LICHUWINAN TUKU WI KXMAKNI REVISTA

Tiku ni lhakganankgonit ¿La kitaxtu komo naʼakxilha?

Kaniwa niku tasiya tiku ni lhakganankgonit.a Anta tatekgskgo o lichuwinankan kʼanuncios, la lhakganankgo, películas, tatlakgni, revistas, kʼtelevisión, kvideo nema likgamanankan, kteléfonos, kʼInternet (asta wi páginas kʼInternet nema maklakaskinkgo xlakata nalamalakgachanikgo xfotografías). Asta tasiya pi lu xlakaskinka putum latamanin xliʼakxilhatkan. La uku, tlakg talhuwima latamanin akxilhkgo tiku ni lhakganankgonit, nichuna xwanit xapulana (kaʼakxilhti recuadro «Xlakata tiku ni lhakganankgonit»).

Na talakgpalima xtapuwankan latamanin xlakata tiku ni lhakganankgonit. Makgalhtawakgana Gail Dines tsokgli: «Tuku makgasa lixkajni xʼakxilhkgo tiku ni lhakganankgonit la uku nialh chuna akxilhkgo».

¿Chu wix, la lakpuwana? ¿Nitu kintikatlawanin komo nalilakgastananaw tiku ni lhakganankgonit o la akgtum veneno? Jesús wa: «Wantu xatlan kiwi, mastay wantu xatlan xatawakat, wampi wantu ni xatlan kiwi, wa mastay wantu ni xatlan xatawakat» (Mateo 7:17). ¿Tuku kitaxtu lilakgastanankan tiku ni lhakganankgonit? Xlakata nakgalhtiyaw uma takgalhskinin kalichuwinaw pulaktutu la kitaxtu.

¿Tuku nitlan kitaxtuni tiku lilakgastanan tiku ni lhakganankgonit?

TIKU PUTSANANKGO WANKGO: Akxilhkan tiku ni lhakganankgonit xtachuna la droga nema wanikan crack chu nialhla makgxtakgkan.

Brian,b tiku lu lhuwa xaʼkxilha kʼInternet tiku ni lhakganankgonit wan: «Lu lhuwa xakakxilhputun. Xtachuna la komo xakwanit droga xakmakgkatsi. Lu nitlan xaklimakgkatsi asta xaklhpipi chu xkatsan kiʼakgxakga. Makglhuwa xakmakgxtakgputun, pero akglhuwa kata titaxtulh xlakata nialh xakakxilhli».

Tiku lilakgastanankgo tiku ni lhakganankgonit kaj tsekg akxilhkgo. Kaj xakstu likatsi tiku akxilha uma, wa xlakata lu nitlan limakgkatsikgo, niti katalalinkgo, lakamaxanankgo, lhuwa tuku lilakgaputsakgo chu lu sitsikgo. Makgapitsi asta akstu kamakgniputunkan. Sergio, tiku atsinu ni chali chali xmakti kxteléfono tiku ni lhakganankgonit, wan: «Lhuwa tuku xaklilakgaputsa chu ni lu xakkatachuwinan amakgapitsin. Xakmakgkatsi pi nitu xaklitaxtu, akstu xakwi xakmakgkatsi chu nialhla xakmakgxtakga. Lu xaklimaxanan chu ni xakskimputun tamakgtay».

Maski kaj tsinu naʼakxilha tiku ni lhakganankgonit lu nitlan kitaxtu. Wa uma tuku lichuwinalh makuchina Judith Reisman kxlakatin Senado xalak Estados Unidos, tiku lu lakgapaskan xlakata lakputsanani tiku ni lhakganankgo, wa: «Lu tuwa nialh nalakapastaka tuku akxilhti lakgalhi kiʼakskititkan maski kaj tsinu naʼakxilha, chu nila xapakan». Susan tiku kgalhi 19 kata, kaj xalan akxilhli tiku ni lhakganankgonit kʼInternet chu alistalh lu xlakgati akxilha, wan: «Tuku kakxilhli tamakgxtakgli kkintalakapastakni. Chuntiya min kkintalakapastakni. Klakpuwan pi nikxni katitaxapalh».

TLAN NAWANAW: Tiku akxilhkgo tiku ni lhakganankgonit nialhla makgxtakgkgo chu nitlan kakitaxtuni (2 Pedro 2:19).

¿Lakxtlawa xfamiliajkan tiku akxilhkgo tiku ni lhakganankgonit?

TIKU PUTSANANKGO WANKGO: «Tiku akxilhkgo tiku ni lhakganankgonit lakxtlawa xtamakgaxtokgatkan chu xfamiliajkan» (The Porn Trap [Nitlan kitaxtu akxilhkan tiku ni lhakganankgonit], wan Wendy chu Larry Maltz.)

Akxilhkan tiku ni lhakganankgonit kamapatini tamakgaxtokgat chu familias xlakata...

... nialh lalipawankgo kxtalakgxtumitkan, chu kxtapaxkitkan (Proverbios 2:12-17).
... akstu kapaxkikan, nialh latachuwinan, nialh lamakgapaxuwakgo (Efesios 5:28, 29).
... malakpuwani katlawalh talakgxtumit nema Dios ni lakaskin (2 Pedro 2:14).
... tlawa pi natlawaputun tuku akxilha chu nachuna fuerza matlawiputun tiku tatamakgaxtokgkgonit (Efesios 5:3, 4).
... kamalakpuwani nalaʼakgskgawi kxtalakapastaknikan chu kxlatamatkan (Mateo 5:28).

Biblia wan pi ni nalaʼakgskgawikgo tiku tamakgaxtokgkgonit (Malaquías 2:16). Akxni laʼakgskgawikan lakxtlawa tamakgaxtokgat chu lamakgxtakgkan o lakxtlawakan tamakgaxtokgat kxlakatin mapakgsinanin, na nitlan kakitaxtuni kamanan.

Akxilhkan tiku ni lhakganankgonit na katlawani tuku nitlan laktsu kamanan. Brian tiku lichuwinawa, wan: «Akxni xakkgalhi akgkaw kata xakkgamanamaw chu xaklatatsekgnimaw, ktekgsli xrevistas kintlan nema xlimin tiku ni lhakganankgonit. Chu tsekg ktsukulh akxilha, maski ni xakkatsi tuku xlakata xaklakgati uma revista. Uma nialhla kmakgxtakgli maski lankata xakwanit». Tiku lakputsanankgo, wankgo pi kamanan laktsujku tsuku tlawakgo talakgxtumit chu lhuwa tiku tatalakgxtumikgo, lalikgamanan akxni talakgxtumikgo. Nachuna, nitlan lalikatsini chu lakapala lakgpalikgo tuku makgkatsikgo.

TLAN NAWANAW: Akxilhkan tiku ni lhakganankgonit laktlawa tapaxkit chu kajwatiya limin tapatin chu takatsanajwat (Proverbios 6:27).

¿Tuku wan Biblia xlakata tiku ni lhakganankgonit?

BIBLIA WAN: «Kamaspututit tuku lakaskin mimaknikan [...]: talakgxtumit nema ni xlitatlawat, tuku xalixkajni, akxni wi tiku lu talakgxtumiputun, xlenkgalhin tlawaputunkan nema nitlan chu akxni wi tuku lu milakan tlawaputunatit xtachuna la kakninanikan ídolos» (Colosenses 3:5).

Jehovác ni akxilhputun tiku ni lhakganankgonit. Uma ni wamputun pi ni lakaskin nipara tsinu nalichuwinankan xlakata talakgxtumit. Jehová kinkatlawan xlakata tlan natalakgxtumiyaw chu xlakata tiku tamakgaxtokgkgonit tlan xlipaxuwakgolh talakgxtumit, tlakg tlan xlatalalinkgolh chu xkgalhikgolh kamanan (Santiago 1:17).

¿Tuku xlakata wanaw pi Jehová lu ni akxilhputun tiku ni lhakganankgonit? Kaʼakxilhwi tuku xlakata:

Jehová katsi pi akxilhkan tiku ni lhakganankgonit lakxtlawa xlatamatkan latamanin (Efesios 4:17-19).
Xla kinkapaxkiyan chu ni lakaskin napatinanaw (Isaías 48:17, 18).
Jehová lakaskin pi xatapaxuwan katawilakgolh tamakgaxtokgat chu familias (Mateo 19:4-6).
Xla lakaskin pi skulunku katawi kilatamatkan chu nakamaxkiyaw kakni amakgapitsin (1 Tesalonicenses 4:3-6).
Lakaskin pi kamaklakaskiw chuna la xlilat tuku kinkamaxkinitan Dios (Hebreos 13:4).
Jehová katsi pi akxilhkan tiku ni lhakganankgonit tlawa pi ni naʼakxilhkan talakgxtumit la akxilha Dios, chu limasiyakgo pi akstu kapaxkikan, xlakata uma xla Satanás (Génesis 6:2; Judas 6, 7).

TLANA NAWANAW: Akxilhkan tiku ni lhakganankgonit tlawa pi nialh tlan talalinkan Dios (Romanos 1:24).

Pero Jehová kalakgalhaman tiku makgxtakgputunkgo uma talismanin. Biblia wan: «Lakgalhamaninan y snun tlan katsi kintikukan Dios [...] Porque xla katsi tuku litsukunitaw y nitu kinkgasatkan, katsi xlakata ankin pokgxni» (Salmo 103:8, 14). Xla kawani tiku ni tlanka kamakgkatsikan pi kalakgtalakatsuwikgolh chu kamakglhtinankgolh «xtalakgalhaman, chu nakinkamaxkiyan xlipaxkatsinit akxni lu [...] maklakaskinaw» (Hebreos 4:16; kaʼakxilhti recuadro «Nialh kaʼakxilhti tiku ni lhakganankgonit»).

Lhuwa latamanin makgamakglhtinankgonit xtamakgtay Dios. ¿Kamakgtayanit? Kaʼakxilwi la kamakgtayanit Biblia makgapitsi xlakata makgxtakgkgonit uma nitlan talismanin: «Wampi xachakganina nchu wixin, na santujlanitantit, na litamalulokgninitantit kxtukuwini nkimPuchinakan, chu xpalakata kspiritu nkiDioskan» (1 Corintios 6:11). Na tlan nawankgo la wa apóstol Pablo: «Kkgalhiy litliwakga nema putum kmatlaniy, xlakata tiku kimaxkiy litliwakga» (Filipenses 4:13).

Susan, tiku makgxtakgli uma talismanin wan: «Kajwatiya Jehová tiku tlan namakgtayayan xlakata namakgxtakga uma talismanin. Komo naskiniyaw xtamakgtay, tlan nakgalhiyaw akgtum skulunku talakapastakni chu tlan natalalinaw. Jehová nakinkamakgtayayan».

Nialh kaʼakxilhti tiku ni lhakganankgonit

¿Lakgapasa tiku makgxtakgputun uma nitlan talismanin? Kaʼakxilhti la makgapitsi latamanin makgxtakgkgonit uma talismanin.

1. Katlawani oración Dios.

Franz wa: «Tuku tlakg xlakaskinka wa naskiniya tamakgtay Jehová xlakata nialh na akxilha tiku ni lhakganankgonit».

Jehová maxki xʼespíritu santo lataman tiku tlawaputun tuku xaʼakgstitum (Filipenses 2:13). Espíritu santo makgtayanan xlakata ni nakgalhiyaw lixkajni talakapastakni (Gálatas 5:16, 24).

2. Kakaskini tamakgtay amakgapitsin.

Yoshi wan: «Talismanin akxilhkan tiku ni lhakganankgonit, lu limaxana chu ni wamputunkan, nachuna ni skimputunkan tamakgtay. Wix lakpuwana pi tlan miʼakstu namakgxtakga. Pero uma ni xlikana. Natayaniya komo namakglhtinana tamakgtay. Ktaktujulh chu kwanilh kimpuskat. Nachuna kskinilh tamakgtay chatum amigo tiku lu klipawan. Lu tuwa kmakgkatsilh tuku ktlawalh, pero kimaxkika tamakgtay nema xakmaklakaskin».

Kawanikan amakgapitsin xlakata uma nitlan talismanin talakaskin nakgalhiya litliwakga. Komo makgxtakgputuna uma nitlan talismanin chu tlan nakatalalimpalaya tiku kapaxkiya talakaskin pi chuna natlawaya. Susan, tiku lichuwinawa wan: «Lu tlan kmakgkatsilh akxni wi tiku kwanilh. Maski xapulana nitlan kmakgkatsilh alistalh lu tlan tawi kintalakapastakni chu kkgalhilh takaksni» (Santiago 5:16).

3. Kakatsi tuku chuna tlawa, chu nialh katlawa.

¿Tuku tlawa xlakata nakgalhiya nitlan talakapastakni? ¿Tanuya kʼInternet? ¿Lu katsisnita akxilha televisión? ¿Likgalhtawakgaya revistas? ¿Pina kpupunu? O max ¿xtsinkspat, xsitsipat, miʼakstu xwila o xtlakgwanita? Sven wan: «Kakatsi tuku chuna tlawa, chu ni katlawa uma tuku nitlan». Jesús wa: «Lapi wa milakgastapu kmimpakgstakat mpala xmalakatijinin, kamaxtu, kamakganti» (Mateo 5:29).

Franz wan: «Akxni xtitaxtu chatum tsumat xaktsuku lakpuwan nitlan talakapastakni, pero nachuna tunkun xaktlawani oración Jehová chu alakatanu niku xaklakan». Biblia lichuwinan Job chatum kskujni Jehová tiku nikxni makgxtakgli, wa: «Kkatalakkaxlanit kilakgastapu. Wa xlakata, ¿la naklakgati tiku kajku tsumat?» (Job 31:1).

4. Kamatliwakglhti mintakanajla.

Franz wa: «Kawili kmintalakapastakni lakwan tapuwan, chu katlawa xtaskujut Dios».

Biblia wan: «Xlipaks wa lantlata talulokgtat [o xaxlikana], chu xlipaks wantu nkgalhi nkakni, chu xlipaks wa lantlata xlilat, chu xlipaks wantu xakgstitum, chu xlipaks wa lantlata tapaxkin, chu xlipaks wa lantlata kgalhi xlakgasi, lapi anan akgtum mpala tu lipaxkatsinit, su mpala akgtum ntu xlilat xlitamapakxat wa yuma nkalakapastaktit natlawayatit, wa nkatuwa ntu nkatsininitantit, chu ntu makgamakglhtinanitantit, chu ntu nkgaxpatnitantit, chu ntu nkiuxilhninitantit, wa nkatlawatit; na wa Dios nti mastay ntatanksni, kakatalataman» (Filipenses 4: 8, 9).

a Tachuwin tiku ni lhakganankgonit kilhchani niku tasiyakgo latamanin akxni tlawakgo talakgxtumit xalixkajni, kgaxmatkan o likgalhtawakgakan malakpuwani tiku akxilhma pi nachuna katlawaputulh.

b Talakgpalinit tukuwani.

c Biblia masiya pi Jehová wa xtukuwani Dios.