Laksakpaxkinankan taʼakglhuwit nema anan xlikalanka kkatiyatni

JONATHAN, chatum estadounidense tiku xnatlatni xalak Corea, akxni aktsujku xwanit niti xpaxki xlakata tanu xtasiya. Akxni stakli putsalh niku ni xlakgmakgankgolh latamanin xlakata la xtasiya o xlakata tanu xcolor xwanit. Kgalhtawakgalh xlakata makuchina xwa chu alh kxnorte Alaska (Estados Unidos), tiku xkamakuchi nachuna xtasiyakgo la xla. Lakpuwa pi komo xʼalh kʼArtico niku kakgawiwi ni xtekgsli talaksakpaxkit.

Pero, talakgpalilh tuku xlakpuwan akxni xmakuchima chatum tsumat tiku xkgalhi 25 kata nema lu snun xtatatla. Akxni lakastakwanalh uma tsumat chu lakaʼakxilhli Jonathan, lixkajni wanilh Tuku xlakata xkasitsini xalak Corea. Uma tuku lanilh Jonathan nitlan limakgkatsilh chu akxilhli pi maski lu makgat xʼanit chuntiya xʼanan talaksakpaxkit.

Tuku titaxtulh Jonathan wi tuku kinkamasiyaniyan: talaksakpaxkit anan maski lu makgat napina. Tasiya pi niku anan latamanin, anan talaksakpaxkit.

Maski lhuwa anan talaksakpaxkit, lhuwa latamanin nitlan akxilhkgo. Uma nila taʼakgatekgsa. ¿Tuku xlakata maski lhuwa latamanin ni akxilhputunkgo uma chuntiya anan? Tlan nawanaw pi tiku nitlan akxilhkgo talaksakpaxkit na laksakpaxkinankgo. Kakgalhskinka, ¿nachuna kiʼakgspula?

KIMPUTUMKAN LAKSAKPAXKINANAW

Chatum lataman tuwa nakatsi komo laksakpaxkinan. ¿Tuku xlakata? Biblia wan: «Nitu tuku xtachuna nema lu akgskgawinan la naku» (Jeremías 17:9, La Palabra de Dios para Todos). Max akstu nakinkaʼakgskgawikanan chu nalakpuwanaw pi ni laksakpaxkinanaw o max nalakpuwanaw pi nitu wamputun komo nitlan nakaʼakxilhaw amakgapitsin.

Xlakata nakatsiyaw pi tuwa naʼakxilhaw komo laksakpaxkinanaw kawiliw akgtum liʼakxilhtit: wix tlawampat katsisni ktiji. Xalan akxilha pi chatiy lakgkgawasan mimakgolh tiku ni kalakgapasa chu talakatsuwitilhamakgolh. Lakgtliwakgan tasiyakgo chu tasiya pi chatum wi tuku chipanit.

¿Nalakpuwana pi max kalipekua tatekgsa? Max wix katsiyata pi kuenta militlawat, pero, ¿nalakpuwana pi uma lakgkgawasan lixkajni likatsikgo? Tlakg kalichuwinaw: ¿tuku xcolorkan o tuku tachuwin kgalhikgo lakpuwana? Xlakata la nakgalhtinana nalitasiya komo laksakpaxkinana. Uma nalitasiya pi tsukupat laksakpaxkinana kminaku.

Komo liwana nakinkaʼakxilhkanan, xlikana pi putum akinin laksapaxkinanaw o tsinu chuna makgkatsiyaw. Biblia lichuwinan pulaktum talaksakpaxkin. Anta likgalhtawakgayaw «Chixku laksakpaxkinan kaj xlakata la akxilhnan» (1 Samuel 16:7, La Biblia, mensaje vivo). Chuna, kimputumkan chuna tlawayaw, alistalh nitlan kitaxtu. ¿Namin kilhtamaku nialh nalaksakpaxkinanaw? ¿Namin kilhtamaku akxni latamanin nialh katilaksakpaxkinankgolh?