuwinan tuku wan Biblia pi talakatsuwinita lisputni.a ¿Tlakg katsiputuna? Komo chuna, kakatachuwinanti xtatayananin Jehová chu kamaxkikgon takgalhtawakga xalak Biblia nema ni taxokgo. Tlan namakgalhtawakgakana kminchik, alakatanu niku wix nalakaskina o kteléfono. Tuku talakaskin kajwatiya minkilhtamaku chu lhuwa tuku namakglhtinana.