TUKU KATSIPUTUNKGO TIKU LIKGALHTAWAKGAKGO

Natlatni tiku kstalaninanin Cristo, ¿tlan natatawilakgo ktamakxtumit xkamanan tiku tamakxtukanit kcongregación?

Ni lu xlakaskinka naʼakxilhaw niku natawilakgo kPukgalhtawakga xla xTatayananin Jehová tiku katamakxtukanit kcongregación. Uma revista lu lhuwa kamakgtayanit natlatni xlakata nakamakgtayakgo xkamanan tiku katamakxtukanit kcongregación chu anta wilakgolh kxchikkan, komo chuna tlawaputunkgo. Chuna la masiya revista La Atalaya 15 xla noviembre kata 1988, páginas 19 chu 20, natlatni tlan natakgalhtawakgakgo xkamanankan tiku aktsujku chu katamakxtukanit kcongregación chu anta kwi kxchikkan. Uma max nakamakgtaya lakgkgawasan xlakata nataspitparakgo xkachikin Jehová.a

Tlan xwa komo kgawasa tiku tamakxtukanit kcongregación kaks xtawilalh niku natawilakgo xnatlatni kPukgalhtawakga. Xlakata tiku katamakxtukanit kcongregación ni kawanikan pi asta xaʼawatiya laktawilh natawilakgo, ni anan taʼakglhuwit komo chatum kgawasa natatawila xnatlatni niku xlakan natawilakgo. Natlatni nakuentajtlawaputunkgo xtakanajlakan xkamanankan. Akxni akxtum tatawilakgo tlan naʼakxilhkgo komo kuenta tlawama chu chuna nalitamakgtaya tamakxtumit, uma lu tuwa xkitaxtulh komo aktsu kgawasa xakstu xtawilalh.

¿Chu komo kgawasa tiku tamakxtukanit kcongregación nialh katawi xnatlatni? ¿Talakgpali tuku xlitatlawat? Makgasa, uma revista liwana lichuwinanita la kstalaninanin Cristo nakatalalinkgo xfamilia tiku katamakxtukanit kcongregación chu nialh anta katawi kxchikkan.b Pero, komo familia maxki talakaskin tiku tamakxtukanit kcongregación nakatatawila ktamakxtumit, ni wamputun pi tlan natalalinkgo. Komo familia katsi la katalalinkan tiku tamakxtukanit kcongregación chu lu liskujkgo xlakata nakgaxmatkgo tuku wan Biblia xlakata la nakatalalinkan ni anan tuku xlakata nalilipuwankan uma (1 Cor. 5:11, 13; 2 Juan 11).

Komo tiku tamakxtukanit kcongregación ni tlawa tuku ni xlilat xla tlan tatawila xfamilia o atanu tiku xalak congregación. Minkilhtamaku akxni wilikan akgtum limapakgsin xlakata niku natawila tiku tamakxtukanit o niku ni natawila, max nalimin taʼakglhuwit. Tlan nawanaw, komo familia tiku kgalhakgaxmatkgo tuku wan Biblia xlakata tiku katamakxtukanit kcongregación chu ni liʼakgchakgxkgo amakgapitsi natalan ni lu xlakaskinka naʼakxilhkan niku natawilakgo akxni naʼankgo ktamakxtumit.