«Nkamatsankgananin [...] [Jehová]»

«Tiku nila tapatinan talakgalhin, lakxtlawa puente nema watiya namaklakaskin.» Uma xtachuwin historiador británico Edward Herbert, tiku latamalh ksiglo XVII, masiya tuku xlakata nalatapatiyaw: namin kilhtamaku akinin na nalakaskinaw nakinkatapatikanan (Mateo 7:12). Pero wi tuku tlakg xlakaskinka, apóstol Pablo kinkawaniyan. (Kalikgalhtawakga Colosenses 3:13.)

Kimputumkan makglakgalhinanin, min kilhtamaku kamakgasitsiyaw o kawaniyaw tuku nitlan amakgapitsin chu na min kilhtamaku chuna kinkatlawakanan (Romanos 3:23). ¿Tuku natlawayaw xlakata tlan nakatalalinaw amakgapitsin? Dios malakpuwanilh Pablo, xlakata xkinkawanin pi natapatinanaw amakgapitsin. Takgatsimaja akgtiy milh kata akxni tsokgka uma tastakyaw, lu kamakgtayalh tiku xlamakgolh uma kilhtamaku, akinin la uku na kinkamakgtayayan. Kaʼakxilhwi tuku wa.

«Kalapaxuwanalipinitit.» Tachuwin «kalapaxuwanalipinitit» ktachuwin xagriego kilhchani tapatinankan. Akgtum tachuwin xalak Biblia wan pi kstalaninanin Cristo tiku tapatinankgo «tayanikgo latamanin maski nitlan xtayatkan, chu maski kamakgasitsikgo la likatsikgo». Uma wamputun pi kimputumkan chuna kilitlawatkan. Katsiyaw pi kgalhiyaw tayat nema ni lakgatikgo amakgapitsin, ni kamastaw talakaskin pi tayat nema ni lakgatiyaw tuku kgalhikgo makgapitsin natlawa pi ni xatapaxuwan natawilayaw. Pero, ¿komo wi tiku nakinkawaniyan tuku nitlan?

«Nalamatsankgananiyatit, [o nalatapatiyatit] nchatunu amakgapitsin.» Chatum xlakputsana Biblia wa: «Tachuwin xagriego nalamatsankgananiyatit, o nalatapatiyatit nchatunu amakgapitsin atsinu xtachuna tachuwin talakgalhaman». Atanu libro wan pi uma tachuwin na wamputun «wi tuku mastakan xatapaxuwan, akgtum litlan, tuku tlan nakitaxtuni». Lakgalhamananaw akxni katapatiyaw amakgapitsin maski nitlan tuku kinkatlawanikgoyan. Pero ¿tuku xlakata talakaskin nakatapatiyaw? Xlakata namin kilhtamaku akxni nalakaskinaw pi na nakinkatapatikanan.

«Xtachuna lantla nkamatsankgananin [...] [Jehová] na chuna wixin nkatlawatit.» Wa uma tuku xlakata nakatapatiyaw tiku nakinkatlawanikgoyan tuku nitlan: xlakata Jehová kinkatapatiyan (Miqueas 7:18). Kalakpuwaw tsinu xlakata la xlilanka xtalakgalhaman kinkamaxkiyan Jehová akxni kinkatapatiyan kintalakgalhinkan. Xla ni kgalhi talakgalhin ni xtachuna la akinin. Pero, xatapaxuwan kinkatapatiyan kintalakgalhinkan chu nialh lakapastaka kintalakgalhinkan, nikxni katimilh kilhtamaku akxni akinin natapatiyaw. Jehová lu tlan liʼakxilhtit xlakata la tapatinankan.

Xtalakgalhaman Jehová tlawa pi lu nalakgtalakatsuwiputunaw chu nachuna kgalhiputunaw la kgalhi xtayat (Efesios 4:32–5:1). Lu xlakaskinka nakinkakgalhskinkanan: «Komo Jehová lu kilakgalhaman akxni kintapati kintalakgalhin, ¿tuku xlakata ni ktapati tiku na makglakgalhina la akit, chu xlikana limasiya pi lu nitlan limakgkatsi tuku kintlawanilh?» (Lucas 17:3, 4).